«Нуша кIелра кIел мехIур
Хъайчикадииб дуги –
Лайлатул-Кьадрилаван
Кьудратлали уббухъун:
ВецIал урши-рурсила
Саррагу неш-дудешли.
ХIура нура кIел абдал
Тянишдиубси бархIи –
Неш-ВатIайс инкьилабван
Адабсили уббухъун:
АвцIали дус цахIнар кьацI
Дукулрану дархдалги».
Дила макьалализирти цаибти дугьби нуни Уркухъан МяхIяммадла «ГIяхIгъубзнала риганай» бикIуси жузлизирад касибти сари. Нуни дила белкIлизиб кибси назму, илини сунела хабчаблис багъишлабарили, 15 дус гьалаб белкIунси саби (МяхIяммадла гIямрула рархкья Разият 2010-ибил дуслизир итил дунъяличи аррякьунсири).
Сунела назмулизив поэт викIуливан, Разиятлира МяхIяммадлира «вецIал урши-рурси» абикьурти саби, 8-урши ва 2 — рурси.
Даргала машгьурси поэт Уркухъан МяхIяммад (МяхIяммад-хIяжи ХIусенович МяхIяммадов) акIубси сай 1941 ибил дуслизив Дахадаевла районна Уркухъла шилизив. Ил назмуртала 19 жузла автор сай. Илдала лугIилизир 2 тулкнала ва 2 мавлидунала жузра лер. БахъхIи агарли Дагъиста жузала издательстволизиб Уркухъан МяхIяммадла 20-ибил жузра дурабулхъан.
ИшбархIи нуша даргала поэт Уркухъан МяхIяммадличила ва илала творчестволичила ахIенра гъайдикIути. ИшбархIи нушани, «Замана» газетала хIянчизартани, газетализиб МяхIяммадличил барх илала децI буртIули, нушала мухбирличи бакIибси балагьличила саби буруси.
Августла 24-личив, отпускличи вакIес гьалабси бархIи, Украинализив дявила хасси балбуцлизив яргаласи хъарбаркь таманбируси Уркухъан МяхIяммадла 35 дус виубси урши Шагьнаваз алхунсири. Ил анцIбукь МяхIяммадлис халаси бетахъри сабри. Халаси децI сабри ил Шагьнавазла узби-рузбасра, хьунул Шагьризатлисра, лебилра уркухъантасра ва нушабра. БусягIятра хIерли лебал дудешличи илала хIябал биштIати, урчIемал дус риубси рурси Разият, 6 дус виубси урши Бахтияр ва 4 дус риубси Хадижа. Гьанналис нешли сеналра илдази аргъахъес рирули ахIен, сен илцадра кьаниубсил отпускличи лявкьуси чула дудеш.
Уркухъан МяхIяммадла авал уршили Украинализиб бетурхуси дявила балбуцлизир бутIакьяндеш дирутири. Илдазивад бегIлара серхурси Шагьнаваз сайри. Ил акIубсири Ставропольский крайла Нефтекумскла районна ГIячикъулахъ бикIуси шилизив. Илабси школализир 9 класс делчIунси Шагьнавазли, профтехучилищелизи учIес керхурли, хасси багьуди касибсири. 2009-ибил дуслизив ил гIярмиялизиб къуллукъбарахъес арукиб. ГIяхIдизур диэс Шагьнавазлис гIярмицла гIямру, гIярмиялизиб къуллукъбирнила замана каберхурси ил, вягIда бигьи, Чечнялизиб гIярмиялизиб къуллукъбирули калун…
ХIябцIали дусцадхIи ГIячикъулахълизив хIерируси Уркухъан МяхIяммад (илини илабти бусурмантала лерилра динна масъулти ирзутири) хьунул ребкIили гIергъи сунела халаси хъалибаргличил Сагаси Уркарахълизи гечиубсири.
2012 ибил дуслизив дила макьалала игит Шагьнаваз МяхIяммадов Уркарахъла мякьлабси Бускрила шилизирадси Шагьризат бикIуси рурсиличи хъайчикайиб.
Илдала биштIаси халибарг камси замана хIулкIули хIербирули калун. Амма Шагьнавазли, гIярмиялизиб къуллукъбирни сунела гIямрула баркьуди биъни багьур биэс, 2016 ибил дуслизив, рархьратурли хъулир жагьси хьунул, сагаси вягIда бигьи, ил гIурра гIярмияла къяяназиб къуллукъбарес арякьунсири. Иш яргализиб илини къуллукъбирулри Ростовла областьлизиб.
