Лерилра багьудлумира цIакьанира харждирули, ибкьли узусилис лайикьси кьимат кабатни дигеси саби. Илкьяйдали хIялалдешличил хIербирути адамти шабагъатуни багьандан бузули хIебиалра, улкалира республикалира пикрила дураб балтути ахIен. Илкьяйдали бурес вирар Дахадаевла районна ГIяхIмадхан Абу-Бакарла уличилси Уркухъла дахъал шаликарси гимназияла, бехIбихьудла классунала мугIяллим Раисат МяхIяммадовнала бузери республикала БекIли ахъли кьиматлабарниличила.
Ил районна бекI МяхIяммад ГIябдулкьадировлира мубаракрариб:
«ХIурматла Раисат МяхIяммадовна, районна лебилра жамигIятла ва администрацияла шайзирадли уркIи-уркIиларадли мубаракрарес дигулра, хIед ДР-ла рурибси учительла у гибниличил бархбасахъи. Ил ахъси шабагъатли бурули саби нушала дурхIни багьудичебтили халабаахъес багьандан хIуни кабирхьуси зурбаси пайличила. ХIела устадеш, сабур ва санигIятлис мардеш цархIилти мугIяллимтас гIибратли детаурли сари. ХIела сабухъчебси бузерилис багьа абаахъес хIейрар. ХIугъунти педагогуни лебниличи нушани пахрубирулра.
ХIед къаркъагъуна арадеш, талихI ва хIела багаласи баркьудилизир мурталра творчестволашалти гьарбизуни дулгулра».
Дахадаевла районна администрацияла пресс-служба
