Арбякьунси жумягIлизиб ГI.Ба­ти­райла уличилси Дар­гала театр­лизиб Дагъиста халкь­ла писатель МяхIяммад-Расул Ра­су­лов акIуб­­­­хIейчирад 90 дус дик­нилис хас­ба­­­рибси балбуц бетерхур. Ши­ма­зи­бад, ша­гьуртазибад, гьарахъти мер-му­са­ли­чи­бад бакIибти даргала ва рес­пуб­ли­кала ин­теллигенцияла вакилти, бал­буц­ли­чи ца­ла­би­килри.
Даргала театрла жагали балкьаахъурси жаняхIлизиб, бегIлара хIурматла мерличи баршибси МяхIяммад-Расулла суратла мякьлаб, гIярбукIла устнани дарибти матяхIла выставка гьалабихьилри.
Даргала театрлизиб МяхIяммад-Расулла сурат даимлис баршибси саби, даргала литературалис хьулчи кабихьибти, цаибти писательтала къяяназивадси сайхIели, кубачилантани даим ил гьаниркахъу ва хIурматбиру гьарли- марси гIярбукIан сайхIели, илини даргала литературализи, культурализи мекелли халаси пай кабихьибхIели. Сунела халкьла пикруми ва гIядатуни (ментальность) сари лертиван яра гьатIира жагали чедаахъес илала пагьмура, устадешра, бузериличи дигира даибхIели.
Машгьурси писатель гьаниркахъули ва илала хIурматбирули шила администрацияла бекI Расул Куртаев бекIливиубли, кубачилантала халаси кьукьяли балбуцлизир бутIакьяндеш дирулри.
ИшбархIи гьанбушес чебиркур, Дагъиста халкьла писательти ГIяхIмадхан Абу-Бакарли, МяхIяммад-Расул Расуловли, Дагъиста халкьла поэт Сулайбан Рабадановли (илдала хIяблалра суратуни даргала театрла жаняхIлизи, хIурматличил даршили сари) Уркухъла урга даражала школализиб багьуди касибси биъниличила. Гьайгьайрагу Уркарахъиб касибси багьудили ва бяркъли илдала пагьмуличи асар хIебарили кахIелун. ИтхIели урга даражала багьуди Уркухъла школализиб районна лерилрара-сера шимазибадти дурхIнани кайсусири. ЦабехIли цабехIла хасиятуначи, пикрумачи илдани асарбирусири. Иличибли биэсра асубирар, МяхIяммад-Расулла белкIаназир ца сай акIубси ГIярбукIла шилацун ахIи, лебил даргантала ва дагъистанлантала сипатуни ва хасиятуни даргес вирули сай.
Балбуцличи Уркарахъибадра бакIилри районна администрацияла ва культурала отделла хIянчизартала халаси кьукья.
Мурталра даргала театрличил бархбас къябхIевдахъуси «Замана» газетала хIян­чизартани, М.А.Колюбакина бекI­ли­риубли, Дагъиста писательтала Союзла вакилтани, писательтала даргала секциялис бекIдеш дируси, ДГУ-ла профессор М.Р.БяхIяммадовли, гьаннала замана прозализиб, поэзиялизиб бузути «Даргала анкъи» бикIуси жамигIятла организацияла вакилтани, гIяхIцад литература дигутани, писательла гъамтани, тухумтани, шантани балбуцлизир бутIакьяндеш дирулри.
Мурталраван шалати дяхIличил, бизити чяйличил, муридешуначил бакIибти гIяхIлас театрла хIянчизарти гьунибиулри.
Балбуц абхьиб театрла бекIливиубси режиссер М.ГI.Ибрагьимовли.
Халкьла писатель гьаниркахъули даргала театрли бакIибтас давлачебси програм­ма гьалабихьиб.
МяхIяммад-Расул литературализив узес вехIирхьухIели, гьаланачи назмурти лу­­­кIу­­­тири.
Илала назмурти театрла гIяртистунани ур­кIиличир делчIун, далуйти ­зайдухъахъун, МяхIяммад-Расулли делкIунти пьесаби хIясибли кадихьибти спектакльтазирадти бутIни чедаахъиб. ХIербикIутани илди хIур­матличил кьабулдариб.
Балбуцличи бакIибтала уркIби разидариб Х.РяхIмановли, М.Лукьмановли, ХI.Иб­ра­­гьимовани, А.ХIясановли, С.Шагьман­да­ровани ва цархIилтира даргала театрла гIяртистунани делчIунти далуйтани.
Илаб гъайбухъунти М.А.Колюбакина, М.Р.БяхIяммадов, халкьла писательли, нушаб букьурли батурси давлачебси литератураличила гъайбикIулри. С.Стальскийла премияличи лайикьбикибси «БекIбяхъ», «Диванчиби чихъали саби», «Дигай дихьес ца бархIи гьалаб» бикIути ва цархIилтира повестуначила, «Чамкур» бикIуси дурхIнас хасбарибси, бегI гьаларти хабуртала жузличила, «УрхIла мурул» бикIуси романничила, цархIилтира писательли нушаб гIелар датурти дахъал произведениебачила илдани чула пикруми дурулри.
Писательла пагьмуличила чула пикруми дурули гъайбухъун Дахадаевла районна администрацияла бекI М. А.ГIяб­дул­кьа­ди­ров ва Кубачила шила администрацияла бекI Р.Куртаев.
Балбуцла ахирличир, гIярбукIла палтарли регIриубли, гIярбукIла мезли далуйти делчIун З.Алтаевани.
Балбуцличи цалабикибтас баркалла балахъули гъайрухъун Дагъистан Респуб­ликала искусствола рурибси хIянчизар, МяхIяммад-Расулла тухум А.Б.Батырова.
Мурталраван, балбуцла ахирличиб даргала гимн зайбухъун. Чула миллатла хIур­матбирули, гимн лебилра тIаш­ка­би­зурли белчIун.