Цаибси рурси акIубхIели, Шагьнавазли хьунулра сунени къуллукъбируси мерличи аррукиб. Илав акIуб илдала уршира, гIур, кIел дус дикили гIергъи, кIиэсил рурсира.
Шагьнаваз МяхIяммадович МяхIяммадов дявила хасси балбуц бехIбихьибти цаибти бурхIназивал Украинализи арякьун. Нушала улкали ахъли кьиматладариб уркухъан ургъанна гьунарти. ХIукуматли младший лейтенант Шагьнаваз МяхIяммадовлис дедибти шабагъатуни-ургар лер ишди нуни удир гьандуршутира: Верховный главнокомандующий В.В. Путинна Благодарность, медальти «Урехиагардеш багьандан», («За храбрость»), «Гъабзадеш багьандан» («За отвагу»), кIел Гъабзадешла орден (орден Мужества).
Сунела вахъ жявли алхунси муруйчила баянти наб Шагьнавазла хьунул Шагьризатли гибти сари. ГIурра хьарикIулра ну илизи:
— Камси замана биалра хIуша дарх, муруй гIярмиялизиб къуллукъбируси мерличир калунтира. Сегъуна ургъан вирусири хIела мурул? Се бикIи иличила илини руркъути бургъанти ва юлдашуни? Сегъуна мурул ва дудеш вири ил?
— Шагьнавазлис дебали дигахъи сунела хIянчи. Ил вирхусири, гIярмиялизиб къуллукъбирниличибли сунени ВатIайс халаси гIяхIдеш лебхниличи. Мурталра кумекбирусири илини барх бургъантасра. Илди нушачи гIяхIлад башули бири.
Дила муруйс дигахъи сунела хъалибаргра. Наб гьанхIебиркур илини набчи яра биштIатачи тIама ахъбарили. Дебали дигахъи илис нушала биштIати. Амма камли ахIи хIебикиб илис талихIчебси хъалибарглизив хIериэс. Арякьун дявилизи сунечи хъарси чебла ахъес. Ил гьар хъули лявкьухIели, нуша байрамличиван хIерли дирутири. ХIерлири нуша отпускличи лявкьуси иличи августла 25-личирра. ХIекIиб. Илгъуна бурги илала кьисмат.
— Нуни хIела хъубеш дудешлизибад аргъибсири, Шагьнаваз кIина вяхъниличила. Се бурес рируда хIуни иличила?
— БегI гьалав Шагьнаваз Мариупольлизив вяхъибсири. ДекIли вяхъили хьалли, ил госпитальлизив вахъхIи кахIелун: камси заманали сунела частьлизи чариуб. КIинайс ил Марьинкализив 2023 ибил дусла апрельличив вяхъибсири. Камси заманалис хъули вархьибси ил гIурра къалабаикиб сунела частьлизи чарухъес. Ил мурталра сунела юлдашуни лебихIи къалабавикIусири. Нуни бални хIясибли, илала юлдашунира илдигъунтири, дявтази чарбухъес къалабабикIути. Дила мура ихтилатунира дявтазибти юлдашуначила дири. Илини цархIил тяхIярли хIериэс хIебали…
Нуни Шагьризатлис набчил ихтилатбарнилис баркалла багьахъурра. Далгунра илис ва илала хIябалра биштIатас духъянти, талихIчерти гIямрура. ЧевяхIсилизи Уркухъан МяхIяммадла итдилти хIябалра уршира дявтазибад арали чарбухъахъес улгулра.
Тамандиуб дила Уркухъан МяхIяммадла урши Шагьнавазличила дурути. Амма дигахъаси наб къаршиикес цалра илала дявила юлдашличил: багьес дигахъаси наб, селис шабагъатлаварибсирил ил «Гъабзадеш багьандан» медальличил ва Гъабзадешла орденничил. ЧебяхIси ВатIа дергъла замана медаль «Гъабзадеш багьандан» ургъаннис бедлугуси бегIлара ахъси кьиматчебси шабагъат бирусири. Нушала Шагьнавазлира гьарли-марти гъабзадеш чедаахъни багьесли саби.
ХIяжимурад Ражабов
