ДяхI шалали, уркIи гьаргли хIербирути МяхIяммад Лукьманов ва Надежда Федоровна Ахъушала шилизиб халаси хIурматличил пайдалабикIули саби. Илди гьалабван хъалибаргла БархIила хIурматлис районна культурала КIялгIялизиб дурабуркIуси шадлихъличи жидарибти хъалибаргуни-ургаб Лукьмановхъала хъалибаргра лебри.
Чумал бархIи гьалаб районна администрациялизиб бетерхурси совещаниеличиб районна бекIла заместитель Эльвира ХIясанхIусейновани бурибсири:
– МяхIяммад Лукьманов районна зилан уили сай – ишди бурхIназив ил 90 дус виубли сай. Иличи гьардакIес, шалгIеббухъунси хъалибаргла БархIиличил ва сай акIубси бархIиличил мубаракварес хIяжатли саби.
Илгъуна мурадличил, ил хъалибаргличи гьаббакIиб Эльвира ХIясанхIусейнова, соцзащитала управлениела хIянчизар Барият ГIисаева ва багьахънибала политикала управлениела начальникла заместитель Ислам МяхIяммадов.
МяхIяммад ГIялиевичли, дахъал дусмазив жавабла къуллукъуначив узули, чебетаибси хIянчи бариб. Узули калун школала директорли, ЦБС-ла директорли, культурала управлениела начальникли. 25 дус узули калун багьудила учреждениебазив, 29 дус — культурала учреждениебазив.
Надежда Фёдоровна 1960 ибил дуслизир, Курск шагьарлизибси пединститут таманбарили гIергъи, Дагъистайзи рузахъес рархьибсири. ИлхIейчирад хIеррирули сари Ахъушала шилизир ил.
Чучи бакIибти гIяхIлас илди разили гьунибаиб, чула гIямрулизир диубти анцIбукьуначила хабурти дуриб, гIяхIси бузери багьандан чус дедибти шабагъатуни, суратунала альбомти чедаахъиб.
Гьар мерличив чекайзурли, гIяйиб–хатIализи хIейкили узес бажардиикиб М.Лукьманов. Ил культурала управлениела начальникли узуси замана – 1990 ибти -дусми халкьлис къияндухъунти, гIядатла адамтас разидеш камси манзил сабри. Илини шимазир жура-журала конкурсуни, смотрти дурадуркIули, адамтас разидеш бихусири.
«Нушаб халаси разидеш саби М.Лукьмановла хIунтIена «Нива» сирхIяла мер-мусаличиб дакIубухъалли!» – бикIутири сирхIянти. УркIи-хIяллизиб балгунти, разидеш дигути сирхIянти-ургаб далай-делхъла устни бахъал лебти саби.
Гьанбиркур гьачам Хъулиямахьилизи дураберкIибси архIя. Апрель баз сабри, Ахъушаб аргъ бамкьурлири, ТIантIала шилизи адаибхIели – забли ургьулри, сирхIязиб – дяхIили. Аргъ сегъуна биалра, иличи хIерхIеили, алавчарти шимазибад Хъулиямахьилизи фестивальличи бахъал адамти учибикиб, культурала учреждениебала хIянчизартани чула пагьмурти чедаахъиб.
Фестиваль таманбиубли гIергъира шадлихъла бутIакьянчиби булхъули, далайбикIули, музыкантуни бархьиули ахIенри. «МяхIяммад ГIялиевич, тIашаэс замана баили ахIену?» – иб Хамис ШяхIбановани, – итхIели ил районна бекIла заместитель сарри. «Адамтас бахъ разидеш дигулигу, Хамис ГIябдуряхIмановна, буаб цакамси замана гьатIи».
Ахирра нуша дурадухъунхIели, дураб дяхIила халаси къат учибикилри. Гъуцибургачи черяхIяхъибхIели, гIелабад лябкьули лебси автоклубла шала чехIебиули, МяхIяммад кьакьавикIескайиб.
– Чардиубли, хIерэс гIягIнили саби! – иб илини.
– Гьуя, иш мерличиб машина ласбарес вирару – гьунила дубра чебиули хIебиалли. Илкьяйдали гъайдикIути нушачира пикри бяхIчихIеили, МяхIяммадли кункли, нуша шакра хIедикахъили машина ласбариб ва чардиубли дубурличирад уряхIяхъибхIели, дяхIилизибад чебяхIяхъес хIебирули автоклуб баргира.
– Ишди хIянчизарти багьандан нуни жаваб бедлугуси саби, илди гIелаб батурли арукьес вирусирав? – иб МяхIяммадли ва Камаз машинала вегIлис гIергъи бархьиб. Камазла вегI вакIиб ва автоклуб сунела машинализи бигьи, МяхIяммадли тиладибарибхIели, ТIантIала шилизи абаайчи гьуниббатур. Шимазиб яра, районна дураб балбуц бетерхурхIели, М.Лукьмановли лебилра хIянчизарти чула хъали-хъайгIи биахъутири ва илгъуна баркьудила вегI начальникла, гьайгьайрагу, хIянчизартани халаси хIурмат бирусири ва гьаннара бирули саби.
Надежда Федоровнанира школализиб 55 дус хIянчи бариб. КIилилра касили саби хIурматла умира, грамотабира. Илди дурхIнала дурхIнани разибирахъули бирар.
Лукьмановхъала хъулиб бетерхурси гьунибаъниличир Эльвира КьурбанисмягIиловнани МяхIяммад ГIялиевичлис ва Надежда Федоровнас гIяхIти гъай дуриб. Илди ара-сагъли, цали цала уркIи иргъули, дурхIнани ва илдала баркьибтани хIерудиличил гIеббуцили хIербирули дигни аргъахъиб. ИмцIадикIаб илдигъунти гIяхIти адамтала гIямрулизир разити бурхIни!
П.Маллаева
