ДурхIядеш гIелар датурли гьарил дурхIя школализи укьес гьалакли вирар. Школала унабурхI ахъибмад илдала кьисматра барскабирар. КIиэсил хъалибарглизи — класслизи адацIили, сагати хIяланази ва аги-кьяйдализи илди илкьяйдали бухIнайхъур. Дусми ардашуцад цакласслантала ургала хIялалти хIяланачил жагабирули саби, уржибдешли уршби-рурсбазир узби-рузбалагъунти хIялани алкIахъули сари.
Шакалра хIедикили, школала гIямру ардашули сари ва халакадаили, вегI-вегIла дякьяникад нуша датдирхьулра. Гьайгьай, лебталалра кьисматуни декIар-декIарти дирар. Амма илцадра гъамтили бетаурти цаклассланти хъумартес вирули ахIен, илдачила гьанбикуни уркIбазир ванадикIули даимлис кавлули сари. Илди чебиэс ва илдачил ихтилатдикIес дигули, урга-ургади гьунибаъниби дурадуркIнира дигеси баркьуди саби.
Набчил барх бучIутира ДугIахъарла урга даражала школализиб белчIуди хъараахъурхIейчибадли шадлихъла аги-хIяйзиб гьунибиэс ва разили замана буркIес даимбиубли саби. Илкьяйдали чуйнара дубурла ва диркьала мер-мусаличир къугъати шадлихъуни дурадуркIули, цаклассланти-ургарти бархбасуни къябхIедердахъира.
Гьайгьай, 70 урши-рурси улкала гьарил гIямзила тIутIукабиуб. Илди хIербирули саби Москвализиб, Санкт-Петербурглизиб, Ставропольлизиб, Лугансклизиб, Сургутлизиб, МяхIячкъалализиб, Избербашлизиб, Дербентлизиб, Кубачиб ва цархIилти гьарахъти ва гъамти мер-мусаличиб. Чумал адамцунри нуша акIубси Дахадаевла районна ДугIахъарла шилизиб калунти. Гьайгьай, илди цалабикесра гьамадли хIебирар. Амма гьачамличиб-гьачам цабехIлис цабехI чебиэс дигули саби ва сеннира къаршибиркули саби. Лебилра цаклассланти гьунибаэс имканхIебикIалли, имцIаливан 15-20 кьисматли дулекIла рузбалаван ургала ванабикIути нуша цаладикили, чина-биалра архIя дурабуркIули дирехIе.
Иш гьакIлисра ДугIахъариб, Кубачиб, Дербентлизиб, Избербашлизиб, МяхIячкъалализиб хIербирути рурсби вягIдалабиубси мерличи цаладикира ва Сулахъла къярдлизи музыкала ва далуйтала агурбаур архIяличи дурадухъунра.
Разити ихтилатунани ва масхуртани жагабарибси архIяличир рах-магли школализи дашухIелила гIямрура гьансадиркулри. Нуша архIяличи дикуси маршруткала шофер худуцIлан Рабазанра музыка ва ихтилатуни дигуси, далай-делхъла гIяхIси уста сай. Нушабра иличил дарх архIяличи дашес дигахъехIе.
КIел катерличи кадиили, сягIятличирра имцIали дубурла зурбаси шараличир къугъати музыкала агурбаур, илала гьарил къярдличи даира.
Эллелей, бамбагъунти цIуба гъагулти куртIдикIуси хьанцIа заклиур малхIямли ругерта диркьути цIуба арцван лямцIаркадикIути шинна чедирад разидешла хIяланаур датдухъи, гьайбатси далай зайбухъахъи, нуша гьалакли башуси катерличир чина-саррал сихIрула хабарлизирван гьаладяхI арцуртигъунтири. УркIи-хIял ахъси гьавли шаладиахъублири, вецIани дусми шиннизир тIутIудирахъули, жагьдешлизи ва дурхIядешлизи духIнайхъухIеливан хIулкIулири. ГIядатла дугьбачил сипатбарес хIейэсил разиси хIяйчирти нуша ахирра шарала дубла даира.
Россиялизибадли башути туристуни тамашабиахъесван дубурла декIар-декIарти мер-мусаличир ишхIелла манзиллизир дахъал бамсриихънилис хасдарибти хъулри далкьаахъурли сари. ХIера, нуша Сулахъла къярдла бегIлара ахъсигъуна музаличи тIашдизурра. Иларра декIар-декIарти миллатунала даршани адамтани разили бамсриихъулри.
Агь, илавадли хIерикIухIели къярдла ва ил-алавти мер-мусала жагадеш! ТIабигIятли илцадра жагали балкьаахъурси сихIрула кинолизирван билзулри илхIели нушабра. Наб бегIлара гIяхIбизурси гъамли урцути дубурла азадти чIакначи хIеррикIес сабри. НушакIун бурсидиубтира илдачи дигиличил ванзаличирадли закличидяхI хIердикIули, хIулдуркIес.
«Главрыба» бикIуси мерличиб, декIар-декIарти цIедешла анхълизиб нушачи давлачебси кьумур хIерлири. Тахличи талхъунтиван кабиили, илаб кьацIли букути бахъал туристуни лебри. Нушара илдала лугIилизир бизити берклумала тIем багьес гьаларла кьалтинтачи кадиира.
ГIур нуша мурхьси къадалабси гумиличирадли детахъдикес аркьутира или багьахъур Рабазай. Гьайгьай, ила бегI гьалаб аркьутира лебри ил бархIи. ЛебгIеб разиси хIяйчиб чарбухъун «сиратIла» гуми ахъили рурсби. ИлхIейс гIеладяхI чардиэс замана баилри ва нушани маршруткаличир сагадан масхурти-ихтилатунази ахъили, тах шагьарлизи аркьуси гьуни буцира. Илабадли кIинайс цархIилти шагьуртази ва шимази рурсби арбукьесра хIяжатсири.
ТалихIчебси манзил гьалакли шалгIеббулхъуси саби ибси бурала бархьси саби. ХIера, МяхIячкъалализи даибхIели гьигьла манзиллизибван бархIи шалгIеббухъунсиван билзулри ва нуша декIардикес хIейгули, камси манзиллис лехIкахъира. ГIур хапли масхурти зайдухъун ва разиси хIяйчир декIардикира, гьатIира цаладикесил заманара белгибарили.
Бархьси саби, разити хIяланани излуми хIярхIдирахъу ибси пикри. АрхIяличи дуралдухъухIели барх се-биалра хIейзуси чилра аги, барх хIулкIули замана беркIибхIели, лебталалра излуми хIярхIкадиуб ва итди гьарахъти 90 ибти дусмазир дагьардиубтиван билзулри. Адам мицIирли левай вегIлис дигахъути инсантачил разили замана беркIни, гьарли-марли курортличиб бамсриахънигъуна саби. Илала дурабадлира, илдигъунти гьунибаънибани анцIкьи-децI, шишимти хъумуртахъу.
Тамара ГIябдусалимова
