Лавашала районнизи бузерила архIяличил вякьунси Дагъиста шила хозяйствола ва берк-бержла масанала шайчивси министрла къуллукъуни заманалис дузахъуси Иван Голубли республикала овощунала авлахъла БархIила далдуцуназир бутIакьяндеш дариб.
Далдуцуни детерхур Урмала ши­ла мякьларти авлахъуначир. Илини шила хозяйство бузахъути бахъал хIянчизарти, сани­гIят­ла­шалти ведомствобала ва гIил­му­ла ор­га­ни­за­ция­бала вакилти цалабяхъиб.
Лавашала район Дагъиста овощуни дашахъуси бекIлибиубси центрлизи халбируси саби. Илала мер-мусаличир лерилра капустала 25 процент дашахъули сари. ИшбархIилис республикализиб 13 азир гектарличибра имцIали чIя­бар­личир капуста делгIули сари, ил чIябарла байхъала биалли, Лава­шала районнизиб саби.
Далдуцунала дазурбазиб, илкьяйдали овощунала духълуми дашахънила ва сагати жураби ал­кIахъ­нила масъултас хасбарибси гIил­мула-практикала семинар­ра бетерхур. Экспертунани ва се­лек­ционертани ишхIелла жураби Дагъиста дубурла-авлахъла шуртI­ра­чи бурсидирнила челябкьла, ил­кьяйдали сабухъчебдеш им­цIа­бирнила масъулти пикридариб.
Лавашала районна бекI Мухтар ХалалмяхIяммадовли гьуниввалтуси И.Голубли капустала авлахъуни хIердариб. Ведомствола руководитель сагати журабачил хIялумцIлаби дурадуркIнила тя­хIяр-кьяйдаличил тянишвиуб. Ши­ла зяхIматчибачил ихти­лат­би­ру­хIе­л­и ва авлахъуни хIер­ди­ру­хIели И.Голубли Лавашала районна ово­щуни дашахъантала бузери ва ил­дани республикала агропромышленный комплекс гьалабяхI башахънилизи кабирхьуси пай чихъли кьиматладариб.
«Лавашала капуста – ил Дагъиста брендцун ахIенну, арагIебли улкала пахрура саби. Россияла капустала авал бутIала ца бутIа иш ванзаличиб башахъули саби, савлиличибад бархIиахъайчи бузути адамтала някъбачил. ИшбархIи нушани рекордла чIябурти ва халати сабухъуницунра ахIенну, челябкьлализир ил шайчир гьаладяхI дашнилис имкантира чедаира. Нушала мурад – шила зяхIматчи гIевуцни, улкала ишхIелла жураби асахъес имканбакIахъни, Дагъиста овощуни Россияла базуртачир ва илала дурар хIяжаттили детаахъни», —цIакьбарали буриб илини.
И.Голубли илкьяйдали аг­ро­про­мышленный комплекс гьа­лабяхI башахънила масъултала шай­чиб адамтира кьабулбариб. Илини дубурла мер-мусаличиб кья­ли вавалибирхъяхъниличи къяч­­­дилкути фермертала ва шила хо­­­зяйст­вола предприятиебала ду­гьа­бизуначи ле­хIизур.
«Чедибдеш» КФХ-ла бекI ЯхIъя МяхIяммадов мицIираг дуки дикути ванзурбачиб ижарала багьала кьадар камбиахъес икьалабарахъес тиладиличил дугьаизур. Фермерли чеимцIали ванзурби декIардирниличила ва шинни иркнила кабизуни къулайдирнила хIянчи дурадеркIес гIягIнили биъниличила буриб. БусягIятла замана ванзурби кадастровый тяхIярли кьиматладирнила проект ДР-ла лебдешла Министерстволизиб пик­рибирули биъни белгибиуб.
МяхIяммадрасул ХIясанов сай-вегIси, ил лугIилизиб — дявила хас­си балбуцла бутIакьянчибас хас­дарибсира, фермерский хозяйст­во абхьес ва гьалабяхI башахъес па­чалихъла кумек гIеббиахънила хIекь­лизир насихIятуни дурахъес или дугьаизур.
Илди ва цархIилти масъултачил дугьабизур Лавашала фермерти ДР-ла шила хозяйствола министрла къуллукъуни дузахъусиличи. Адамти кьабулбирнила балбуц ахирличи бикибхIели, И.Голубли му­­ниципалитетла шила хозяйствола зяхIматчибас, регионна берк-бержла масанала бяхIчибизлизи бел­гиси пай ка­бирхьни багьандан, ур­кIи-ур­кIи­ла­бад баркалла багьахъур. Ла­ва­шала районна бузерилизиб де­кIарбухъунти агропромышлен­ный комплексла хIянчизартас ведомст­вола шабагъатуни ва ХIур­мат­ла Грамотаби дедиб.