Хъалибаргла БархIилис чичила бел­кIи­шара или пикририкIули лерсири. ГIур биалли гьанбикиб нушала гьалаб леб­гу дахъал дусмазиб барх хIербиубли, ге­хIел урши-рурси абикьурси хъалибарг, илди саби МяхIяммад Ва­на­тов ва Па­тIимат Маллаева.
МяхIяммад МяхIяммадович ва Па­тIи­мат ШяхI­ба­новна хъайчика­бииб­хIей­чирад ишдус 58 дус диркули сари. Илди кIелра хIурматла адамли жура-журала къуллукъуначиб бузули халаси бузери бариб. МяхIяммад Ванатов узули калун мугIяллимли Семгамахьила, БурхIимякьмахьила урга даражала школабазив, районна радиовещаниела редакторли 27 дус узиб, «Бархьдешла гьуни» газетала редакторлира калун.
ПатIимат Маллаева 1968 ибил дус­лизиб урга даражала школа таман­бариб­хIели, районна газетала редакциялизи рузес ракIибсири. ГIур МяхIяммад Ванатовличил кьисмат цабариб ва чумал дусла гIергъи райкомлизир машинисткали рузес рехIрихьиб, ил къуллукъличиб ПатIиматли жавабкардешличил рузули, гехIел дус хIянчи бариб. МяхIячкъалализибси Дагъиста пачалихъла университетла филологияла факультетлизи заочно ручIес карерхур.
Илар ручIули лералли, ПатIимат ШяхIбановна 1982 ибил дуслизир МяхIячкъалализибси республикала дарган мезличил дурабулхъуси «Замана» газетала редакциялизир корреспондентли рузес рехIрихьиб, итхIели ил газеталис «Ленинна байрахъ» бикIусири. Ил газетала редакциялизир рузухIели, ПатIимат Маллаева Ахъушала ва Лавашала районтала мер-мусаличи раиб. Бахъал машгьурти адамтачила, кадикибти анцIбукьуначила, сархибдешуначил дузути организациябала, учреждениебала бузериличила ва гIуррара дахъал секIайчила лукIиб.
2003-ибил дусличирад «Бархьдешла гьуни» газетала редакторли рузес рехIрихьибси ПатIимат ШяхI­бановани сунела бузерила гьуни гьаннара ил къуллукъличиб чебетаахъили, газета кьанхIебиахъубли за­маналичиб дурабулхъахъули, даимбирули сари. Пагь­мучерси ПатIимат Маллаева бахъал адамтани ралули сари, илала бузери пачалихъла шайзибадра кьиматлабарили, чумал шабагъатличи лайикьрикили сари, «ДР-ла культурала урибси хIянчизар», «Бузерила ветеран» ибти умачира, «Нешла асилдеш» бикIуси медальра касили сари.
ПатIимат ШяхIбановнала белкIани дурадулхъули сари «Бархьдешла гьуни», «Замана», «Дагестанская правда» газетабазир, «Гьалмагъдеш» бикIуси альманахлизир, «Дагъиста хьунул адам», «Дагъиста халкьани» бикIути журналтазир.
П.Маллаевани хIядурдарибти белкIани жура-журала республикала кьадрила конкурсуначи гьаладихьили гьаларти мераначи лайикьдиркули дирар. Ил багьандан леб ДР-ла багьахънибала, бархбасунала ва дахъал коммуникациябала Министерствола шайзибад бедибси Диплом, «Дагестанская правда» газеталичил дахъал дусмазиб бархбас бузахънилис бедибси ХIурматла Грамота, «Ахъушала район» МО-ла администрацияла шайзирад дедибти ХIурматла Грамотаби ва гIурра цархIилтира шабагъатуни.
ПатIимат Маллаевани белкIани хIядурдирули дирар дигалли нешла мезличил, дигалли урус мезличил, декIар-декIарти темабачил.
Бурес гIягIнили саби ЧебяхIси ВатIа ­дергъличила, ГIяли-ХIяжи Устазличила делкIунти урус мезла жузазирад дарган мезличи шурдатурли дурадулхъути белкIаначила. Илди белкIани гьарилли илкьяйдали чедетаахъили делкIес хIебали, халаси пагьмула вегI адамли ахIенси. Илдазибра халаси хIянчи бетерхахъур илини. П.Маллаевачи дихули дирар дарган мезличи шурдатахъес уголовное делоби, чедетаахъили урус мезра дарган мезра далули виалли ахIенси чула мягIна бакIахъес имканхIебикIути.
– Наб илди делобазиб гьанбушибти адамти гIур чуйнара гьанбиркути саби, се бетаурара, сегъуна танбихI барибара или, – бурули сари сунени. – ХатIахIейкес багьандан гьарил дебали пикриулхъес гIягIниси саби!
ПатIимат ШяхIбановала бузерила гьуниличила, пагьмуличила белкIес лебил газетара хIебиур. Ил багьандан илала хъалибаргличилара лукIулра.
МяхIяммад Ванатовли ва ПатIимат Маллаевани гIяхIси бяркъра бедили, лебтазилра багьудира касахъили гехIел урши-рурси гIямрула гьунчи дураиб.
2024 ибил дуслизиб хъалибаргла Дусла хIурматлис Хунзахла районнизиб дураберкIибси республикала кьадрила балбуцличи М.Ванатов ва П.Маллаева жибарибтири, ва илдас савгъатунира Баркаллала кагъарра дедибтири ДР-ла Правительствола шайзирад.
Бурес гIягIнили саби МяхIяммад Ванатов ишдус 90 дус виънила юбилейра дурабуркIуси саби или. Пергер адам сай МяхIяммад, сайра адамтала хIурматличил пайдалаикIуси.
Гьаннала гIергъира чула гIямрулизир ва бузерилизир сархибдешуни, хъулиб баракат, иман ва диги им­цIа­дикIаб! Чула дигутани разибирули хIербиэс кьадарбиаб!

Сабият ГIябдуллаева