Гьалабван Новоси­бирск шагьарлизиб июньна 16-21-ибти бурхI­назиб дурабер­кIиб­си декIси ат­летикала шайчибси Рос­сияла чемпионатличила багьахъур­си­ри.

Штанга ахъбуцес диганти дагъисталантас ишаб разибикеси сабаб леб. Нушала республикализибадти спортсментани илди абзаначир верхIел медаль сархиб, илдазирад хIябал мургьила, авал — жармала. Спорт дигахъан адам сайливан, ну Интернетлизиб илди абзаначила баянти даргес къяйцIухъунра ва Ханты-Мансийский автономный округлис дуравхъунси, нушала республикализивадси Шамил ГIяммаевличила багьурра. Илини хIябал жармала медаль сархилри.

Иличила баянти дагьес багьандан, ну дугьаизурра нуни валуси пуд ахъбурцан, чуйнара дунъяла чемпион ва  даим гьалаулхъуси Рустам Рабадановличи. Илини Шамил хIерируси Сургут шагьарлизивси пуданала спортла тренер Амар Асадовла телефонна номер гиб. Илини спортсменна социальный сетанала адресуни гиб. ХIера, илабад нуни багьурра Россияла декIси атлетикала спортсмен Шамил Сайпуллаевич ГIяммаев 2000-ибил дусла апрельла 29-личив Хайдакьла районна ГъярацIанила шилизив Сайпулла ГIяммаевла ва Империят СалихIбековала хъалибарглизив акIубси виъниличила. Илала биштIати узи ва рузи леб. Узи учIули сай Сургутлизибси МЧС-ла специалистуни хIядурбируси университетлизив, рузи — Солнечное бикIуси поселокла школализир.

Илала дудеш, Сайпулла Сул­тIан­гIяхI­­мадович, шоферли узули сай, неш, Империят ГIумар­кьадиевна — «Сур­гутнефтогазала» столоваялизир поварли.

Шамил цаибил класслизив сай акIубси ГъярацIанила шила школа­лизив учIусири. Илав азадли мушулбашнила тренировкабачи вашес вехIихьиб. Авал дус дикили гIергъи, Буйнакъскла районнизибси Халимбекауллизибси  «Пять сторон света» бикIуси машгьурси школа-интернатлизи шурулхъули сай ва илав кIел дус учIули калун. Ишар илала ушу-саньдаличи диги алкIули сари.

ГIур илала бегIти Ханты-Ман­сийский автономный округлизибси Сургутла районна Солнечное би­кIуси поселоклизи гечбирули саби. 2010-дуслизив ил декIси атлетикализи ихъули сай.

Илала гIергъи ил Ханты-Ман­сийск­лизи гечирули сай ва сунела тя­ниш Шарапутдин Кьурбановла заллизив декIси атлетикализи ихъули сай.  Хантах (илкьяйда ишаб хIер­бирути халкь бикIули саби) Олим­пиадала резервла Югорс­кий колледж-интернатлизи кархули сай (ЮКИОР). КIинайс Ханты-Ман­сийскла технолого-педа­гогический колледжла физкуль­турала отделение таманбирули сай. Гьанна учIули сай ДГПУ-ла физкультурала факультетлизив. БусягIятла замана спортсменничил бузули саби тренерти Наниев Алан Русланович ва Лизунов Руслан Витальевич. 2019 ибил дусла апрельла 29-личиб РФ-ла спортла министр Павел Колобковла ХIукму хIясибли, Шамиллис «Спортла мастерла» у бедибсири саби. Ил Россияла цахIнабси командала резервлизи кархуси сай.

2020-ибил дусла декIси атлетикала шайчибси Россияла гьалабдеш багьанданси абзлизиб илини хIябъибил мер сархиб. Илди абзани Белгородский областьлизибси Старый Оскол шагьарлизир дурадеркIибтири. 2021 ибил дус­лизирти Брянсклизиб дурадуркIути Рос­сияла гьалабдеш багьанданти абзаначибра илини хIябъибил мер сархиб. Ил дуслизиб Краснодарский крайлизибси Сукко поселоклизиб бетерхурси жагьилти-ургабси Россияла декIси атлетикала Спартакиадаличиб кIиибил мер буциб.

2023 ибил дусла Россияла чемпионатличиб 89 килограммла би­тIакIлизиб илини хIябъибил мер сархули сай. Чедибра буриливан, ишдусла чемпионатличир декIар-декIарти декIси атлетикала журабазир илини хIябъибти хIябал мер сархиб. Абзаначи вашахъес Шамиллис илала гьалмагъ Кьурбан ГIябдулжалиловли кумекбирули сай.

Сулайбан МяхIяммадов