Ишди бурхIназиб нушала дубуртазиб Россияла улкала кьадрила байрам-фестиваль дураберкIиб. Байрам Кубачила художественный комбинат бузес бехIбихьибхIейчирад 100 дус дикниличил бархбасунсири.

Августла ахирличир аргъ-бархIира, кубачилантира, улкала дахъал мер-мусаличибад бакIибти гIяхIлира цаван балбикилри: уркIби разилири, хIялани ряхIятлири, пикруми шалалири. Бахъал халкь цалабикибси байрамличиб гIяхIцадхIи чехIебаибти юлдашуначил гьунибиулри.

Байрам-фестиваль кубачилантас бузерилис сагаси гьуни гьаргбируси сиптали бетаурлири.

Гьарли-марли байрам-фестивальлис хьулчили детаур гьаланачи ДР-ла Правительствола Председатель ГIябдулмуслим МухIудинович ГIябдулмуслимовли ва кIинайс Республикала БекI Сергей ГIялимович Меликовли Дахадаевла районнизи ва Кубачила комбинатлизи дурадеркIибти архIяби.

Гьаланачи ГI.ГIябдулмуслимовли комбинатра иларти аги-кьяйдара сунени хIясибдариб, дуракайути ваяхI чедаиб, илаб бузути устначил, районнис гьуни чебиахъути адамтачил ихтилатбариб — комбинат сагабарес гIягIнили саби ибси пикриличи вакIиб.

ГIур сунела пикруми республикала БекI С.Меликовличи даахъиб.

С.Меликов бузерила архIяличил Дахадаевла районнизи вякьунхIели, комбинатла бузери сагабирути лерилра далдуцуни дурадеркIахъес жавабла хIянчизартачи хъарбариб. Республикала БекI С.ГI.Меликовла хъарбаркь бетурхахъули, Дагъиста туризмала ва халкьла художестволати ваяхI дирнила шайчибси Министерстволи Кубачила комбинатла налогунала шайчибси чебла, законна тIалабуначи балбикахъили, сунени ахъесли бариб, комбинатла бузери сагабарес сурсатуни декIардарес, гIягIнити ваяхI тIалабдарес, комбинат сагабарес сунечи чесиб. Комбинатлис гьуни чебаахъес жагьси, узес балуси Мурад ХIяжияхIъяев катур.

Гьайгьайра, илдигъунти гIяхIти хабуртани кубачиланти, лебилра дубурланти разибарилри. Арбякьунси даршдусла 70-80-ибти дусмазир Кубачила комбинатли ца дусли 10 тонна цIуба арцлизирад дарибти ваяхI дуракайули, илди хайриличил дурхахъули шила, районна, республикала бюджетлизи гIяхIцад сурсатуни тIалабдирутири. Комбинатла бузериличи хъарихъули, лерилра-сера алавти шимала халкьла яшав бетарусири. Гьаннала замана комбинатла бузери сагабарес виалли, ил лебилра республикалисра халаси кьадрила баркьудили бетарар.

Фестиваль-байрамличила гъайикIалли, ил дебали ахъси даражаличиб бетерхур. Дагъиста адамти дебали бузери дигути ва бузес балути саби. Чула бузерила сархибдешуни халкьлис гьаладирхьули, устадешла дурсри чедиахъули жагали далкьаахъурти чятиртази хайдакьла буреба-тIузла устни, Балхъарла гарала тIалхIяна диранти, Хъярбукла шандан дебшлабиранти, урцуйзирад ваяхI, музыкала гIягIниахълуми диранти, гулбазиб бузути, кьапIни диранти гIурра дахъал секIал дарес балути устни цалабикилри. Гьайгьайра илаб лебри нушала республикала мер-мусаличибад бакIибти мургьи-арцла устнира, Россияла мер-мусаличибад бакIибти някъла хIянчила 70-лицад устара. Байрам-фестиваль хIябал бархIи бухъянбитIун.

Фестивальличи бакIибтас чула бузерила сархибдешуни гьаладихьилри Кубачила искусствобала школали. Школалис гьуни чебиахъуси Райсат Сайбунова илар гIяхIцад дусмазир рузули сари. «Нушачи устадеш касес башути дурхIнани, бархIиличи-бархIи, уркIиулра — гъайбикIес бурсибиэс гьалаб, илди ибес бурсибирули саби», — рикIулри Райсат сунела пикруми дурули. Искусствобала школализиб бузес бурсибирути рурсбани дарибти начурбани, начурбала палтарли хIербикIути тамашабирахъулри. «Рурсби, биштIали лебай, гьарил чIянкIила кесек сегъуна журала сабил белгибирес, чердикIибти, имцIали дузахъути някьиш суратдарес, буребаличил мургьила, арцла тIузличил илди ибес, начурбас палтурти дирсес ва ибес дурхIнала анхъла, бехIбихьудла классунала рурсби бурсибирули саби. Илдачил нушабра дузес дигулра. Алапа халали-биштIали викIуси агара, дурхIначил дузра дузули нушала хъали-цIализирти хIянчи бекIдаресра бажардидиркулра, хIукуматли нушала бузери гIеббурцниличи дебали разилира», — рикIулри Райсат Сайбунова ихтилатлизир.

