Сентябрьла 26-личиб Хунзахла районнизи аркьути гьундурачиб халаси сакIубдеш сабри. Илкьяйда хIебиэсра хIебири – ил бархIи районнизиб дурабуркIуси байрамличи жибарилри 19 районнизибадти ва республикализибадти гIяхIли. ГIяхIлас разили гьунибиулри районна организациябазиб бузути хIянчизарти, ва илди гьала-гьала чяйла бержахъес жибирулри.
Шадлихъ бехIбирхьуси манзил МяхIячкъалализибад Дагъистан Республикала Правительствола Председатель ГIябдулмуслим ГIябдулмуслимов ва республикала жавабла хIянчизарти бакIиб. Илди-ургаб лебри бузерила ва социальный бяхIчибизлизиб гьалабяхI башахънила шайчивси, илкьяйдали цархIилтира министрти, министртала заместительти, ДР-ла печатьла ва багьахънибала Агентствола руководитель ГIябдуразакь Жамалутдинов, дурхIнала ихтиюрти далтахънила шайчирси уполномоченная Ежова Марина Юрьевна ва гIяхIцад цархIилтира. Лебри Лавашала, Гъунибла, Лакла, Ахвахла ва цархIилти районтас бекIдеш дирутира.
Хунзахлизибси ЧебяхIси ВатIа дергъла бутIакьянчиби гьанбиркахъес барибси памятникличи вавни кадихьили гIергъи, ЦIадала шилизир – «ЦIуба къургъи» ибси уличилти, жагали далкьаахъурти мер-мусаличир байрамла далдуцуни даимдиуб. Илар мармар къаркъала уркьли даршилри, чузира Дагъистан Республикала гьарил районнизибад 1941-1945-ибти дусмазиб ВатIан багьандан бургъес чум адам арбякьунал ва чум чархIебухъунал чебиахъути лугIурби делкIунти. Тамашабизур хунзахлантала чебетаибдеш, балгундеш, ВатIайс мардеш ахъси даражаличир дихIес багьандан бируси къайгъи.
«Гьанбикунала анхъ» убалтнилизирра бутIакьяндеш дариб ГI.ГIябдулмуслимовли ва иличил барх бакIибтани. Ил баркьудилис хьулчи кабихьибсири, сунела урши СВО-лизив алхунси нешли. Буйнакъскла районнизирад ракIибси, къугъаси хьунул адам гъайрулхъухIели, ва сунени белкIунси назму бучIухIели, нургъби тIашаэс гьамадли ахIенри.
– Нушала ВатIан даршдусмазиб декIар-декIарти гъармукабазибад берцахъес чебуркъубси саби, – буриб ил мерличив гъайулхъули, Правительствола Председательли. – Лябкьуси дуслизиб ЧебяхIси Чедибдеш гехIцIали дус бирули саби. ИшбархIи биалли, Россияла бегIлара чIумати гъубзни улкала хъархIерагардеш багьандан, жан ахIерахIедарили, бургъули саби. Илди-ургаб Хунзахла районнизибадтира бахъал леб. Россияли гIяхIгъубзнала гьунар хъумхIерту ва гъамтира хъалибаргунира гьар секIайчил гIердуцес къайгъибиру. ДирхехIе дявила хасти анцIбукьуни чедибдешличил ахирличи диркниличи ва бургъанти чула хъулрази чарбулхъниличи.
Нушачил рарх Хунзахла районнизи ракIибси Ахъушала районна соцзащитала управлениела хIянчизар Барият ГIисаеваличил «ЦIуба къургъала» юртлизи адацIира. Ишарти къугъати секIал чедаэс бухIнабухъунтани зал бицIилри. Нушази буриб комплекс гьалабал барили лебсири, Расул ХIямзатов акIубхIейчирад 100 дус дикнила хIурматлис, тамай балкьаахъурси саби или.
Зал музей кьяйдали жагали кабизахъурлири. Илар Расул ХIямзатовла – лебилра дунъялис Дагъиста у машгьурбарибси пагьмучевси поэтла гIямруличила, бегIтачила, хъалибаргличила бурути белкIани ва суратуни, Дагъистан Республикала машгьурти мер-мусала суратуни, видеороликуни чедиахъулри. Дебали мешудикахъили гипслизирад дарибти Расул ХIямзатовла «Журавли» бикIуси далайлис макьам белкIунси Ян Френкельла ва ил далай бегI гьалаб белчIунси Марк Бернесла дяхIла къалипуни даршили сари лацла бяхIличи.
