Сергокъалала районна администрацияла заллизиб даргала машгьурси писатель, прозаик ва драматург УмуряхIил Шапиева акIубхIейчирад l00 дус дикнилис хасбарибси балбуц бетерхур.
Илала гIямруличила, белчIудиличила ва хIянчиличила бурули делкIунти макьалаби лер газетабазир, нуни биалли, юбилейличила къантI-къантIли лукIулра.
Ил, лебил районна байрам сабливан, пергер тIамаличил МяхIяммад Лукьмановли Айдимир Каймаразовли белкIунси «Сергокъалала районна Гимн»–личил бехIбихьиб.
КIинайс цалабикибтас саламла дугьби дурули ва балбуцла мягIничебдешличила иргъахъули гъайрухъун районна «ЦБС» МКУ-ла директор Замира ГIямарова. Илала бекIдешлиуб бузути, «ЦБС» МКУ-ла хIянчизарти Асият ХIяжиевани ва Рашидат Лукьмановани балбуц хIекьли жагали дарган мезли къелгIеббикулри, цалабикибти хIурматла гIяхIли гъайбухъахъес, ва далай-делхъла устнази чула пагьмурти чедаахъес цацали жибирули.
Балбуцличив илкьяйдали гъайухъун районна администрацияла бекIла заместитель Баркакьади Мажидовра. «Тарих агарли, челябкьлара бируси ахIен», –буриб Баркакьади Мажидовли. Илини районна гIяхIгъубзнала гьунартачила, пагьмучебти адамтачила ва хIурматла УмуряхIил Шапиевала сархибдешуначила пахруличил гьанбикахъиб.
Заллизиб каибибтала уркIби шаддиахъуб Салимат Шагьмандаровани зайбухъахъунси «Дила шира, шантира» бикIуси далайли.
Районна дурхIнала пагьмуртала Юртла «Горянки» ансамбльли жагати делхъ чедаахъиб.
Дагъиста писательтала Союзла Правлениела председатель Марина ГIяхIмадовара адамтала гIямрулизиб поэзияла ва прозала кьадриличила, УмуряхIил Шапиевани даргала литературализи кабихьибси пайличила бурули гъайрухъун. Илини цIакьбарили буриб писательтани, поэтунани, литературали, далай-делхъли ва культурали халкь-ургаб уржибдеш, диги, цабалгундеш имцIадирахъути сари или.
Дубурлан хьунул адамличи далдикибти лерил гIяхIтигъунти къиликъуни сунези цаладикибси УмуряхIил Шапиевачила дахъал сарри дурути ил бархIи.
ГI.Батирайла уличилси Даргала театрла гIяртист Мухтар НухIовли, МяхIяммад ХIямидовли Батирайличила белкIунси «Хьаникъада» уркIиличиб бурухIели, лебил шипIбяргIили лехIяхъилри, нушала гьалав Батирай левсиван билзулри.
Филологияла гIилмуртала доктор, профессор Муса БяхIяммадовли дарган мезли юбилей дурабуркIнилис баркалла багьахъур. Сай Москвализира, УмуряхIил Шапиева акIубхIейчирад l00 дус дикнилис хасбарибси байрамличи укьниличила, ил даргала прозализир илкьяйда сабухъчерли лукIес рехIрихьибси цаибил хьунул адам риъниличила буриб.
«Сергокъалала патриотуни» кьукья абхьибси ва илала бузери къелгIеббикуси, У.Шапиевала юбилей дураберкIахъес халаси кумек барибси Индира ХанбяхIяндовани, сунела неш Хамис Мухчиевани писательлис хасбарили белкIунси назму белчIун.
Балбуц жагабариб Хасбулат РяхIмановли, Гьидаят МяхIяммадовани, ХIузаймат Ибрагьимовани, Исрапил ИштIалбяхIяммаевли делчIунти пергер далуйтани. ГIямарла Батирайла уличилси Даргала театрла гIяртистунани балбуц ункъли гIеббуциб. Баркалла биаб чус, мурталра илкьяйдали жигарла бутIакьяндеш дирули дирар гьар даргала балбуцличир. Театрла художественный режиссер Мустапа Ибрагьимовлира писательличил дархдасунти сунела пикруми гьаладихьиб.
УмуряхIил Шапиевала малхIямдеш, духудеш, пасихIкардеш, жагадеш гьандуршули, гъайрухъун Даргала халкьла поэт Аминат ГIябдулманапова. Илини илкьяйдали сунела назмура белчIун.
У.Шапиева акIубхIейчирад l00 дус дикнилис хасбарили, пергер назму белчIун дарганти сунела назмуртачил разибируси Байгинат Кьурбанованира.
Писательличил дархдасунти гьанбикуни гьаладихьиб Ильяс Идзиевли ва лебилра цалабикибти поэтуни-писательтала хIурмат-кьимат дирахъес жибариб. ИшбархIи илцадра авид мискинбиубси замана, жявлил нуша-ургаб агарти, амма даргала литература гьалабяхI башахънилизи халаси пай кабихьибти даргала поэтуни-писательтачила гьаман гьанбиркахъес гIягIнили биъниличила ва нушанира илдачибад мисал кайсниличила буриб.
Дарган мезли дурабулхъуси «Дагъиста хьунул адам» журналла редактор ПатIимат ВяхIидовара, Сергокъалала шантас ванати дезни дурули, У.Шапиева гьанриркахъули гъайрухъун.
«Замана» газетала бекI редактор Салимат ГIялиевани биалли, писательла белкIаначила бурули, «Филлоксера» белчIахъес гьалабихьиб, сунени У.Шапиевас хасбарибси назмура зайбухъахъун.
«Сергокъалала район баракатла ванза саби, ишаб бахъал гIялимти, поэтуни, писательти ва гIяхIгъубзни акIубти саби, илди ванзаличибад арбякьунхIели, верхIцIали азир рангла зубарти аурли нушаб заклизиб ухули саби» — гъайрухъун «Замана» газетала хIянчизар ПатIимат Кьурбанова. Илинира жагаси назму белчIун.
Чинаб даргала балбуц бетурхалра бегIлара жигарла бутIакьяндеш дирули рирар Расул ХIямзатовла уличилси республикала библиотекала хIянчизар Салимат ХIяжиеванира. ХIера, иш яргализибра илини У.Шапиевас хасбарибси балбуц гIеббуциб, жагали гъайрухъун.
Ахирличиб УмуряхIил Шапиевала гъамтани ва юлдашунани балбуц балкьаахъуртас ва гIяхIлас халаси баркалла багьахъур.
Буралли, юбилейла гьунибаънила дазурбазиб, Сергокъалала районна бекIла заместитель Баркакьади Мажидовли балбуц ункъли бетерхахъес кумекбарибти районна администрацияла шайзирадти ХIурматла Грамотабачил шабагъатлабариб.
Даргала поэтуни, писательти, далайчиби, делхъчиби, театрла гIяртистуни, редакциябала хIянчизарти ва дарган девла хIурматбирути адамти, лебил цалабяхъили, нешла мезли юбилей дураберкIниличи дебали уркIи разибиуб. ГIуррара илдигъунти, дарган дев ва дарганти чебяхIбирути шадлихъуни дурадуркIахъес арадеш ва цIакьани имцIадараб чус Кьудратла ВегIли.
Басират ХIяжимурадова
