Аркьуси дусла бегIлара гIергъиси бархIи савли телефоннизирад зянкъ дакIиб. «Мурад, цаибилгъуна, мубаракирулри Сагаси Дусличил ва, кIиибилгъунара, ишбархIи хIед нуни ца савгъат бурхьисну, хIерли вии». Гьайгьайрагу, нуни тIама хIясибли вагьурра чи сайрил набчи зянкъикIуси: ил дила шан ва тухум Амирбекла ГIямар сайри. Ит бархIи бархIехълис ГIямарли наб дила виштIаси уршиличил савгъатра бархьиб.
Сагаси Дусла байрамлис наб иличибра гIяхIси савгъат биэс хIебири. Вералибяхъяхъибси жерех-бялихъ. Илала метрцада бухъяндеш бурги. Бархьли бурасли, нуни гIямрулизиб бегI гьалаб сабри «жерех» бикIуси бялихъличила бакьибсира: нукIун бялихъчи ахIенра. Нуни жерех сецад бирусил балусира ахIенри. Амма наб савгъатлис бархьибси бялихъла къуйрукъличибад къянкъличи бикайчи 70-80 сантиметрла бухъяндеш бурги. Илизибад башуси бизиси тIемличилакIун бурес хIейрар!
ГIямар бехIбихьудла классуназив дила виштIаси узи МяхIяммадличил варх учIусири. Нушала школализир авал класс таманаили гIергъи, дудешли ил Каспийск шагьарлизибси интернатлизи арукибсири. Интернат таманаибси ГIямар ДГУ-ла дурала улкнала мез руркъуси факультетла англияла мезла отделениелизи учIес керхур. Университетлизив учIухIели ил гIярмиялизи арукьяйчи Батирайла уличилси кьакьализибси университетла общежитиелизив хIерирули калунси сай. Илис сабри илини дила лебилра юлдашуни-студентунира балути.
ДГУ таманаибси ГIямар Маммаевич кIел дус Кубачила урга даражала школализив англияла мезла учительли узиб. Бахъал нуни балути гIярбукIантани чула мугIяллим гьаннара гIяхIти дугьбачил гьануршули вирар. Илавадли ГIямар гIярмиялизи арякьун ва дазу балтахъути дигIянати гIяскуртазив гIяхIцадхIи офицерли къуллукъбирули калун.
ГIямарла дудеш Маммала Амирбек (ил сунес сай Мимми Иванович викIусири) дила дудешла кьариган вирусири. Ну бехIбихьудла классуназив учIухIели, школала директорли вируси, илини набра дурсри кадирхьули калунсири. ГIур ил Дибгашила Кировла уличилси колхозла председательлира узули калун. Дебали гIяхIси адам вири Мимми Иванович. Бурасли, илван жагали делхъли улхъуси цархIил адам нушала шилизив хIейуб. Маммала Амирбекли сунела цайли цаси уршилис гIяхIси багьудира бяркъра дедиб.
Гьанна, къябаили дила буруси, нуни гIярмиялизиб къуллукъбируси замана кабикибси ца анцIбукь гьанбуршис.
1969 ибил яра 1970 ибил дус бурги итхIели. Нуни гIярмиялизиб Толмачёволизибси дявила аэродромличиб къуллукъбирулри. Ит бархIи савли ца дуги-хIери метеостанциялизиб хIеруди бузахъули калунси, ну, казармализи чарухъи, бамсриахъес хIядурикIулри. Усес кайхьес кьасли, койкаличи кайили, палтар чердалтулри…
ИлхIели гIячихъли бакьира нуни набзи серил бурес дигули, дуцIухъи казармализи ухIналхъуси дила юлдаш Владимирла тIама. «Телевизорлизиб Дагъистан чебиахъулину, къалабали Ленинская комнатализи ваши», — викIулри ил. Ну удирти палтарличил телевизорличи хIерэс дуцIухъунра. Нуни итаб, Сибирьлизиб, гIярмиялизиб къуллукъбирухIели, гьалаб гьачамалра телевизорлизибад Дагъистайчила буруси бакьибси ахIенри.
