1979 ибил дуслизиб дурабухъунси «Москва слезам не верит» бикIуси фильм СССР-ла улкала премияличи лайикьбикибсири. 90 миллион адам иличи хIербикIес бякьунтири. Ил кинофильмлис ули детаурти гъай гьаннара дуркьдиубли ахIен, Москвацун ахIи лебилра дунъяра «нургъбачи бирхули ахIен».
Бирхули ахIен дунъя Афганистайзирти балагь- кьадарличи, Иракьла халкь цабехIли-цабехI къирбирниличи, Гъазала дурхIнала бисаличи, Кубала халкьличи дяхIчиаибти къияндешуначи, ишбархIи Иранна халкьличи дяхIчиаибти гуж-зулмуличи. Илди нуни гьандушибтира дахъал цархIилтира мер-мусаличиб дунъя цIакьличи бирхули саби. Цаличибад цархIилти чедибикес багьандан бургъули зулмукартани хIила ва нургъбала хIуркIби кадулхъахъули сари. Илди чилилра чехIедаили кавлули сари, чебиути чедибикибти саби.
Чузиб демократия чедибикибти сарра или гапдикIути Европала улкни селизилра агарти питнакартала улкни детаурли сари. Питнакарти ахIену гьатIи илди, илданикIун чули ярагъра дедлугули Украинала халкь Россияличил бургъахъес гьирбирули саби. Илдас сегъуналра авара агара улхути жагьти уршбала, илдала цIуръабирути дурхIнала бисала ва нургъбала. Илди бикIули саби: «Нуша хIердикIехIе дергъла майдайчив чи чедииркурал». ХIера, илкьяйда чедиикибсиличицун бирхули саби дунъя.
Дунъяла вайнукьабасра саби чедибикни баили саби, чедиикни сецад заманала биалра. Гьарли-марли дунъя Аллагьла уркIецIиличиб, ряхIмуличиб, бархьдешличиб бузуси саби.
ИшбархIи Россиялис цIакь дебали хIяжатли саби, Дунъяла ва Европала капиталистунас бархьдешличил селра аргъахъес вирули ахIен. Бархьли буралли, гьачамалра цIакьличил ахIи селра аргъахъес вируси ахIенри. Россияли сунела цIакь гьачамцун ахIи чебаахъибси саби, амма иличила Европали бахъ жявли хъумуртули саби. Илдани тарихла баянтира хIедалутала гIердирули саби. «Украина — Европа саби», — бикIесра бирули саби. ГIярасайкIун, «Киевская Русь»-личибад бехIбихьибси саби.
ИшбархIира улхути уршбачи, баргудахъуси дунъяличи Европала хIякимтала сегъуналра уркIецIи агара, я дургъби тамандарес пикри агара.
Бирхауди цIакьличи саби лебси, ишбархIила цIакь биалли технологиябазибад дигахъули саби.
ГIергъити акьути бурхIназиб США-ла президент Д.Трампли сунела вакилти, сай-гIяхIъулали, нушала улкала Президент В.Путинничи, гIур Украинала президент В.Зеленскийличи, даршудеш кабизахъес 24 сягIят чедаахъили бархьили сай. Секьяйда духубиубли капиталистуни, яра Америкала президент или хьарбаадалли, ахъси космослизир, Украинала чедир Россияла сагати спутникуни дакIудиубли сари. Россияла гьарил игьубси хIярхIя чебхIебалкIи сунес хасбарибси мерличи чейгули саби.
Рирхес дигулра Россияла технологиябала цIакь чедибиркниличи, гъамливан Украиналичилси дазуличиб даршудеш кабилзахъниличи.
Дунъя цIакьличи бирхули саби, нургъбачи бекIлил бирхули ахIен.

Муъминат Хаттаева