Каспийсклизив ха­ла­ва­иб­си дарган урши ХIя­мид ГIя­либековли акIа­хъуб­си «Ми­цIирси кьалам» бикIуси жагьти ху­дож­никунала сту­дияличила хабар ле­билра улкализиб тIинтI­биубли саби.
ХI.ГIялибековли Каспийскла художественная школа ва Москвала па­чалихъла культурала институт делчIи сай. Гьанна дахъал дусмазив ил Моск­ва­ла областьла Долгопрудный шагьар­лизив хIерирули сай. Илав, сай-вегIси студиялизив, дурхIни сурат­бикIахъес бурсибирули узули сай.
«Наб виштIахIейчивад спорт дигахъусири, боксли виркьусири, азадли мушулвашусири. Дунъя балухIейчивад ну суратикIулра, гьаланачи художественная школализив, гIур илгъуна бяхI­чи­бизличилси институтлизив. Нуни гьала-гьала балули ахIенри дила кIелра гъира — спорт ва суратикIни секьяйда цаладирхъутил. ГIур кьанниван, наб гIяхIбилзути, машгьурти спортс­ментала суратуни дирес вехIихьира. Челябкьлализиб, нуни дирути суратуни халкьлис гIяхIдилзули диъни багьурра. Лерилра дила цIакьани бируси хIян­чилизи кадихьира. Сархибдешуни диахъес багьандан пагьмуцун баибси ахIен, вегIлис се барес дигулил балули виэс гIягIниси саби», — викIули сай ХI.ГIялибеков.
Сунени ахъибси гIямрула гьунчила бурес ил гIела витIикIули ахIен: «СуратикIнила дуравад ну бизнесменра, сиптакарра сайра. Нуни бегIтазирад арц тIалабдирути ахIен­ри, наб хIяжатдиркути харжанас сур­сатуни даргес къайгъибирусири. Ди­ла бехIбихьуд гьалабяхI арбукес ха­ласи къиян кабихьира. Ил шайчиб бекIлибиубси биалли, вегIли бируси хIянчи дигахъни саби».
«МицIирси кьалам»-ла бузери 2015 ибил дусличибад бехIбихьили са­би. Гьаланачи жагьси художникли маш­гьурти спортсментала суратуни ди­рулри. Илини Д.Джонсла ва Ф.Еме­лья­ненкола портретуни суратдариб ва илдала някъбази сунени дедиб. Хабарла спортсментачил гьуниваэс пикрибарили халаси хIянчи барибси­ри. ИтхIели гIядатла уршилис илдачил гьуниваъни ва някъбази чула суратуни дедни ха­ласи сархибдеш сабри.
Гьанна биалли, ХI.ГIялибековли ба­­­рибси нушала улкала Президент В.Пу­­тинна дзюдола тренер А.Рах­лин­на сурат улкала Президентли сунес тIа­лаббарили саби.
Жагьти художникунала бегIла гьалабси халаси хIянчи сабри «Суперспортсмен» бикIуси уличил машгьурти спортсментала гIяхIцад суратуни дарни. Суратуназир гьарилла саби-бегIти сархибдешуни чедаахъилри. Суратуни спортсментасра, халкьлисра, дурхIнасра гIяхIдизур. Спортс­мен­тала суратуназиб дурхIнани чус гIяхIбизурти игитуни бургулри.
Ишдусла Февральличиб «РИА Да­гъис­тан»-низиб бетерхурси гьунибаъниличи рякьунхIели ил чи саял нуни валули ахIенри. Ихтилат таманбиайчи илини дурути духути пикрумани дила пикри битIакIиб ва ил чи саял багьес пикрибарира, — хаслира дарган урши виъни багьур­хIе­ли.
Илини гьанна гIяхIцад дусмазиб «Россия — дила тарих» паркличил барх­­бас кабизахъурли сай. Гьачамцун ахIи, илар суратунала выставкаби дура­дер­кIи­ли сай.
2024 ибил дусла декабрьла ахирличиб «Россия — дила та­рих» парклизиб «МицIирси кьалам» студияла ко­мандали искусствора, спортра цаладяхъибси жагьти художникунала халаси выставка дура­бер­кIиб. Балбуц абхьиб ДР-ла спортла министр Сажид Сажидовли. Илини спортсментала суратуни дирути художникунас баркалла багьахъур ва илдас гьарил шайчирад гьарбизуни далгун.
Выставка ва балбуц гIяхIцад дурхI­нала пагьмурти гьаргдарибсили, устадеш чедаахъибсили, хьулани гьар­­­дизурсили бетаур.
Гьаладихьибтазирад чердикIибти 30 гIяхI­ти­гъунти сурат шабагъатуначи лай­икьдикиб. Илдала ургар арадешлизиб нукьсандеш лебти дурхIнала ва гIу­лухъабала реабилитацияла центр­ли­зибадти дурхIнала суратунира лерри.