Телевизорлизивад нуни бегI гьалав чеваибси адам Мимми Иванович сайри. Нушала шила дублабси шиниша кьарли кабуцибси диркьси авлахъличив ил, чIакали дуклумиван дархьдарили някъби, уктемли ахъбуцили бекI, делхъла мявализив улхъулри.
Зирнявчилара дамрухъялара мякьлав, кьяшличи кьяш кабатурси, уталичи кайибси ухъна вагьурра нуни: ил дила нешла узикьар хIурматла Закаригела МяхIяммад сайри. Пахрули бицIиб дила уркIи, ва, ласвяхъили гIелавяхI, юлдашунази викIулра: «Дила шила мер-муса сари икIар чедиахъути. ИкI уталичивси ухъна дила нешла узикьар сай, делхъли улхъуси гьести гIямрула адам биалли, дудешла кьариган сай».
Гьала хили бурисра, итхIели телевидениела кIиибил каналлизиб чебиахъути РФ-ла Верховный Советлизи депутатли виркIуси адамлис гьунибиути дила шанти ва районна шимазибадти вакилти буилри. ИтхIели нушачир ил тяхIярли дурадуркIутири выборти!
1988-1989-ибти дусмазиб «Дагстрой» бикIуси СМП (строительно-монтажный поезд)-ли мерсли гъятIаибси Арменияла шагьар Лениноканнизир сагати школаби тIашдалтулри. СМП «Дагстройла» начальник дила бегIлара виштIасигъуна узи СягIид сайри. Школабазир дуцIрумла каникултала замана кIел дус илини нура сунечил Армениялизи арукибсири.
КIиибил дус ила аркьуси ну Грузияла Гардабани бикIуси шагьарлизив гIярмиялизиб къуллукъбируси Амирбекла ГIямарличил къаршивикибсири. ГIямарла хьунул Умукурсумлира гIярмиялизиб къуллукъбирулри. ИтхIели Умукурсумла кIелра узи Амирбек ва БяхIмуд набчил барх лебри.
Илдани нушала халаси хIурмат барибсири итхIели. ГIямарла квартирализир нуни бегI гьалар держибтири Грузиялизирцун дирути тамай дучIесдиибти (сухой) чягъир. ИлхIели ихтилатлизиб нушази ГIямарли бурибсири, Сталинни илди чягъир минеральный шин «Боржоми» дархаили дужутири или. ИтхIейчивад вехIихьили, нунира сухой чягъир минеральный шин дархаили дужули вирус.
ГIярмиялизибси къуллукъличивад майорла званиеличил арякьунси ГIямар Маммаевич гьаланачив МяхIячкъала шагьарла вачарла портла охранала начальникли узули калун, кIинайс биалли – портла директорла заместительли. ИлхIели сайри илини ну Дагъиста урибси журналист ГIялик ГIябдулхIямидовличил тянишварибсира. «Молодёжь Дагестана» газетализиб дурабухъунси гьарил дила макьалала чебкад илди кIелра набчи зянкъбикIутири. Чули бурни хIясибли, илдас дила белкIани гIяхIдилзули дуилри.
Гьачам хабаралра агарли ГIямар Редукторный посёлоклизи набчи гIяхIладлира вакIибсири. ИлхIели илини сунечил рарх авал дус Дибгашила школализир ручIули калунси дила хьунуйс савгъатунира хибтири.
«Дила талхъангъуна мурул» рикIусири ГIямарла неш Аццила Аба, сунес гьалав итил дунъяличи арякьунси мурул гьануршули. Гьарли-марли илгъуна пергер адам вирусири Маммала Амирбек. Халаси игъбарбиуб илди кIилалра чула урши иш дунъяличивад аркьухIейс мицIирли кахIелни. Урши вебкIниличила бакьалри, илди кIелра, уркIби пIякьдикили, бубкIи: хIебири илдани вахъ дигуси уршила гьанагарси бебкIа чекасес.
Чарх-бекIлизивад цархIилти лебилра сунела зилантичив жагали калунси ГIямарла уркIи, илис операция барибси хирург викIуливан, дебали бухънабаибсили уббухъун. Хабарагарси бебкIали къябаиб бахълис гIибратли диэсти жагати гIямру. Амирбекла ГIямар нуша-ургав агниличи ну гьаннара вирхес хIейрулра. Гьалжанализи катаб сай.
ХIяжимурад Ражабов
