Гъазила ГIяли — УбяхI Му­леб­­кIила шилизив леб­та­нилра валуси, урхI­ме­шули ахIенти ханжулти дируси уста сай.
Ил акIубси сай УбяхI МулебкIила шилизив хъубзарла хъалибарглизив. ВиштIахIейчирад ГIялини пикри бяхIчииули бири устаханализир дирути хIянчиличи. БахъхIиагарли сайра ил хIянчилизи авархиб.
Дахъал заб дарили гIергъи, Гъазила ГIяли ХьанцIкъаркъа­махьилизи аркьулри. Шилизибси Кьани-шурила уди, катхIел увяхIяхъили, иларад хIяжатти гIянжи-къаркъа дурчи. Илди ункъдарили илини умуси мегь бири. Цугли ца баз арбаши ханжал барес. Ханжа куц дурхъати някьишуначил декIархIебул­хъалра, илала чIумадешличил цугбуцеси селра хIебири.
Гьачам Гъазила ГIяли ханжулти дицес базарличи вякьунсири. Илизир чумал ханжал сарри лерти. Устачи цалра адам гъамирули ахIенри. Базарличив къунзухъунхIели, илини цархIил уста чеваили сай. Ил устанира ханжулти дирцулри. Лебтазилра ил викIулри сунели дирцути ханжулти Гъазила ГIялила сари или. Гъазила ГIяли иличи гъамиуб ва хьарбаиб:
— Ишди гьарли-марли илини дарибти сарив?
— Се суалти сари хIуни хьардиути? ГIе, сари!
ГIялини ханжал асиб, жагали ил халбариб. Бугаси мерличиб илини сунела ханжултази бируси къулбас лебри. Ил замана ГIялини сунела ханжал дурасиб ва гьарли-марли сунела ахIенси ханжал кIел бутIаличи бутIиб. «ХIуни вируд дирес ва дила уличил ханжулти дирцec, эгер илди дубурла мурул адамли сунела ши батахъести диалли», — бурибсири илини.
Илдигъунти чIумати ва дугати дири Гъазила ГIялила ханжулти. 1916 ибил дуслизив вебкIиб илала урши ГIябдурашид. Уршила децIли устара итил дунъяличи арухиб. ДигIянни калун илини ханжулти дирнила тяхIяр-кьяйдара…