Ишди бурхIназиб муниципалитетла руководитель МяхIяммад ГIябдулкьадировла бекIдешлиуб бузерила архIяличил ДугIахъарла шилизи районна администрацияла хIянчизарти гIяхIладли бякьун. Ярагъладарибти ЦIакьаназиб вягIда хIясибли къуллукъбирнила масъала ахъбуцили, илди шила жамигIятличил гьунибаиб.
Балбуцлизир бутIакьяндеш дариб районна бекIла заместитель ГIялисултIан МяхIяммадовли, бухIнабси политикала отделла начальник ГIябдурашид Бибулатовли, «ДугIахъар» шила советла бекI МяхIяммад Адамовли.
Цалабикибтачи саламтачил дугьавизурли гIергъи, МяхIяммад ГIябдулкьадировли баянти гьаладихьиб, ДР-ла БекI Сергей Меликовла сипта хIясибли, ВатIайс вягIда хIясибли къуллукъбирутас регионнизир дирути гIяхIдешунала ва дедлугути арцла шайчирти дарсдешуначила. Илини бурни хIясибли, вягIда хIясибли ВатIайс къуллукъбирусилис федеральный бюджетлизирадли 400 азир къуруш дедлугути сари, регионнизир ДР-ла бекI Сергей Меликовла шайзирадли – 500 азир къуруш, муниципалитетлизир МР-ла бекIла шайзирадли 100 азир къуруш дедлугути сари. Ургъанна алапа биалли 204 азир къурушличи абиркули саби. Сай гIяхIъулали Россияла Федерацияла Ярагъладарибти ЦIакьаназиб къуллукъбарес аркьусини ца базла духIнар илкьяйдали 1200000 къуруш арцла кайсути сари.
Пачалихъли ургъан гIевурцниличила бурули, гъайухъун ГIябдурашид Бибулатов.
«ВягIда хIясибли къуллукъбирни ургъаннис мягIничебси баркьуди саби. Ил секIайчила адамтази багьахъесра нушачи хъарси саби», — викIи ил.
Илини илкьяйдали ургъаннис чедетиахъути лерилра кункдешуначил пайдалавикIес багьандан, Дахадаевла ва Хайдакьла районтала дявила (отбора) пунктлизи дугьавизес хIяжатли биъниличила аргъахъиб.
ГIур гъайухъунси ГIялисултIан МяхIяммадовли багьахъур вягIда хIясибли ВатIайс къуллукъбирусини суненицунра ахIи, илала хъалибаргра гьарил секIайзибад пачалихъли гIеббурцниличила аргъахъиб. Илдигъунти кумекла бетуцуназирад сари кредитла шайчирти масъулти бекIдирнила, лебдешлис бедлугуси налоглизивад акьувалтнила, вегIли бузахъуси санигIят даимбарес имканти алкIахънила, сегъуна- дигара вузлизи матъал квота декIардирнила, яргаличи кахIебизурли хьалли, биштIати дурхIнала ахълизи кьабулбирнила ва цархIилтира.
Илав гъайухъун илкьяйдали «ДугIахъар» шила советла бекI МяхIяммад Адамовра. Илини буриб Россияла Федерацияла Ярагъладарибти ЦIакьаназиб вягIда хIясибли къуллукъбирниличила халкьлизи дархьти баянти гьаладихьес хIяжатли биъниличила.
Дахадаевла районна администрацияла пресс-служба
