Даргала машгьурси писатель Ибрагьим БяхIяммадович Ибрагьимовла, урус мезличи шурдатурти, сагати кIел жуз дурадухъун. «Немой свидетель» бикIуси, сунези кIел повесть кадерхахъурси жуз Дагъиста жузала издательстволи май базличиб дуракаибсири. Илис гIеббаиб «Алеф» издательстволи июльличиб дуракаибси, сунези повестуни, хабурти, новеллаби кадерхурси «Страшный Ирхинзи» бикIуси жузра.

Дахадаевла районнизив, КIишала шилизив учительлира узули, И.Ибрагьимовли сагати, халкьлис тамашадизести жузира лукIули сай. Дарган мезли делкIунти жузи урус мезличил дурадухъни биалли, лебилра республикала литература дигантас дигеси савгъатли бетаурли саби.

Марлира, гIяхIгъабзала мер бацIли кавлуси хIебургар. Даргала хабарла писательти итил дунъяличи арбякьи гIергъи, И.Ибрагьимовли илдала мер бацIли балтули ахIен. Гьар-гIергъили дурадулхъути илала жузани бучIанти разира тамашара бирули саби. Ма ша Аллагь.

Цалра миллатла литературализирти пагьмурти, мурталра цагъуна гьаб-гIергъидешличил дакIудирути ахIен. Гьарил лукIусилис жуз белкIес бедибси пагьмура, Аллагьли бедибси дурхъаси караматдеш саби.

Лебил республикалара Россиялара литература дигантани жузи делчIесли урус мезличил гьаладихьнира дебали дигеси сархибдеш саби.

Жузи, даргантала ва цархIилти миллатунала халкьла гIямрула шуртIрачила, адамтала хасиятуначила, дирути-детарутачила, алавси, жагаси тIабигIятличила, тарихла анцIбукьуначила гъайдикIули сари. ЧеалкIути наслубани И.Ибрагьимовла жузазир нушала халкьла гIямрула гьарли-марти суратуни даргес бирар. Илала сагати жузачи литература диганти мурталра хIерли саби.

«Замана» газетала агьлули илис чIумаси арадеш, уркIилизир шалати пикруми, хъалибарглизиб талихI-баракат дулгули сари, гIурра дахъал сархибдешуни диубли дигули саби.

Муъминат Хаттаева