ГIябдулмуслим ГIябдулмуслимов ва лебилра байрамличи учибикибти жавабла хIянчизарти комплексла мер-мусаличибад алавбиуб ва дураб хIерти шадлихъла бутIакьянчибачи гъамбиубли, разидеш бутIес ва чула ургабси балгундеш чебаахъес цалабикнилис баркалла багьахъур.
Шадлихъ абхьили гъайухъун Дагъистан Республикала Правительствола Председатель.
– 2024 ибил дус Россияла Президент Владимир Путинни хъалибаргла Дус сабливан багьахъурси саби сунела ХIукмулизиб. Нушала Дагъистайзиб хъалибаргла халаси кьимат лебси саби. Хала бегIтачирад жагьилтачи дашули, цализирад цали гIерисули, хъалибаргла къугъати гIядатуни, уржибдешла тяхIяр-кьяйда дузахъули лерти сари,– викIи ГIябдулмуслим МухIутдинович. – Хъалибаргла Дуслис багъишладарибти дахъал далдуцуни детерхур республикала гьарил районнизир ва илди даимдарили дирар. Лерилра иша цаладикибти хъалибаргла Дусличил мубаракдирулрая ва хIушазивад гьарилла гIямру талихIчертили диубли дигулра!
ГI.ГIябдулмуслимовли буриб ил байрамличи бахъал дурхIни абикьурти ва илдас гIяхIси бяркъ бедибти бегIти, илкьяйдали, СВО-лизиб бусягIят бургъули лебти ва Дагъистанра арагIебли Россияра фашистунала, миллатчибала балагьлизирад дерцахъес багьандан, чула гIямру мяштIхIедарибти гIяхIгъубзнала бегIтира хъалибаргунира жибарибти саби или.
ДР-ла Правительствола Председательли гьала-гьала илди мубаракбариб ва Баркаллала кагъуртира, шабагъатунира, савгъатунира дедиб.
«Хъалибаргла хIурмат ахъбурцнилизи мягIничебси пай кабихьни ва дурхIнас гIяхIси бяркъ бедни багьандан» или белкIунти ГI.ГIябдулмуслимовла къулбасличилти кагъурти дедиб БотIлихла, ЦIумадала, Кулила, Сергокъалала ва гIяхIцад цархIилтира районтазибад жибарибтас. Ахъушала районнизибад илгъуна хIурматличи лайикьбикибси Ванатовхъала хъалибаргра мубаракбариб.
Илданира гехIел урши-рурси абикьур, лебтазилра багьуди касахъиб.
Баркаллала кагъар сайсули, МяхIяммад Ванатовли Правительствола Председательлис баркалла багьахъур ва имцIабариб:
– УркIи-уркIилавад баркалла викIулра «Ахъушала район» МО-ла бекIла заместитель Эльвира ХIясанхIусейновас – илгъуна ахъси кьиматличи дила хъалибарг гьалабихьнилис ва районна бекI МяхIяч ГIябдулкаримовлис – илгъуна пикри гIеббуцнилис.
ГIур концертла программа бехIбихьиб. Дахъал районтазирад пагьмучерти коллективти ва далай-делхъла устни бакIилри. Ахъушала районнизибад лебри ХIяжимурад ва Салимат Мусаадаевхъали, Пирдаус ХIяжимяхIяммадова.
«ЦIуба къургъи» ибси уличилси комплексла шайчир районтани чула майдунти тIинтIдарилри. Илар лерри миллатунала хасти палтар ва берклуми, гьаларла ваяхI, някъла хIянчурби, хъали-цIализир дузахъути гIягIниахълуми ва дахъал цархIилтира секIал.
Районнизиб ил балбуцличи дебали жагали хIядурбиубли биъни чебаэслири. Баркалла биаб чус.
Балбуц таманбиубхIели, Хунзахла чяхI-чяхIи, Гоцатлила ГЭС, Арани бикIуси шилизибси къала, сабира 1867 ибил дуслизиб урусла пачали барахъибси, КIарахъала Къойсула дубаникад ахъдиубти къугъати юртани чедаэс къалабабикибтира камли ахIенри. Гьар мерличиб халаси тIягIямличил алавчарли хIербикIути ва дубуртала, хIуркIбала, заклизир арцурти чIакнала суратуни кайсули абархибти туристунира чебиулри.
ПатIимат Маллаева
