ИшбархIила тяхIяр-кьяй­да­лизиб адамтази баркалла ахъес гьамадли ахIен, — са­бур камбиубти, тIалабуни дахъ­даибти, цар­хIиллизиб гIяхIси чебаэс хIей­гути, бахъ­бикIули биалли ахIен­си, кам­би­кIули саби или эсра хIей­рар.
Ил сабабли бурги наб дебали гIяхIбизурси ца адамла баркьуди. ХIерхмахьила школализив дахъал дусмазив нешла мезла ва литературала учительли узуси, набчил варх ДГУ-лизив учIули калунси Рабазан Юсупов гьалавван районна газетала редакциялизи вакIибхIели иб:
— Наб дигахъаси газетализибад баркалла багьахъес РФ-ла Социальный Фондла Ахъушала районна отделениелис бекIдеш дируси Шамил Мусаевлис. Дебали гIяхIси адам уилри ил, наб гIяхIцад къиянбухъунси суал илини хъярхъли бекIбариб. Нуни бахъал адамти чебаибти саби, илдала лугIилизив бегIлара хIя­лалси наб къаршиикибси адам Ша­мил Мусаев сай или бурес вирус!
Шамил МяхIяммадовичла ка­би­нетлизи рухIнарухъунхIели ил набра разили гьуниваиб, хIянчиличила, арадешличила хьархъарбаиб, къантI-къантIли сунела бирусира гьанбушиб. Р.Юсуповла тиладиличила бурибхIели, гIур пишвяхъили, иб:
— ВегIличи хIяжатикибси чи-виал­­ра разиварес чебси саби гьарил хIян­­­­чизарличибра, руководительли­чиб­­ра. Дила хIянчила хIекьлизир кIи­найс гъайдикIахIелли, дила пикрили, бархьли бири. Иш гьакIлис хIуни ну­ша­ла хIянчизар МяхIяммад-Загьир Бу­­дуновличил ихтилатбара, иличила бел­кIес гьатIира лайикьли бургар, нуван ахIи, вахъхIира узули сай, илис баркалла бикIутира камли хIебургар!
Ну кьабулрикили, Ш.Мусаевла кабинетлизирад дурарухъунра, Мя­хIям­­­мад-Загьир Будуновла кабинет­ли­чи гъамриубхIели, ила бухI­на­бу­хъес хIерти чумал адам чебаили, ил­дас ургарухъес хIейгули, чаркариуб­ра.
КIинайс МяхIяммад-Загьир район­на газетала редакциялизи вакIиб, ре­дак­цияла хIянчизар ПатIимат ГIяб­дул­лаевачил нуни дархьибти суал­тас жа­ваб­тира хиб, къугъаси ихти­латра бе­таур.
Иличил барибси ихтилат газета бучIантас гьалабирхьулра.
— ХIу чинав учIули калунри ва РФ-ла Пенсиябала Фондла Ахъушала районна отделениелизив мурт узес вехIихьири?
— Нуни 1991 ибил дуслизиб таманбарибси саби Дагъиста гидромелиоративный техникумла «Мелиорация и охрана земель» бикIуси факультет. Илис гIергъи учIес керхурра Дагъиста пачалихъла М.М. Жамбулатовла уличилси университетлизи, 2018 ибил дуслизиб заочно таманбарира «Экономика, бухгалтерский учёт и контроль» ибси уличилси факультет.
РФ-ла Пенсионный Фондла у гIер­гъиси замана барсбиуб, гьанна илис би­кIули саби «Социальный Фонд Рос­сии по Республике Дагестан». Ил Фондла районна отделениелизив узул­ра бекIливиубсигъуна специалистли. Ну сунезив узуси отделличи хъарси хIян­чи саби пенсия кабилзахъни.
— ХIебиалли, хIушала отделлизи дугьабилзутира камли хIебургар?
— Камли ахIен, сенахIенну ишар сари ирзути суалти сагали пенсия ка­бил­захъутала, ил чулахъдешла пен­сия кIинайс, дусмачи аби­киб­хIе­ли, барсбирутала ва гIяхI­цад цар­хIил­тира.
Ил хIянчиличив узулра 2001-ибил дусличивад, ишдуслизиб 25 дусла стаж абикиб, илис гьалав цар­хIил­ти мераначибра хIянчи барибсири ва лебилра ну узуси замана абиркули саби 42 дусличи.
— ХIела пикрили, хIукуматла хIянчиличив узуси адамла къайгъназиб бекIлибиубси се саби?
—Дила кьас саби ну чинав узули виаслира, набчи хъарси чебетаахъили таманбирни, дугьабилзути адамта­ла къуллукъ бухъян­хIе­би­тIа­хъи бекI­бирни. Ца адам гьи­му­кIахъал­­ли­ра хIян­чизарличила хабар ахъ­ка­бируси са­би гIяхIси ахIенси, «ит­гъуна, ишгъуна сай, адамла мурад биран ахIен» илира, цар­хIилти гIяйиб­ти имцIадарилира.
Ил багьандан бахъал адамтачил бархбасунси хIянчиличив узухIели де­бали пикриухъи, мяхIкамли виэс чеб­си саби гIяйиб-нягIнализи хIей­кес­ли узес багьандан.
— ХIушаб, лерилра узби-рузбас адамтас гIяхIти дяхI кадурцнила шайчиб гIибратли бетаурли бурги бегIти, чулира дебали жагали, чучила шанти гапбикIахъули калунти?
— Гьайгьайрагу, вегIла бегIтани дурибти гIякьлуми гьар бархIи гьандиркахъаллира хатIахIейкес багьандан кумекли детарути сари. Нушала бегIти халати хIякимти ахIенри, я вачар-чакар дузахъули хIебири. Илдала баракат сабри чула някъбани барибси бузери, ургубалаб биалра, хъулиб биалра. Дудеш, МяхIяммад Будунов, ЧебяхIси ВатIа дергъла бутIакьянчи сайри. Кьяркьти дусмира, дергъла авлахъличир къиян-жапара чедаили хьалли, паргъатти, гIяхIти уркIи-хIялла вегI вири. МалхIямси адам сарри нешра, «Неш—Игит» ибси уличи лайикьрикибси. Нуни илди чичи-биалра гьимбукIили чебаибти ахIенри, гIясибиубли, дурхIначи кьалли —чина хабара! Бунагь-хатIа урдуцаб чула, нушаб неш-дудеш мурт­лисалра гIибратли кавунти саби.
— ХIела гIямрула рархкья Сабият МяхIям­ма­довна, Ахъушала кIиибил школала учительница ва пергер хьунул адам сари. ХIушани дурхIназирра жавабкардеш, адамдеш адикьес къай­гъибирули дургудая?
— ГIячихъси саби, ишбархIила тя­хIяр-кьяй­да­лизир, дунъяличир дахъ­­даибхIели гьими-кьясра, дурхI­ни­ра, жагьилтира чеббалкIахъести аварара, гьарилла цаибси пикри уршби-рурсбала бяркъличила биэс гIягIнили саби, гьандикахъили вегIла бегIтала на­сихIятунира, дурхIнас вегI гIиб­ратли виэсра чебиркур.