Ишди бурхIназив гIямрулизивад арякьун Ахъушала районна Усишала шилизив акIубси Казиев ГIяб­ду­ряхI­ман ГIябдусаламович, бунагь-хатIа урдуцаб сунела.
ГIябдуряхIман Казиев дахъал дусмазив Ахъушала районна больницализив хирургли, гIур бекI тухтурли узули калунсири. Ил узухIели Ахъушала районна больницала мурталра гьабкьятала къяйлизиб бирусири. ГI.Казиев лебил Дагъистайзив машгьурси тухтур сайри, нушала районна пахрура сайри.
Илини адамтала-ургаб халаси хIурмат сархибсири ва баркаллаличи лайикьвикибсири. МалхIямли, къугъали, масхуртачил гъайвикIули, зягIипси уркIичеввиахъубли, разивирахъусири.
Сунела гIямрула рархкья Сабиятличил хIябал ур­ши-рурси абикьурли, чебяхIси даражала багьудира ка­сахъили, гIямрула гьунчи дураиб. Сабият Казиевара да­хъал дусмазир хьунул адамтала тухтурли рузуси сари.
ГIябдуряхIманра Сабиятрагъунти зягIиптачи уркIецIичебти, я илдачи гIягIнихIебикибти адамти бахъал хIебургар Ахъушала районнизиб.
ГIергъиси замана илди МяхIячкъалализиб «Здоровье» клиникализиб бузулри.
Наб дила макьалализиб ца анцIбукьличила бурес дигулра, 1981 ибил дуслизиб дила нешла урцецла операция барибсири ГIябдуряхIман Казиевли ва илгъуна пагьмучевси, машгьурси тухтур, хирург ХIянипа ГIямаровли. ИтхIели илдигъунти къиянти операцияби рахли сарри дирути. Илди кIелра тухтурли Ахъушала шилизибси больницализиб илгъуна къиянси операция барили, дила неш сагъриахъубсири. Сегъунти устадешла бегIти тухтурти биэс гIягIнилил илди. Гьанна биалли зягIипти гьарахъти мераначи башули саби илдигъунти операцияби дарахъес багьандан. Илдира гьарилла-декIар гьардилзулира ахIен.
Чуйнара ГI.Казиевли нушала тухумтасра, илкьяйдали цархIилти зягIиптасра операцияби дарили, арабарили хъули чарбулхъахъули бири. Ахъушала районнизибти гIяхIти тухтуртала хабарлис, операцияби дарахъес алавчарти районтазибадра башутири итхIели зягIипти.
Аллагьли Гьалжанала агьлу вараб ГIябдуряхIман ГIябдусаламович, сунела хъалибарглис ва тухумтас арадеш бараб!