ХIурхъила шила хьаршаб, ца юртлизиб, уржили хIербирули бири кIел узи — ГIябдулгIязиз ва МуртазагIяли. Илди цархIилтиван  хIяйван-къачара адилкьули, хъумачибра бузули, вяшкабикIутири. Илдала яшавра вайси ахIенри.

ВиштIасигъуна узи МуртазагIялила хьунул авал биштIатира гIелаб кали, жявли гIямрулизирад шалгIеррухъун. Неш ребкIибхIели, урегал баз риубси ПатIимат дудешла рузи Маймунатли аррукибсири, ва сунечир хIеррарибсири. Дудеш МуртазагIяли кьуватчевси, бамсри хIебалули узуси, дахъал хIянчи дируси адам вири. Уршби АсхIябгIяли, Ражаб ва хIябал дус виубси СултIанмут чули дарес бирути хIянчи бекIдирули, дудешлис кумекбикIи. МуртазагIяли сагали хъайчикайиб ва хъалибарглизир рузи Салимат акIуб.

Чула хъулрала мякьларти шила хIябрачи, нешличи карцIси, виштIаси СултIанмут гьаман вашусири.  ДурхIядешла хIязтала мерличир СултIанмутлис хIянчи чедуркъиб. Ил цайкьяшмали хIяйвантачил дуки ва авлахъла хIянчиличи ваши. 1930 ибил дуслизив акIубси СултIанмут 7 дус виубхIели, школа-интернатлизи ведиб. ИтхIели хIукумат хIевчIули чилра кахIелахъес чекабизурлири. СултIанмутра халатала кумекличил белчIудиличи хъярхъли гIевваиб. Илини илав узуси пагьмучевси учитель МяхIяммад ГIисаев мурталра баркаллала дугьбачил гьануршули вири.

1939 ибил дуслизив узи Ражаб сай гIяхIъулали гIярмиялизи арякьунсири. ЧебяхIси ВатIа дергъ бехIбихьиб, АсхIябгIялира Ражабра дергълизи арбякьун. СултIанмут Мамайкъутайзи дуки ваши, ил дуги-хIери цадарили,узи. ИтхIели акьули кайэс чилалра гIямал хIебири, лебил гIялам бузулри. Дахъал сарри биштIатала ва хьунул адамтала назикти хъуцIрумачи чедуркъибти хIянчира. Къиянти диалра, СултIанмутли хIяйван-къача ва авлахъла лерилра хIянчи дяркъур. Илди багьудлуми челябкьлализир багалара диуб. СултIанмут школа-интернатлизив учIули левалли, илала дудешра вебкIиб. ЦIуръабиубти биштIати хIябал узи-рузи, чула уркIецIичебти узбикьуртани гьарра шайчибад гIеббурцули бири.

АсхIябгIяли дергълизив къел-хIерзи агарли веткахъиб. Узи Ражаб дявила Академиялизи белчIуди даимбарахъес урхьулри,илисра белчIуди хъараахъес дигулри. Амма иличи хъулиб биштIати узи-рузи  хIерлири. Ражаб узикьар Запирла кумекличил хъалибаргличи чарухъун. Халаси узис гьунибаэс шилизибад Сергокъалализи башули бакIилри СултIанмутра рузбира. Ит дуги илдани узизи хьардиути суалтира, дурути хабуртира, дурес дигутира кадурхули ахIенри.

Узи-уршила кумекличил Ражаб хъайчикайиб ва хъалибаргличил Мургукла шилизи учительли узес гечиуб. Илав СултIанмутра учительли узули калун. 1948 ибил дуслизив СултIанмут зоотехнический факультетлизи керхур. Ил ункъли учIусири ва акьуси замана сунес арц дарес узули, илини 1953 ибил дуслизиб институт таманбарибсири. Ил институтлизивад Хайдакьла районнизи бекIливиубси зоотехникла хIянчиличи вархьиб.

СултIанмут, дудешла аманат хIясибли, Ражабла хьуна рузичи хъайчикайиб. Ил хьунуйчил Хайдакьла районнизи узес арякьун. Хайдакьланти илдас разили гьунибаиб. Пагьмучевси ва устадешчевси СултIанмутла хIурматра имцIабикIулри. УрчIемал дус хIербиуб илди  илаб. Илдала хIябал дурхIя акIуб.

1960 ибил дуслизив Сергокъалала районна райкомла 1-ибил секретарь ГI.НурбяхIяндов СултIанмутличил къаршиикиб. Сергокъалала районнисра гIяхIти хIянчизарти гIягIнити биъниличила бурули, илис хIянчи гьалабихьиб. ГI.НурбяхIяндовла бажардиличил СултIанмут сунела районнизи хъалибаргличил чарухъун. Илис Ленинна уличилси колхозла бекIливиубси зоотехникла хIянчи бедиб. Колхозла сархибдешуни дахъдикIулри, ил гьалабяхI башулри.

