Гьарил адамла гIямрулизир сунела уркIилис дурхъати, разити гьанбикунани дицIибти, талихIчерти дусми дирути сари. Ил манзил каберхурли гIергъи, гIяхIси замана бири или гьанбиркур. Студентунанира саби бучIухIелла гIямрула кьадри кIинайс, мурт-биалра бирар балуси.
Россияла Игит МяхIяммад НурбяхIяндовла уличилси Сергокъалала 2-ибил школализи ДГУ-ла филологический факультетла даргала группала студентуни практикаличи бакIниличила багьурра. Илди чебаэс, ихтилатбарес, илдази практикаличила хабурти дурахъес, челябкьлализир илдас багаладиэсти насихIятуни дурес илдачил гьунираэс дигиаур.
Школализи бакIибти практикантунала руководитель, ДГУ-ла филологияла факультетла Дагъиста мезанала кафедрала заведующий, филологияла гIилмуртала доктор, профессор, ДР-писательтала Союзла даргала секцияла руководитель Муса Расулович БяхIяммадовра нура 2-ибил школала директор ГIябдуряхIимова Индира МяхIяммадсягIидовначи адацIира.
Индира МяхIяммадсягIидовна нушаб разили гьунираиб, студентуни-практикантуни гапбирули сунела пикруми дуриб. Школала директорлис тамашадизурлири 5«а»-ибил класслизир дурсри дируси практикант – МяхIяммадшапи Матаевла устадешличил дирути дурсри. Илини, чумал бархIицун виалра практикаличи вакIили виубси, класслизиб назмурти лукIес иштяхI лебти дурхIни белгибариб, илдала назмурти кьиматладарили «Лачин» журналлизи дархьиб. Иличибли, никIа лукIутала поэзияличи диги гьатIира имцIадариб.
Зайнаб ИсламгIялиевнани, ПатIимат МяхIяммадовнани, Саида МяхIяммадовнани, Завжат Зияутдиновнани – 2–ибил школала дарган мезла ва литературала учительтани студентунас дурсри дирахъес, хIебалуси гIеббурули, кумекбирулри.
Практикантуни школала коллективлис баркалла бикIулри, илди чули бучIахъантала диги сархес, илдачил гъамли тянишбиэс бажардибикилри.
Саберхурти, бузериличи гъирачебти студентуначил ихтилатбирухIели, илди-ургаб дила бархкьябира лебли уббухъун. Сергокъалала районна УбяхI МулебкIила шилизирадси Анжела Мутазовани ва Дахадаевла районна Уркарахъила шилизивадси МяхIяммадшапи Матаевлира «Замана» газетализиб корреспондентла хIянчира бузахъули саби.
Школала директор Индира МяхIяммадсягIидовнани нуша 10-11–ибти классунала дурхIначилра тянишдарира. БяхIяммадов Муса Расуловичли илдази ДГУ-ла филологияла факультетла урусла-дагъиста отделениеличила (Фил.Фак.РДО) къантI-къантIли, нешла мез мяхIкамдирахъес насихIятуначил, сунела студентунала сархибдешунани сай разивирниличила бурули гъайухъун ва ноябрь базличиб Федеральный олимпиада бетурхниличила багьахъур.
ДГУ-ла преподаватель, школала директор, завуч, учительти, практикантуни, школала бучIанти ва газетабала корреспондентуни цалабикибси гьунибаъни дебали дигесири. Илгъуна бархбас бузахъалли, нушала культура ва мез гьаладяхI дашниличи рирхулра.
Практикантунас ва учительтас чIумаси арадеш, халаси сабур, бузерилизир ва гIямрулизир гьарбизуни дулгулра.
Басират ХIяжимурадова
