ГIе, тяп илгъуна саби поэтла уркIи, илини сай-алав кадиркутачи сеннира чедихIяртдеш, авараагардеш дакIухIедиру. Поэтла гьар секIайчи уркIи изуси ва кьакьабикIуси саби… Ил багьандан сай ил гьарли-марси поэтла уличи лайикьиркусира.  ИшбархIи хIушачил тянишрарес дигуси поэтесса ПатIимат ГIябдулкеримовара тяп илгъуна сари. Ил Хайдакьла районна Шурагъатла шилизир, 1978 ибил дуслизир акIубси сари.  Илала неш ГIяйшат ГIябдуллаева гIяхIцад дусмазир Хъирхъила шила культурала Юртла директорли рузули калунсири, дудеш Багьаутдин ГIябдулкеримов биалли, бекIливиубси бухгалтерли ва прорабли узусири. ПатIиматла ГIябдулкеримовала 6 узи-рузи леб. Лебилра дурхIнас бегIтани гIяхIси бяркъ бедиб, чебяхIси даражала багьуди касахъиб. Гьанна лебилра чула хIянчила мераначиб бузули саби.

ПатIиматлис риштIахIейчирад поэзия дигусири ва алавси тIабигIятла жагадешли ясирруцибси рурси, назмурти лукIес рехIрихьибсири. БегI гьалаб белкIунси назмуличила гьанбикахъес тиладибарибхIели, ПатIиматли бехIбихьудла школализи рашухIели, классла руководительли уркIиличиб багьахъес бедибси назму беткахъахъили, лебталалра гьалар цIаххIериэс багьандан итмадан назму пикрибарниличила хабар буриб. Назмура игитдешла баркьудличила сабри. Илкьяйдали сунесра хабарагарли ПатIиматли цаибси назму цалабяхъибсири. Илис гIергъи дуцIрумла каникултас сунела учительницани нешлизи Рашид Рашидовла дурхIнас хасдарибти назмуртала жуз бедибсири, ПатIиматлизи белчIахъес или. ХIера, ил белчIунхIели, ПатIиматлис назмурти цаладирхъес дигиаурсири ва иличибли сунезиб пагьму лебни гьаргбиубсири.

Сари акIубси Шурагъатла шилизиб ПатIиматли бехIбихьудла школа таманаиб, илар чедирти классуни агни багьандан ПатIимат сунела узби-рузбачил 9-ибил классличи бикайчи унраличибси ГъирцIикла шилизибси таманахIенси даражала школализи хьурали рашусири. 1993 ибил дуслизир урга даражала школа таманаэс багьандан ил Мажалисла школа-интернатлизи ракIиб. 1995 ибил дуслизиб ПатIиматли районти-ургабси Мажалисла урга даражала школа-интернатлизиб белчIуди хъараахъур. Илис гIергъи ПатIимат ДГУ-ла филологияла факультетлизи урус-дарган мезла отделениелизи карерхур. Илис мурталра дарган мезла дурсри дебали дигахъутири, сунени бузахъуси хайдакьла лугъат къиянси биъниличи хIерхIеили, даргала литературный мез илини ункъси даражаличир, гIяхIил дяркъур. Школализир ручIухIейчирад даргала литературный мезличил гъайрикIусири. ПатIимат нешла мез дяркъес, цархIилтира илди жагати мезличи бурсибарес хьулрикIусири. Илала гъай хIясибли, нешла мезличи диги гьатIира цIакьдарибси сабабли детауртири даргала пагьмучебти поэтунала ва писательтала произведениеби, илдазиб гьаргбируси мезлашалси давла ва жагадеш. Ил багьандан ПатIиматли акьуси замана гIяхIси жузличил буркIусири. Сунес назмурти дигнира ПатIиматли ишкьяйда иргъахъули сари: «УркIилизир алкIути пикруми кагъарлизи делкIасли, халаси кункдеш, паргъатдеш алкIули саби. Сегъуна-биалра анцIбукьли кьакьарарасли, хIелукIес рирули ахIенра». Поэзия уркIилизиб лебси адам кьалли, хIелукIули уэс вируси ахIен.

Сари университетлизир ручIуси замана, ПатIиматлис Дагъиста халкьла писатель МяхIяммад-Расулличил тянишриэс имканбакIибсири. Машгьурси писательли жагьил лукIаннис гIяхIси кьимат кабартурсири ва илизиб лукIес пагьму лебниличила бурили, назмурта лукIахъес жирарибсири. Дагъиста халкьла писатель МяхIяммад-Расулли ПатIиматлис кадирхьути устадешла дурсразир ил назмуртазирти хатIаби чедиахъес, илдази  мурхьси, кагибси мягIна бухIнабурцахъес ва цархIилти лукIнилашалти дигIяндешуначи бурсирарибсири.