1962 ибил дуслизиб СултIанмутхъала хъалибарглизир рурси СалихIят акIуб. Ил дус СултIанмут гьаланачи совхозла управлениела начальникла заместительли, камси замана бикибхIели, начальникли викIиб. Чумал дус илав узули калун. Амма ил санигIят СултIанмутлис гIяхIбилзули ахIенри. Илала уркIи авлахъличи, хIяйван-къачаличи, бузерила зяхIматчибачи гьуцIбикIулри.  СултIанмут батурли начальникла хIянчи колхозла председательли узес вехIихьиб. 1968 ибил дуслизиб акIахъубси «ДешлахIяр» совхозла директор ветаур.

«Дила гIямрула гьуни»-бикIуси сунела жузлизи ГI.НурбяхIяндовли белкIи сай СултIанмут МуртазагIялиевличила. Сунела хIянчи ункъли балуси, чекайзурли  узуси, адамтачил валгунси сай или бурули сай авторли, директор СултIанмутличила. Совхоз ва район гьалабяхI арбукибси СултIанмутли халкьла хIурмат сархиб, барх бузути илала насихIятуначи иштяхIличил лехIирхъулри. РК КПСС-ла бюрола членнира калун ил. КПСС-ла ХХVI съездличи вякьун. Чуйнара Правительствола Баркалала кагъуртачи ва ордентачи лайикьикиб. СултIанмутлис В.И.Ленинна уличилси орденра бедиб.

Сергокъалала райкомла секретарьли узули калунси С.И.Кьурбановли сунела «Почетный гражданин» бикIуси жузлизиб С.МуртазагIялиевла бузерила сархибдешуначила, илини районнис дарибти гIяхIдешуначила бурули сай. С.МуртазагIялиевли бекIдеш дируси «ДешлахIяр» совхоз, районнизибцун ахIи, республикализибра дахъал сархибдешуначибли машгьурбиуб. Ил совхозла хIянчизартани заманалис гьалар чучи хъарти сабухъуни дучили VIII, IX, X, XI, XII шелдуслихъла планти гIекIиб.

СултIанмутла бажардиличил «ДешлахIяр» совхозла директорли узуси замана  халкьлис бузерила мусни: совхозлис сагаси контора, дурхIнала анхъ, кьулала ферма, гIяргIнала фабрика, Кьадиркентлизиб ниъ далкьарахъуси ферма, школа, чягъирла завод ва 200 адамлис хасбарибси общежитие далкьаахъур.

Бузерила зяхIматчи СултIанмутла совхоз республикала абзаначибра гьабкьятала къяяназиб бири. Ил совхоз «Хозяйство высокой культуры и земледелия» ибси уличи лайикьбикибсири. Районна ва лебил Дагъиста колхозунала ва совхозунала хIянчизарти сабухъчебли бузес бурсибиэс «ДешлахIяр» совхозлизи башутири.

Районнизиб, республикализиб ва улкализиб ЦК КПСС-ла ширбикIуси ХIунтIена байрахъличи чуйнара М.СултIанмутла совхоз лайикьбикиб. Ил совхозла хIурматлис «Машгьурси бузерила» байрахъра ахъбурцули бири.

С.МуртазагIялиев дахъал дусмазив ростком КПСС-ла бюрола членнира калун, КПСС-ла ХХVI ибил съездличи делегат виубли вякьун. ДАССР-ла урибси зоотехник, Ленинна уличилси орденна кавалер, дахъал медальтачилси ва сархибдешуначилси бузерила зяхIматчи СултIанмут МуртазагIялиевли халкьла дигира сархиб.

ГI.НурбяхIяндовлис ва С.И.Кьурбановлис чула дудеш гIеввурцнилис СултIанмутла хъалибаргли баркалла балахъули саби.

СултIанмутла кIел урши ва кIел рурси лебтири. Ца рурси риштIали лералли ребкIибсири, урши МяхIяммадли политехнический институт белчIун. Чягъир хIядурдируси факультетра таманбарибсири илини. 1991 ибил дуслизив гIямрулизивад шалгIевухъунсири.

Урши ГIябдулхIяпизли сельскохозяйственный институт белчIун. 1980 ибил дуслизив совхозла зоотехникли узули калун. Гьанна — предприниматель сай. Илала кIел уршира леб.

Рурси СалихIятли ДГПУ-ла филологияла факультетра белчIи, ГIямарла Батирайла уличилси лицейлизир рузули сари. Ил «РФ-ла цахIнабси багьудила хIянчизар» бикIуси уличира лайикьрикиб. СалихIятла хIябал дурхIя леб. Илала кIелра рурсили Медакадемияби тамандариб. Урши ГIиса  ДГУ-ла экономический факультетра белчIи, гьанна узули сай.

Басират ХIяжимурадова