«Замана» газетала гьалавла бекI редактор ГъазимяхIяммад ЖабрагIилович Юсуповлис дацIти гъай хIейгахъи. Мурхьси ва мягIничебси масъалала чевкад биалли ил халаси иштяхIличил ва жагали гъайикIес вири. Илгъуна духуси пасихIкарличил ихтилатдикIес дигахъира нушабра, газетала хIянчизартас, амма илкьяйда ихтилатдикIес бахъхIилизиб гьачамцун ахIи, гьаман хIейри, сенкIун ил гьар мурталра хIянчилизи вархили вири.
Дила гIямрула игъбарлизи халбирулра иличил рарх рузес наб кьадарбиъни, камси заманалис биалра.
Редакциялизиб дила цаибил бархIи гьанбиркур: ну урухкIулри, урузкIулри, амма савли-жявли хIянчиличи ракIибси нуни редакциялизив ца ГъазимяхIяммад ЖабрагIиловичцун варгира. Илини жявли ракIнилис «молодец» или гапрарира ва, цархIилти хIянчизарти бакIайчи наб анцIхIебукьахъес, чяй дарили картIиб. Илцадра пергерси ва хIялалси уркIила вегI редактор чеибхIели, дила урехи кIундацIиб.
Баягъи илала гIяхIдешличибли ва устадешличибли сарри ну газетализир рузес бурсириубсира. Амма сепайда, арадеш нукьсанбикниличибли ил хIянчиличи хIевашанвиуб.
ГъазимяхIяммад Юсуповла у дарган мез ва литература школализир дяркъес бикибти даргантас тянишси саби, илдани «Замана» хIулбани чехIебаалра. СенкIун ил, журналист виънила дурабад, писательра, поэтра, тилмажра вири. Сунела белкIаначил даргала литература гьалабяхI башнилизи чебаэси пай кабихьибси автор сайливан, Гъ.Юсуповла произведениеби школализирра руркъяхъути сари. Илала цаибил жуз 1974 ибил дуслизиб дурабухъунсири.
Гъ.Юсуповла «ХIердикIехIе, хIер!…» жузла аннотация ишгъуна саби: «Дубурланти мурталра гъабзадешличил ва адамдешличил, яхI-ламусличил ва хIялалдешличил декIарбулхъутири.
Сецад хIейгеси биалра, Совет хIукуматла дусмазир, «коммунизм» лушуси замана, адамла илди черяхIти къиликъуни шякIдиресдииб, сигли дугесдииб. Адамла уркIилизи, рухIлизи илди сагадан минадиахъес багьандан, се баралли гIяхIсира? … ХIера, сунела сагаси жузлизиб даргала писатель ГъазимяхIяммад Юсуповлира ил масъала сунеласун ирзули сай».
Ишар гьандушибти черяхIти къиликъуни ГъазимяхIяммад ЖабрагIиловичли бегIла гIергъиси гьигь лебалцадхIи сунезир мяхIкамдариб. Иличи че, илди мяхIкамдирахъес дубурланти жибирули сай илини сунела произведениебачил. Масала, «Мургьила тIулека» бикIуси хабарлизиб авторли жагьил адамла адабчевдеш, хIялалдеш чедиахъули сай. Арц кадерхурли кьакьаракIибси вузла студентка Рашидатли мургьила тIулека бургули сари ва илала бегIтази чарбирули сари. Ил хабарла сюжетличил Гъ. Юсуповли бучIанти адамдеш ва мардеш лертили биахъес жибирули сай.
Дарган мезла давлачебси дугьбала хазна бихIуси писатель сайри ГъазимяхIяммад ЖабрагIилович. Илала произведениебазир ишхIелила даргантани бекIлил хIедузахъути, жявхIелла дугьби дахъал лер.
Проза лукIнила кьяйдуртачила бурули, профессор ГI.ВяхIидовли лукIули сай: «Сай-аринти, гIядатла ахIенти, урхIла белкIанала лукIнила кьяйда тикрархIебирути хабуртачил ва повестуначил даргала прозализи вакIибсири Гъ.Юсупов».
ГIе, ил гьарра шайчивад сунечи чекайзурси, сайгъуна цархIил агарси, халаси культураличилси, адуцалачевси адам вири.
Илала лугIилашал бахъал юлдашуни бири, илдира сайгъунти пагьмучебти. Илдазивад ца сайри Дагъиста халкьла поэт, тилмаж МяхIяммад ХIямидов.
ХIера, сегъунти ванати дугьби лукIулил илини сунела юлдаш ГъазимяхIяммадлис, сагаси жуз пешкешбирухIели:
«Дигуси узи ГъазимяхIяммадлис — Дагъиста яхIра, ламусра, адамдешра, кагибдешра сунезир лерсилис уркIи-уркIилабад ва гIяхIдешунира гьарбизунира дулгули. Иш поэма дурабухънилизиб лебси хIела пай нуни гIяхIил балулра. Дерхъаб!
ХIела ХIямидхъала. 14/XI-94 д.»
Дила бархкьябани нушала гьалавла редактор ГъазимяхIяммад ЖабрагIилович хъумуртули ахIен ва мурталра гьануршули бирар. «Замана»-ла рахъхIила хIянчизар П. Кьурбановани гьаман бурули рирар: «Дарган мез жагали дузахъес балути «кьаламла устни», гьарли-марти журналистуни, хIейгеси биалра, даргала бахъал-декIар агара. Илдала лугIилизив бегI гьалав урес вирар ГъазимяхIяммад ЖабрагIилович».
Ишаб бурес гIягIнибиркур, «Замана» газетала юбилей гъамбикIули саби, сабира — 105 дус бирнила. Ил дебали мягIничебси анцIбукь саби, редакцияла ва даргала жамигIятла тарихлизибцунра ахIи, арагIеб республикала тарихлизибра, сенкIун «Замана» республикала газета саби. Ил жагали балкьаахъурли, тамашаласи бухIнабуцличил учIаннис дигахъусили калахъи, гьар жумягIлизиб дурайули, даршлим шел дус мицIирли калахънилизи мягIничебси пай кабихьибтазивад ца сай ГъазимяхIяммад Юсупов.
Илала уршбазивад цали, Арсен ГъазимяхIяммадовичли, дудешла баркьуди даимбариб ва «Замана» газетала бекI редактор ветаур. Илини, хIялалли узули, ЦIудхъурла шилизивадси писатель Гъ.Юсуповла у ахъли бихIули сай.
Сепайда, илцадра «Замана» багьандан уркIи изуси ГъазимяхIяммад ЖабрагIилович, газета 100 дус бирнила юбилей сабаэс ца-чумал дус лерай, нушачивад арякьун.
Дагъистан Республикала урибси хIянчизар, Гьалмагъдешла орденничил шабагъатлаварибси ва дахъал цархIилти грамотаби сархибси Юсупов ГъазимяхIяммад ЖабрагIилович 2015 ибил дусла ноябрь базличив, 74 дусла гIямруличив, декIси изай арухиб. Илала шаласи сипат нушала уркIбазиб даимлис мицIирли кавлан.
ПатIимат Казимова
