Адамлис бяркъ гIямрулизиб бегIлара гIягIнибиркуси секIал саби. СенахIенну ца адамла бяркълизибад дигахъу лебилра кулпетла челябкьлара. Бяркъ лебли биалли илдачила гапбикIар, гIяхIси адамла гIяхIти дурхIни или баркалла балахъа, хIебиалли — мискъилладибиру.
Гьарил секIа сегъуна бехIбихьуд биаллира, илгъуна ахирра бирули бирар.
Гьаннала замана бяркъла дебали мягIничерти масъулти сари, чучира ункъли пикри бяхIчиаэс хIяжатти, сенахIенну девла мягIна гьарилли гIягIниси тяхIярли иргъули ахIен. Хъулирад жярга-зекъ дурасили, илди кадирхьахъес хасдарибти тIакьнази лайдикIули ахIенну, илдала мякьлар урдалтули сари. Бахъал халкь башути мераначиб телефоннизибад гIяшли, цархIилтас диргалахIебухъи, гъайбикIес балули ахIен. Илала дурабадра дурути вайти гъайлара ахир агара. Дурарти скамейкабачи, электричкализирти сиденьебачи кабихьи, цархIилти кабиахъес мер бедлугули ахIен. Чи-биалра ацIибхIелилра, абизесалра пикри агарли, шикьхIебухъи биаркабирар. ГIяйиббаралли, разихIебиркур.
Тамашала хIял-тIабигIят дагьардиубли сари гьаннала халкьла. ЦIахдеш, вайдеш ибти дугьби илдала гIямрулизирад бекIлил деткахъили сари. Нушала чеалкIуси наслула челябкьла сегъуна хIяйчи биркурал буресра бекIлил къиянни саби.
Анжела Мутазова
