Мурталра сагадешуначи хъарихъуси
Нушани зумали «мугIяллим» ибси дев бурулра, амма илини нушала гIямрулизиб сегъуна мер бурцулил или пикридулхъули–декIар хIедирехIе. Нуша лерилра биалли, дахъалгъунти шалубазир, бегI гьалабси яргализир мугIяллимтани адамтили детаахъуртира. Нуша талихIчертили, цархIилтала хIурматбарес балутили, гIядатуначи чекадизуртили халадаахъес багьандан, илдани кадирхьути цIакьани ва сабур дебали халати сари!
ИшбархIи ишаб бурес дигулра сунела школаличи ва бучIахъути дурхIначи уркIи изуси, «Лавашала гимнзия» МКОУ-ла географияла чебяхIси категорияла мугIяллим ГIисаева Марьям МяхIяммадсаламовначила.
Илала бузерила гьуни бехIбихьибси саби 1976 ибил дуслизиб Лавашала 2-ибил школализиб. Илала хъуцIрумала гIелаб – Дагъиста пачалихъла педагогикала институт, географияла факультет ва биологияличи, географияличи кахIедурхути диги.
1980 ибил дуслизир Марьям МяхIяммадсаламовна Хъар Лябхъула школализи шуррухъун, 1987 ибил дусличирад гьанна бикайчи ил Лавашала 1-ибил школализир рузули сари.
Марьям ГIябдусаламовнала дурсри ибкьси белчIудила бузериличилцунра ахIенну, сагаси ибси балнила разидешлира дицIили сари. Ил се-биалра ца сархибдешличил тIашхIерилзан, даим сунела багьудлуми чедирцIахъули, дурхIнас бяркъ бедлугнила сагати тяхIуртагIир умцIули рирар. МугIяллимла пагьмула хьулчни сари – бучIантачилси ихтилат, сари-регIти устадеш, цархIилти мугIяллимтала багьудлуми гIерисни, санигIятлашалти сиптакардеш.
Марьям МяхIяммадсаламовнани мурталра жигарла бутIакьяндеш дирули дирар санигIятлашалти устадешла «Дусла мугIяллим» бикIути конкурсуназир. 2009-ибил дуслизир илини муниципалитетла бутIализиб чедибдеш сархиб.
Илис география гьачамалра мискинти баянтачилси, анцIдукьеси дарсли хIебири — илис ил дунъяла «мицIирси» тарих саби. МугIяллимли дурхIни алавчарси тIабигIят кьиматлабирахъес бурсирирули сари.
«Географияла мугIяллим сарливан, нуни дурхIнала дунъя багьахъес, сунела хасдешуначил улка дигахъес бурсибирулра: илала халкь, географиялашалти мер-муса, жагадеш, ил лугIилизиб – ахIерси Дагъиста тIабигIятра. Гьайгьайрагу, цархIилти улкназибра адамти севан хIербирули ва илди сегъунти хIянчилизи ахъилил баянбирулра», — рикIар Марьям МяхIяммадсаламовна.
Педагогикала бузерила 50 дус – ил санигIятлашалси стажцун ахIен, ил азирти дурадеркIибти дурсри ва далдуцуни сари. Марьям ГIисаевани гIяхIцад дусмазир бекIдеш дирутири край руркънила кружоклис ва школализибра, илини ахIерси крайличила белкIани цаладяхъили, хасси гIямзи акIахъуб. Ил зумали бучIантачил рарх архIябачи рашар. Илини бучIахъути дурхIни – край руркъутала команда саби, чулира республикала олимпиадабачир гьаларти мерани дурцути. Илкьяйдали Марьям МяхIяммадсаламовнани чумал дус географияла, химияла ва биологияла мугIяллимтала методический цалабяхълисра гьуни чебиахъули калун. Ил районна аттестационная комиссияла экспертунала кьукьяла членра сари. Илкьяйдали, ДР-ла багьудила Министерствола комиссияла член сарливан, илини Ахъушала районна школабала аттестациялизирра бутIакьяндеш дариб.
Бузерилизир сархибдешуни диахъни багьандан, Марьям ГIисаева РФ-ла багьудлуми тIинтIдирнила Министерствола ХIурматла Грамоталичи, «Лавашала район» МР-ла администрацияла Баркаллала кагъарличи, «Лавашала район» МР-ла администрацияла багьудила управлениела ХIурматла Грамотабачи, 2004-ибил дуслизир биалли, «ДР-ла рурибси мугIяллим» хIурматла уличил лайикьрикибси сари.
Бархкьяби иличила бикIули бирар: «Халаси хIярпличилси мугIяллим, сунела санигIят ункъли балуси педагог, бирхауди бихьеси юлдаш». Сунени бучIахъули калунти биалли, иличи мурталра хIурматличил ва халаси баркаллаличил дугьабилзули бирар.