Наб гьанна урхIмешуахIенси, сунечицун хасси бяхIчибизличил лукIуси писательличила, гIядатла адамли аргъесли хIукмурти шурдалтуси тилмажличила, халадеш, хамдеш агарси, биштIтачил ва халатачил гъай дургуси пергер адамличила, сунела хIянчи чебетаахъили бируси бекI редакторличила белкIес дигулра. Илала лерилра къиликъуначила ва гIяхIти баркьудлумачила лукIалли, абзурли газетара хIебиур.
Ну газетализир гьанна 13 дус рузулра. ХIянчила кариэс гьалар газетализиб хIянчи лебал-агарал хьарбаахъес дудешли рархьибсири. 8-ибил дерхIличи арацIибси наб ГъазимяхIяммад ЖабрагIилович къаршиикиб. Ил дяхI шалали гьуниваиб ва малхIямли гъайухъун. Халаси ахIенси белкI дарган мезличи шурбатахъес хъарбарили, гъамси заманаличир редакциялизи жирирурину, дудешлизи балахъасну, рукьен или рархьира.
Нуни ил савли-жявли сут ва алхIят бурхIназивра хIянчила аркьули чевиули рираси. ГъазимяхIяммад Юсупов нуша хIердируси юртла мякьлабси 9 дерхIла юртлизив хIерирусири. Амма камси биалра манзил ил машгьурси адамла бекIдешлиур рузес кьадарбирар или гьанбиркуси ахIенри.
Хъули ГъазимяхIяммадла хъарбаркьличил чарриубхIели, дудешли зянкъдяхъиб ва хьархъардаиб. Нуни дудешлизи ну хIянчила руцишара или ташмишрикIули бурира. Дудешли ил бурибси гъайлис къянахIейруси адам сайну, хIези гибси материал шурбатурли, кабихьа или аргъахъиб. Камси замана дикили гIергъи, редакциялизи хIянчила раши или набчи зянкъ дакIиб. ИлхIели ит замана сагати хабуртала отделла редакторли рузуси Салиматличи арацIира. Ил наб мурталра нуни ралуси тяниш кьяйдали жагали гъайрикIули гьунираиб. АрацIира бекI редакторла заместительла кабинетлизи. Ила рухIнарулхъунхIели, кабинетла унзализиб Юсупов Арсен ГъазимяхIяммадович ибси белкI чебаира. Амма ил ГъазимяхIяммад ЖабрагIиловичла урши виъниличи шакхIерикира. Арсен Юсуповли сарри ну хIянчила руцибси. ИлхIейчибад бехIкабихьиб «Замана» газетализиб дила бузери.
ГъазимяхIяммад ЖабрагIиловичли нуша жагьилти хIянчизартас даимлис уркIилизир калести, бузерилизир багаладиэсти насихIятуни дури. «Къиянбухъунси биалли, мурталра дугьадилзеная», — викIи.
Гьанна бекI редакторла заместительли рузуси ПатIимат Сулайбановара, нура, ГIялим ГIязизовра ца бархIилизир хIянчила дуцибтири. Нуни дила игъбарлизи халбирулра халаси замана хIебиалра ГъазимяхIяммад Юсуповличил рузес бикни. СенахIенну илини дурути насихIятуни наб хъумхIертести гIямрула дурсрили детаур. Ил редакцияла хIянчизартачил, цацабехIтачил дудеш кьяйдали, цархIилтачил узи кьяйдали, биштIатачил хала дудешван вири. Ил сунени адамдеш, адаб-хIяя чихъли дихуси, цалра адамлис хIейгибизеси къиликъ агарси пергер адам сайри.
Адамдеш, адаб-хIяя
Даим чихъли дихуси,
Сай-алавтас мурталра
Кумекбарес хIядурси.
Жагьилтас насихIятчи,
ЦархIилтас вири къакъбяхъ,
Сунечи ацIибсила
Бири гьалакли мурад.
Мурхьти мягIналичилти
ХIядурдири белкIани,
Газетала цалра бяхI
ХIебалти хIерхIеили.
«Замана»-лисра хIуни
ГIяхIцад гIямру харждарри,
Гьаркьятала къяйлизи
Газета дураади.
Даргантала уркIбазир
Даимлис мер баргири,
Гьалжанала анхълизи
ЧевяхIсини катаби.
«Замана»-ла къушумли
ХIела ура хъумхIерту,
Жузазиб, белкIаназиб
Даимлис минабиру.
Раисат МуртузагIялиева
