Палестинализир кадикибти анцIбукьунала манзил 2023 ибил дуслизиб Гъазализибад гечбарибти 200-личибра имцIали адам Да­гъистайзи бакIибтири.
Илдазибад байхъала биштIати саби. Илди Мя­хIяч­­кълала мякьлабси санаторийлизиб мерлабариб, палтар-кьяшличил, хурегличил, техникаличил ва телефонтачил гIеббуциб. ДурхIнас муридешуни ва сав­гъа­туни дедиб. ИтхIейчибад илди илаб хIер­би­рули са­би. Илдани халаси баркалла балахъули саби ну­ша­ла улкала Президентлис ва дагъистанлантас саби гIеб­буцнилис. Илдазибад имцIатигъунти тухтурти ва ин­женерти саби, сабира гьаларти дусмазиб нушала ул­кализиб багьуди кайсули калунти. Илдала кьисмат ме­шуси саби. Илди гьар секIал агарли калун – юртани, гъамти, юлдашуни. ГIядатла гIямру дявиличи шурдухъун. ГIярабунала хъалибаргуназиб бахъал биштIати леб­ хIябличибад бехIбихьили шуличи ва имцIалира бикайчи. Илди хIербируси санаторийлизир лерилра шуртIри акIахъубли сари ва бархIилис хIяйна буцIарси хурегли балхули саби. БиштIати дурхIнала унхърази ва школабази башути саби. Халати биалли хIянчиличил гIеббуцили саби. Илдани чеимцIаси багьуди кайсули саби медицинала бузери бузахъес хIяжатти документуни касесли. Илкьяйдали урус мезличи руркъули саби.
Дагъистайзиб хIербирути имцIатигъунти сани­гIятличи ункъли бегIбиубти тухтурти саби, Санкт-Петербурглизиб, Волгоградлизиб, Астраханьнизиб ва цархIилтира шагьуртазиб багьуди касибти.
Наб ца илгъуна палестиналанничил тянишриэс кьадарбиуб. Ил сай Муса Ихаб – тухтур-пси­хо­нев­ролог медицинала гIилмуртала кандидат, бу­ся­гIятла замана Мя­хIяч­къа­лализибси клиникализив узуси.
— Секьяйда кьасбарибсири хIушани Дагъистайзи дакIес?
— Адамти гечбарес «гуманитарный коридор абхьибхIели» Россияла Федерацияла посольстволи кумекбарибсири нуша гечдарес. Нушала хъали тIутIубиуб бомбабауб ва дила узбира гъамтира алхун. Ну узуси больницализирра калунра, амма больницара ракетабала бя­хъянау бикиб. Дазуличирад ляркьухIели набзи хьарбаиб чина аркьуси­ри или, нуни бурира Да­гъис­тайзи или, хIебалас ит­хIе­ли севан илкьяйдали бу­рес гьанбикибал. Нуша пашманхIедиубра Дагъистайзи дакIниличи.
— Больницализибси хIела бузериличила се ­бурида?
— Ну Гъазализив узу­хIе­ли, дила ну-вегIси мето­ди­ка пайдалабирусири, зягIиптас кумекбирнила: биш­тIатала ДЦП-ла, биштIатала ва халатала психологияла, хIял чебашнила, биштIатала дагьрила даржа гьалабяхI башни тIашбизнила шайчибси ва цар­хIил­тира излуми сагъдарес кумекбируси. Ил тяхIяр ишабра бузахъулра, зягIипти ишабра бахъал саби, хаслира биштIати-ургаб. Илдас кумекбарес къайгъилизивра. Цазаманализир урус мезра руркъулра гIя­хIил дагьес багьандан.
— ХIушачибти зягIиптала ва ишабтала декIар­деш лебу?
— Халаси-декIар барсдеш чебиули ахIенра, излумира цагъунти лер, илди белгидирнира мешутили дирули сари. Амма ишаб зягIипти биштIати бахъал лебтиван билзули саби, гьачамлис бурес къиянни саби ил анцIбукь селичил бархбасунсил.
— Ишаб хIуни балути лебтирив?
— ГIе, нуни ишав гьалав валуси дила юлдаш варгира, дагъистанлан. Ил наб узиван кайзур, халаси кумек бариб, гIеввуцира. Нуша кIелра дебали разидиубра къаршидикниличи ва бусягIятра бархбасуни дузахъулра. Нуша гIяхIли кьяйдали кьабулдарес гьарил юртлизибра бархли хIядурли биъниличи халаси разидеш леб. Нуша думсули ахIенра хIушала республикалис ва улкалис баркалла дикIес нуша дерцахънилис. Ил секIал гIямрулизиб мурталра хъумхIертеси саби, ва чинабалра гIибратли биэси.
— ХIянчи баргес къияндешуни акIубу?
— Ну Россиялизив учIули кални багьандан ва мез далнила гIяхIдешличибли халаси-декIар къияндеш аги. Нушаб бузерила ва медицинала шайчирти Министерствобани кумекбариб санигIят хIясибли хIянчиличи кадатес. Нушани ишарти сертификатуни касес багьандан, имтихIянтира дуцира, санигIятлашалси устадеш чедаахъира. Дила бузерила стаж камси ахIен, имцIаливан неврология-психиатрияшалти саби, психиатрияла шайчивси медицинала гIилмуртала кандидатла у лебси саби.
— СецадхIи ишар калес кьас леба?
— Белгиси замана бурес къиянни саби. Гъазализир ва алавти мер-мусаличир гьаларра гьар 2-3 дусла духIнар дявти детурхутири. БусягIятла манзилла дявила тяхIяр декIарси саби, ил дакIу-гьаргли дурабуркIуси халкь къирбирнила балбуц саби. Амма нуша дирхулра, гьайгьайрагу, дургъби тамандирниличи ва нушаб дигахъахIери нушала ванзаличи чардухъес, алхунти нушала гъамтала хIили иркибси биалра… Ишабси мер, аргъ-гьава ва урхьула дуб Гъазализибсиличи мешусиван билзули саби, ва хъулиб кьяйдали урехиагнили ряхIятдеш алкIахъули саби, мякьлар мижитунира лер. Амма бегIлара мягIничебси адамтала гIяхIялдеш ва уркIи гьаргдеш саби. Биалра, нушала кьас саби хъули чардухъес ишар гIяхIцадхIи хIердиэс кьадарбиалра...
Баркалла, Муса, ихтилатлис. Нуша биалли даим дулгулра ва гьархIели балга-дугIя дирулра хIушала ванзаличиб ЧевяхIси Кьудратла ВегIла ариличил даршудеш кабизахъес ва хIуша ванзаличи чардухъахъес кьадарбиаб или.
Гьайгьайрагу, Муса Ихабли бурни хIясибли, ишабти халкь гIяхIти ва гIяхIялдеш дарес балути саби, уркIи иргъути ва палестиналантас ишаб хIербиэс, бузес ва дин бузахъесра бархли гьамадли саби. Амма гьарил адамлис чула саби акIубси ВатIан дигахъу, ил сегъуна-биалра, ва даим иличи уркIи гьуцIбикIар.