Хайдакьла районна адми­нист­рацияла бекI Запир ХIясанов Жавгъатла шилизивадси дявила хасси бал­буцла бутIакьянчи Закарья Ба­жаев­личил гьуниваиб. Гьунибаъниличив районна бекIли З.Бажаев РФ-ла обо­ро­на­ла Ми­­нистерст­вола шай­зибадси «Дя­вила хас­­си бал­буцла бу­тIа­кьянчис» бикIуси ме­даль­личил шаба­гъат­лавариб.
З.ХIясановли ургъан чебяхIси шабагъатличил мубараквирули, илала гъабзадешличила буриб ва дявила хъарбаркь жавабкардешличил бетурхахънилис баркалла ба­гьа­хъур.
«ХIушани дебали мягIничебси ва гьамадли ахIенси хIянчи бирулрая, гъабзадеш ва жавабкардеш дакIудирулрая, хIу­ша­ла гьала тIашдатурти мурадуни кабизалачердешличил тамандирули. Хайдакьла районни Ва­тIайс мардешла ва гъабзадешла гIибрат че­биахъути игитуначи пахрубирули саби. ХIу­шаб чIумаси арадеш, эркинти гIямру ва лерилра бехI­би­хьудуназир сар­хибдешуни дулгулра!» — викIи районна бекI.
Закарья Бажаевли 2023 ибил дуслизиб дявила къуллукъбарес сай-гIяхIъулали вягI­да би­гьунсири ва дявила хасси балбуц ду­ра­бур­кIути мер-мусаличи арякьунсири. Илала гъай хIясибли, илгъуна баркьудиличи ил улка гъармукабазибад батахъес ду­ра­бу­хъунти сунела гъамтала гIибратли гьир­ва­риб­сири.
СВО-лизиб дявила къуллукъ дура­бур­кIуси ман­зилла ухIнав З.Бажаевли гъаб­за­деш ва игитдеш чедаахънилис ил ведомст­во­ла шайзибадси щабагъатличира лайикьи­киб. 2024 ибил дуслизив ургъан хъули чару­хъун.
З.Бажаев шабагъатлаварили гIергъи ил­­­дала гьунибаъни гьаргси ихтилатла тя­хIяр­­­лизиб даимбиуб. СВО-ла бутIа­кьян­чи­ни районна бекIлизи челукьути масъул­та­чила бу­риб ва сунес хIянчила мер бар­га­хъес тила­ди­бариб. Сунела шайзибад З.ХIя­са­нов­ли дявила бутIакьянчис хIяжатси кумек гIеб­баахъес ва баягъи масъала арзес чесиб.