Хайдакьла районна Мажалисла шилизибси «Кайтаги» этноцентрлизиб някьиш лукIуси «Этнодизайнер» бикIуси сагаси студияли сунела бузери бехIбихьиб. Зубайдат ХIясановани бурили кьяйда, ишбархIилизиб миллатлашалси бетуц (этностиль) дебали машгьурли саби, хаслира жагьилти-ургаб. ДР-ла БекIла Грантла конкурсличир гьаладихьибти проектуназибад цаэсил мер касибси «Арт мастерская «Руки матери» проект гIямрулизиб бетурхахънила дазурбазиб, чIянкIи ва футболкаби хайдакьла някьишли лукIнила устадешла дарс сагаси студиялизиб бетерхур. Ил дураберкIиб Дагъистайзир машгьурси художник-дизайнер Калимат ГIямаровани.
Балбуцличи бахъал адамти учибикиб. Илдала лугIилизиб лебри — районна центрла лерилра школабала чедирти классунала бучIантира. Балбуц ибхьули гъайрухъунси Зубайдат ХIясановани «Древо жизни» ва «Руки матери» проектунала мурадличила буриб ва сагаси студия абхьниличил лебилра мубаракбариб.
«Хайдакьла халкьла миллатла цадеш калахъес ва чеалкIуси наслулис бархьси бяркъ бедес или пикрибарибси саби багьудила проект «Арт мастерская «Руки матери». Гьанна ишбархIи нушани илала дазурбазиб сагаси студия акIахъублира. Илабти 25 бучIаннис дизайнерла санигIят бяркъес имканбикIур», — рикIи ил.
КIинайс биалли, Калимат ГIямаровачил гIяхIли илини тянишбариб. «Калимат ГIямаровани саби «Калима» бренд акIахъубси. Ил ДР-ла БекIла Грантанала конкурсуначир мурталра чедириркуси сари. К.ГIямарова илкьяйдали «Эклектика» бикIуси арт-пространствола руководительра, МяхIячкъалализибси дизайнна школала преподовательра сари. Илини някьишдарибти палтар гьарли–марси искусство саби», — чеимцIабариб З.ХIясановани.
Калимат ГIямаровани сунела яргализиб буриливан, илала пагьмула бекIлибиубси мурад саби Дагъиста цаси сипат акIахъни ва халкь-ургаб машгьурбарни. «Хасти някьишличилти палтар чедаибхIели, лебтанилра ил чидил халкьла сабил багьесли», — рикIи ил.
Устадешла-дарсличиб Калиматла хIянчурбала видео-ролик бучIантас гьалабихьиб. КIинайс биалли – хайдакьла някьишли делкIунти палтар чедаахъиб. «Этнодизайнер»-ла бучIантас бузерилизир хIяжатти гIягIниахълумачила илини буриб. Школабала
бучIантани устадешла дарсличир халаси иштяхIличил бутIакьяндеш дариб. Лебилра 55 бучIантазибад ил бархIи 25 дурхIяли «Этнодизайнер» студиялизиб бучIес дигни багьахъур.
Хайдакьла районна администрацияла пресс-служба
