Бутрила шилизирадси пагьмучерси учительница Яраева ГIяйшат Минатуллаевна акIубси сари бахъал дурхIначилси хъалибарглизир. ГIяйшатла дудеш МяхIяммад Минатуллаев гIяхIцадхIи хIяйвантала тухтурли узули сай. Неш ПатIимат МяхIяммадовнани хъали-цIала хIянчира бекIдирули, дурхIнас бяркъра бедлугули рири.
9 класс тамандарили гIергъи ГIяйшат Избербаш шагьарлизибси педучилищела художественное отделениелизи карерхурсири.
1993 ибил дуслизиб белчIудира таманбарили, Бутрила шилизибси урга даражала школализир учительницали рузули, сунела бузерила гьуни бехIбихьиб. ИтхIейчирад гьанна 33 дусличи гъамли школализир рузули сари пагьмучерси ГIяйшат.
ГIяйшатли школализир изобразительное искусствола ва технологияла дурсри кадирхьули сари. Ил сунени кабирхьуси дарсличи, искусстволичи дурхIнала диги ва иштяхI акIахъес даим чекарилзули рирар.
ГIяйшатли школала гIямрулизир жигарла бутIакьяндеш дирули сари. Ил жура-журала конкурсуназир, шадлихъуназир ва цархIилтира далдуцуназир бутIакьяндеш дирули, гьаларти мераначи лайикьриркули сари. ГIяйшатли жагати суратунира дирули сари.
Ил районна администрацияла, багьудила управлениела ва школала шайзирад чумал ХIурматла Грамоталичил шабагъатларарибсири.
ГIяйшатли сунела гIямрула вархкья МяхIяммадхIяжичил барх авал урши-рурси абилкьули сари.
ГIяйшатла халалгъуна рурси Гульмирани МяхIячкъала шагьарлизибси Дагъиста пачалихъла культурала ва искусствола колледж таманбарили, пагьмуртала Юртлизир рузули сари. Урши Кьурбан Дагъиста пачалихъла Аграрный университетра таманбарили, бухгалтерли узули сай, рурси Гульнара ручIули сари Избербаш шагьарлизибси педучилищелизир. КIиэсил урши Камал учIули сай Аграрно-экономический колледжлизив.
Гьаннала гIергъира сунела гIямрулизир ва бузерилизир сархибдешуни имцIадикIаб, дурхIнира гIямрула гьунчи дураили, илдани ва илдачибад акIубтани разирирули хIерриэс кьадарбиаб ГIяйшатлис!
С.ГIябдуллаева