Мякьла тIашкаризурхIели гьайбатси чугурла тIамали ил бирхъусиличи ласряхъяхъира. Ил Избербашлизивадси кьисла ва музыкала гIягIниахълуми дируси уста Ражаб ХIяйдаров уилри. Гьанна дакIудиубти, жагали зайдикIес  чузир имканти лерти музыкала гIягIниахълумани, гьайбатси чугурла зайла тIамала мер сеналра хIебурцу. Гьарил адамла рухIлизиб хала бегIтала агурбас ва макьамтас декIарли чеббикIибси мер лебси саби. ЧеалкIутала рухIлизибра илгъуна мер калахъес музыкала гIягIниахълуми дируси устала бузерира гьалабяхI арбякьи дигулра.

Гьанна гIяхIцад дусмазиб чучи дунъя тамашабирахъули саби, хайдакьла буреба-тIузла някъла хIянчила устнани. Илдала гьаркьяна Зубайдат ХIясановани сагали мицIирбарибси някъла устадеш, гьанна бахъал хьунул адамтани даимбарили саби, Фестивальличир гьаладихьибти хайдакьлантала буреба-тIузла хIянчурби бахъал хьунул адамтани хIясибдирулри. ГIядатла буреба-тIузла някъла устадеш, хIукуматли гIеббурцухIели, ахъси искусстволичи шурбухъи саби. Хайдакьла устнани гьарил выставкаличи сагали балкьаахъурси хIянчи гьалабирхьули саби, гьалабсиличибра сагали барибси черикIлаласи, жагасили бетарахъули, хIянчилизир устадеш ахъдикIахъули сари.

ГIярбукIантала гьарил юртлизиб хъали-музей лебси саби, музей бетхIеахъурли гьар бархIи сунезиб хъа бегIти хIербируси, дурхIни халабиуси, анкъилаб цIа абикьурли хурег хIядурбируси, къянурби (мучIалти) шинничи дихуси, дубсила шунгрази кадихьили биринж, курпа, макаронти умули дихIуси. Фестивальла чятирлиуб гьалабихьибси, илгъуна хъалира чебаэс дигеслири. Фестивальличи бакIибтани, гIяхIлани иличи пикри бяхIчииулри.

Дебали жагати цIуба арцла ваяхI гьаладихьилри Буйнакъсклизиб хIербирути гIярбукIанти устни «Узби ХIяжигIямаровхъалани». Илар дебали назикли, жагаси тяхIярли дарибти хьунул адамтала урцIли, тIулкми, кулхми, илди кадирхьути гIянтIикIа, цIуба арцла тIакьни, лерилра пикридарес ну ралкьхIеурти дахъал жагати секIал лерри. Илдани саби-бегIси чятир буцахъили ваяхI гьаладихьилри, чула устадешличи бахъал халкьла пикри битIакIес дигулри.

Фестивальличир хъярбукантала шандан дебшлабирути пушни пушдикIулри. Илди дузахъуси назикси хьунул адам Жавгьар Рабаданова шандан дебшлабируси риъниличи вирхаэс гьамадли ахIен. Амма ил мегьла устацун ахIенну, жагати матяхI дарес балуси уста — художникра сари. Иличил ихтилатбарес иш гьакIлис бетхIеур. Ил мурталра сунечил ихтилатбикIутани ясирруцилри.

Гьанбушес гIягIнили саби Балхъарла гарала тIалхIянала устначилара. Гьаб-убла замана холодильникунира кондиционертира агархIели, гIинизларад хибхIеливан бизиси тIемличил, дяргIили, гарала хъабназир шин кавлутири. Шин дура архIедашули диалра, бицIибси гарала хъаба мурталра хIябцли бируси саби. Иличирли сари гарала хъабализирти шинра, илар дертурти ниъра бизитили дирути. Гьанна дузахъаллира гарала тIалхIяна адамла арадешлис дебали багалати сари. Чула устадешла дахъал ваяхI балхъарлантанира жагаси фестивальла чятирлиур мерладарилри.

Гьайгьайра, илар лерти лерилра жагадешуни пикридарес ну ралкьхIеурра, Дагъиста гIяхIцад журналистунала «десант» савлиличибад фестивальла майдайчи хьурабиуб, илдала ургаб бахъал лебри «Этномедиахолдинг»-лизиб бузутира, нуни пикрибарес бекIхIериубси илдани чебирцIахъниличи рирхулра.