Балбуцли культурара, искусствора, спортра цIацIали дархдаси диъни чебаахъиб. Жагьти художникуни сагати сархибдешуначи хьулбиахъуб.
2025 ибил дуслизиб «МицIирси кьалам» студияла художникунани СВО-ла бутIакьянчибала суратуни дирес бехIбихьиб. ГIур илди суратуни ми­цIир­дирули илдазирад комиксуни акIахъуб. Илди хIянчурбазир гьарил ургъанна сай-вегIси дявила гьуни, сархибдешуни, санигIятла ва хасиятла къиликъуни гIячихъли чедаахъили сари. Бургъантала биографиялизи мурхьли кабацIес дигули, художникуни бургъантала гъамтачил гьунибиули саби. Илгъуна пикриличил ХIямид ГIя­ли­беков кIел Гъабзадешла орден сархибси Руслан Примовла нешличил гьуниваиб. Руслай, 2022 ибил дуслизиб, Деревецкая бикIуси шилизиб бахъал дурхIнала хъалибарг челкьути тупала гIярадабазибад берцахъибсири.
«МицIирси кьалам»-ла командала сипта республикала БекI С.Меликовли гIеббуциб. Бургъантала лерилрара-сера суратуни мицIирдиахъубли, илдазирад комиксуни акIахъес пикрибариб. Илди комиксуни чеалкIуси наслулис патриот бяркъ бедес кумекли дирниличи вирхесли саби.
2025 ибил дусла декабрьличиб «МицIирси кьалам»-ла командали сунечир 230 сурат гьаладихьибси «ВОВеки СВОи» уличилси выставка гьалабихьиб. Выставка ибхьнилизир респуб­ликала БекI С.ГI.Меликовли бутIа­кьяндеш дариб. «ХIушала суратуни ВатIайчи дигили дицIили сари, илдазиб уркIила гьаргдеш ва цабалгундеш чебиули саби», — викIулри Сергей ГIялимович балбуцла бутIакьянчибачи ва сиптакартачи дугьаилзули.
«МицIирси кьалам»-ла художникунани С.ГI.Меликовлис чули барибси сурат савгъатбариб.
Суратунала конкурслизиб чедибикибтас савгъатуни, балбуцла сиптакартас пачалихъла шабагъатуни дедиб.
«МицIирси кьалам»-ла команда гьан­на СВО-ла бургъантала ва иги­ту­нала комиксуни, гIур илдазирад мульт­фильмаби дирес даимбиубли са­би. Илди мультфильмаби дурхIнас гIяхI­дил­зули сари. ДурхIнас алкIахъуси искусство бегIлара къиянси ва халаси жав­абкардешла бируси саби. ДурхIни бир­гIя­биргес вируси ахIен. Ил багьандан ху­дожникунани чули бируси хIянчилизи ле­билра уркIи кабирхьули саби.
Мисаллис буралли, Н.Гъазимя­хIям­мадовла сурат ва мультфильм барес багьандан ХI.ГIя­ли­бе­ков илала неш С.ГIисаевачил авна гьуниваиб, ил учIуси училищелизи вякьун, юлдашуначил тянишиуб.
Художникунани гьаланачи чули суратбирути игитуни ункъли багьес къайгъибирули саби гIур илдала сипатуни алкIахъули сари.
Илдани гьанналаур акIахъубли чумал мультфильм лер: республикала БекI С.Меликовличила, Россияла Игитуни Н.ГъазимяхIям­мадов­ли­чила, Т.АбумутIалимовличила, Э.На­би­евличила, чедив гьанушибси Р.При­мовличила, хIябал Гъабзадешла орден сархибси М.Валиховличила ва дявила тухтур Б.Валиевачила. СВО-ла игитуначила мульт­фильмаби дурхIнас дебали гIяхIдилзули сари. ДурхIнас патриот бяркъ бедлугнилизи илдани халаси пай кабирхьули сари.
Дахадаевла районнизибадти дар­ган бегIтала урши ХIямид ГIя­ли­­беков суратикIес дигниличивад ве­­хIихьили, сунезир республикала БекIли, халаси къуллукъла хIян­чи­зар­тани, машгьурти спортсментани, СВО-ла бутIакьянчибани ва игитуна­ни бутIакьяндеш дирути, халати дал­дуцуни хIядурдирнилизир ва ду­ра­дуркI­нилизир бекIдеш дирниличи ва­или сай. Ил гьанналис жагьси урши сай. Илис гьарил шайчир гьарбизуни дул­гулра, гIурра дахъал сархибдешуни диубли дигулра.

Муъминат Хаттаева