ПатIимат ГIябдулкеримовала назмурти «Замана» газетализирра чуйнара дурадухъунти сари. Университетлизиб белчIуди хъараахъурли гIергъи ПатIимат шилизи чаррухъун. Сунела шилизиб бехIбихьудла ахIенси школа агни багьандан, илини 10 дус ВарситIла урга даражала школализир дарган мезла ва литературала, илкьяйдали урус мезла ва литературала дурсри кадирхьули калун. МугIяллимла хIянчи ПатIиматли дигиличил, кагибси уркIиличил, чекаризурли бирусири, суненира бучIахъути дурхIназир нешла мезличи диги-иштяхI адилкьули. Илкьяйдали сари акIубси ВатIайчи, шиличи, халкьличи дигили рицIибси ПатIиматли сагати назмурти лукIутири, амма илди цархIилтази чедаахъес къалабарикIули ахIенри ил. Сунени делкIунти чумал назмура сарира «Замана» газетала редакциялизи кадухили, ракIахъес гьиррарибси сабабли бетаур уркIили гьандуцес хIебиубси кахси анцIбукь. Ил сабри сунени учIахъули калунси дурхIя, Хъирхъила шилизивадси МяхIяммад Жалалутдинович СалихIов СВО-ла майдайчив алхни. Ил кахси хабарличила аргъибси ПатIиматлис ванза кьяшмала уди аркьусиван бизур. ПатIиматла дагьрилизив МяхIяммад секIал балуси, багьудичевси, жигарчевси учIан сайливан кали сай. «МяхIяммад, хIела багьудлуми заяли ардукьяхъес хIейрарну, школалис гIергъи университетлизиб белчIуди даимбарес гIягIнили саби» или ПатIиматли илизи тиладибарибхIели, «Наб военный ветаэс дигулра» или къантIли жаваб чарбалтусири МяхIяммадли. Украинализиб нушала улкали дурабуркIуси дявила хасси балбуц бехIбихьибхIейчивад МяхIяммад СалихIов къуллукъбарес вягIда бигьи, сай гIяхIъулали ила арякьунсири. Гъамливан ил отпускличи вакIес гIягIнисири, бегIтира илис хьунул кариэс хIядурбикIутири. Дявиласи вягIда таманбиубси манзил, МяхIяммадли сунечил барх бургъути бархкьяби бархьбатурли, арукьес хIейрус или, сагадан вягIда къулбасбариб. «Нушалайчил варх чарулхъас» викIулри ил сунела бегIтазира. Амма сепайда, военный ветаэс дигуси МяхIяммадли ВатIан багьандан сунела гIямру кьурбандариб ва даимлис улкалис марси солдатли калун. Илгъуна хумарси, кахси хабарли ПатIиматличи халаси асар бариб. Сунени учIахъули калунси, СВО-лизив алхунси МяхIяммадличила децIли кьакьарарибси ПатIиматли илис багъишлабарили назму белкIун.

ПатIиматла узи МяхIяммад ГIябдулкеримовра СВО-лизив ургъули сай. Иличила нушала газетализибра макьала дурабухъунсири. МяхIяммадли ДГУ-ла исторический факультет хIунтIена дипломличил таманаибси саби, илини военная кафедрализибра белчIуди даимбарибсири ва итхIели дявила къуллукъчи (военный) ветаэс пикрибарибсири. МяхIяммад гьанна 20 дусличивра имцIали виубли сай нушала улкалис дявила къуллукъличив узули. МяхIяммадли Сириялизир, Нагорный Карабахлизир, Чечнялизир ва цархIилти улкназир кадикибти дявилати анцIбукьуназир бутIакьяндеш дирули калунси сай. Дунъяличиб даршудеш кабизахъес ургъуси сунела узис, подполковник МяхIяммад ГIябдулкеримовлисра ПатIиматли назму багъишлабариб. Илдигъунти игитунани саби дунъяличибси даршудеш, халкьла гIямру урехиагардешлизир дихIути.  Бара гьалавван МяхIяммад Гъабзадешла орденничил, ва цархIилти медальтачил шабагъатлавариб. ЧевяхIсини гIеббуцаб ва ара-сагъли калахъаб нушала улка гъармукабазибад балтахъути ПатIиматла узигъунти гIяхIгъубзни!

П.Сулайбанова