«Замана» газеталичил ну цIацIали рархрасунсира 35 дусцад гьалар. Ну хIянчила руцибсира итхIели бекI редакторла къуллукъуни заманалис дузахъуси ГIиса ТIагьировли. ГIур, кIел баз ардякьи гIергъи, газетала редакторли узес вакIибсири Юсупов ГъазимяхIяммад ЖабрагIилович.
Буралли, иличил нуша 25 дусра-сера дарх дузули калунра. Илала бекIдешлиув узес кьадарбиубси адамлис халаси игъбарлизи халбарес вирар, сенахIенну илини сунела хIянчизарти мурталра дигиличил ва хIерудиличил алавбурци. Бузерила гьар бархIи илини нушала уркIила гьав ахъбурци, кабинетлизи ацIили, сегъуна-биалра масхара бурили, нушала уркIби разидарили, арваши.
Чум дус илини газетализиб хIянчи бариб биалра, гьачамалра илини адамла уркIи бамкьеси селра я бурили, я барили гьанхIебиркур. Илцадра гьарилличи чеветаибси, адамла уркIи иргъуси, уркIецIичевси вири ил.
Гьайгьайрагу, коллективлизив шутIни-къунби дарес вализурсира камхIейрар. Нуша-ургабра чумал илдигъунти лебри, чулира илцадра хIяя умуси ГъазимяхIяммад ЖабрагIилович нясварес алавбухъунти. Амма илдала селра бетхIеур. «Мургьи чяртли бакалра, лямцIхIебикIули хIебуар», — бикIар дарганти. Тяп илкьяйда бетаур нушала ГъазимяхIяммадличилра.
Набра илини дебали дахъал гIяхIдешуни дарибти сари. Лерилра илдачила ишаб буресра хIейрар. Тяп набван цархIилти хIянчизартасра илини кумекуни дариб.
«Замана» газетализи рузес ракIибхIейчирад халаси замана арбякьи ахIенри. Рузичилра илала биштIатачилра Ставропольлизи архIяличи дурадухъес чебуркъуб. ИтхIели Чечняла Республикализир дявти дехIдихьибси манзил сабри. Гьалар автобусуни ил республикакад дашутири. Амма чардиэс жумягI дикили гIергъицун сарри бажардидикибти, сенахIенну автобус Дагъистайзи илхIелири чарбируси. Редакторла къуллукъуни заманалис дузахъусини набзи гIярза белкIи, хIянчиличирад аррукьяхъес бурибсири. Ил бархIи редакторла къуллукъличи катурси ГъазимяхIяммад Юсуповли «ДузехIе!» или, нуни бузери даимбарибсири.
ГъазимяхIяммад ЖабрагIиловичли цацахIели дила пикруми дучIули ургар илира гьанбирки. СекIал бурес гьалаб жавабра маслигIятра хIядурли дири. Дила рурси зягIиприкибхIели, ил хъайчикаралтухIели наб барибси кумекра хъумхIертис.
Нуцун базарличир мекълис багаладиэсти гIягIниахълуми исули чераибхIели, «Сарицун Калимат базарличир чераирану, илис кумек хIяжатли бургарну, дукьеная» или бархьибтири илини НурулхIиятра, Раисатра, Луизара. Иличил рарх гIяхIцадхIи рузули калунра, амма цалра вайси гъай бурес хIерирус.
Ну школализир ручIухIели чучила жузазибадцун бакьибти адамтачил редакциялизир тянишрирни гьаналра хIебикиб. Ишаб бузули калунти лебилра пергер адамтири. Гьанна илди нуша-ургаб мицIирли агниличи рирхаэсра къиянни саби. Чула бунагь-хатIа уркадуцабну.
Калимат ГIябдуллаева