Журналистуни бакIес гьалав фестивальла майдайчи вакIилри Дахадаевла районна бекI МяхIяммад Абубакарович ГIябдулкьадиров. Илини дурабад лябкьути гIяхIли хьурабарес хIядурдеш сегъуна лебал сунени ахтардибирулри. Буралли, байрам-фестиваль дурабуркIнира, комбинат сагали бузес бехIбирхьнира, чула гIяхIти хьулани-пикрумира Дахадаевла районна халкьли иличил дархдалсахъули сари. Дурхъати табтуртази белкIни хIясибли, гьарил адамла сархибдешуни сунени барибси кьасличи мешути дирути сари. Районна бекIла гIяхIти пикрумира, кьасанира, халкьлира гIердуцили детурхниличи рирхулра.

Кубачила комбинат сагали бузес берхIбирхьнилизи, кубачилантала гIямрула шуртIри гIяхIдулкьахънилизи мекелли халаси пай кабирхьули узули сай, Кубачила шила бекI ГIябдусалам Куртаев. Ил дебали халкьлис сайра, сунечи халкьра балбикибси шила бекI сай. Байрамла бархIи шилизи бакIибти гIяхIлала хIурматбирули дебали вархилри, илбагьандан иличилси ихтилат гIелайзи арбухира.

Лебилра сунечи хIерси сягIят (официальная часть) сабаибхIели, гIярбукIанти байрамличил мубаракбирули гъайбухъун: туризмала ва халкьла художестволашалти ваяхI дирнила шайчирси Министрла заместитель Анна Сергеевна Безрукова, Дагъиста культурала Министрла заместитель Мухтар ГIяммаевич Кьурбанов, Дагъиста художникунала Союзла председатель КьурбангIяли МяхIяммадович МяхIяммадов, ДГУ-ла ректор, Дагъиста Халкьла Собраниела депутат МуртазагIяли Хулаттаевич Рабаданов, Кубачила художественный комбинатла директорла къуллукъуни дузахъуси Мурад ГIябдулхIяпизович ХIяжияхIъяев.

ГIярбукIла жагьти хьунул адамтани гьаладихьиб шилизир дузахъути гIядатла палтар, хьунул адамтас, цIикуртас, жагьил рурсбас хасти, чула ралликьянала мекъличир рурсбани кIузрала чеди чедирхъути кIунби, янилизир бугIярхIели челгьути гIябни, заб-марка дирухIели, дирихь чебихьи хIябцлихIели чедирхъути дабза кIунби, мекъличи-шадлихъличи челгьути дурхъати хIевни, мургьила, арцла тIузличил някьишдарибти кIазани. ГIярбукIла хьунул адамтала челгьути палтарла культура гIур чинабалра агарси, саби-бегIси, аринси, давлачебси, дахъал журабала, лебил дунъялисра гIибратли биэсли жагаси саби. Ма ша Аллагь.

Илар зайдухъун далуйти, гурдухъун делхъани. Байрамла майдайчир лерри масхурти, хабурти, разидеш, илхIелира лерилра секIал имцIали яра камли ахIенри. Ца гьарахъливад вакIибси журналистли буриливан: «Лерил секIал далдикили сарри. (всё было в меру)».

1972 ибил дусличивад Кубачила художественный комбинатлизив жавабла къуллукъуначив узуси Рабадан ХIясанхIусейнов комбинатла бузери сагабирниличи сайра, лебилра гIярбукIантира разили биъниличила гъайвикIулри: «Нушала комбинатлизиб 843 адам бузули лебтири, хьунул адамти, хъулибад дурахIебухъи, динди думхули бузутири. Нушала республикала БекI С.Меликовла кумекличил, пикри саби, комбинатла бузери сагабарес. Нушала халкь бузери дигахъути саби, бусягIятра комбинатлизиб бузули адамти, абхьили цехани, гIяхIти устни леб. Нушала хабарла устни Расул ГIялихановван, ХIяжибяхIмуд МяхIяммадовван, комбинатла жаняхIлизи даршибти суратуназибти, гьалаб комбинатла багьара, ура ахъдирули бузули калунти устниван, гьаннала жагьилтасра бузес дигули саби. Комбинат сагали бузес бехIбирхьниличи вирхулра».

Илдигъунти гIяхIти пикрумачил, хьуланачил комбинат абхьибхIейчибад 100 дус дикнила байрамличи бакIилри гIярбукIанти.

Республикала тах шагьарлизибад байрамличи бакIибтала кьукьялизивадси Дагъиста культурала министрла заместитель Мухтар ГIяммаевич Кьурбановра, детерхесара ишдала пикруми ибси дила суайс: «Лерилра секIал детерхесли пикридарили сари. Комбинат сагали бузес бехIбирхьур», — викIулри.

Адамла бузерили ил чи саял бурули бирар. Устнала хIялалси бузериличибли машгьурбиубсири СССР-лизиб Кубачила художественный комбинат, хIялалси бузерили жагасили, баракатласили бетаахъурси саби Кубачила ши. ГIурра кубачилантас уркIилис дигуси бузерира, хIялалси баракатра дулгулра. Гьалаблаван, Кубачила художественный комбинатла бузери гьатIира ахъбиубли, чебяхIбиубли, гьалабяхI арбякьи, шила баракат имцIабиубли дигулра.

Муъминат Хаттаева