Перзият Кьурбановна БяхIяндовала у дагъистанлантас гIяхIил тянишси саби. Халкьлис гIяхIдешуна риркьниличил хабардерхурси ил хьунул адамличила нушала республикализиб кьяйдали, илала дурабра бахъалгъунтани балуси саби. Илини черяхIти къуллукъуни дузахъули калунси риалра, адамдеш детхIехъахъиб, гIямрулизир бекIлидиубти, адаб-хIяяла дурхъати кьиматунас марли калун. Сунела гIямрулизир касибти лерил шабагъатуни, ахъибти ганзухъуни, раибти ахъанайти, гьар секIал Перзият БяхIяндовани сари-регIти цIакьаначил ва бамсри хIебалули рузниличил сархибти сари. Чи сейкIалра, гIямрулизиб халкьла хIурмат сархес, цархIилтас гIибратли виубли хIериэс гьамадси ахIен. Перзият Кьурбановна биалли, сецад къиянни биалра, халкьла гьанбикуназир сунечила гIяхIти пикруми калахъес, илдала хIурмат сархес бажардирикиб. Илала дурабад, илини халкьла миллатлашалси культура, мез, тарих мяхIкамдирнилизира халаси пай кабихьиб. Перзият Кьурбановна ралутанира ил адамлизир диэс дирути бегIлара гIяхIтигъунти къиликъуначил сипатрирули сари: хIянчиличи гъирачерси, гIякьлучерси, жагати куц-кабизличилси, умути адаб-хIяяличилси, бархьдеш дигуси, уркIецIичерси… ва гIурра дахъал цархIилтира. Эпитетунала къяй даимбарес вири, нушала мурад биалли, Перзият БяхIяндовала халкьлис дарибти гIяхIти баркьудлумачила бурни саби. Ил сабабли нуша, «Замана» газетала хIянчизарти, Перзият БяхIяндова акIубси бархIиличил бархбасахъи, иличи гьардакIира ва ихтилатбарира.
1939 ибил дусла августла цаличиб, Лавашала районна Жангамахьила шилизиб, Перзият БяхIяндовала уличилси шалда зубари абалкун, суненира лерилра алавти мер-муса, ва арагIебли Дагъистан шалабарибси. Секьяйдали? Сунела жагати ва кабизалачерти баркьудлумачил, умути адаб-хIяяличил, лерилра сунела гIямру адамтас кумекрикIес ибси мурадлис кьурбандарниличил. Илини гьанналис гьалаб кумекла някъ гьабатурти, чучирад гIямрула къияндешуни ахъдуцибти, масъулти арзибти адамтала кьадар бейгIес хIейрар, илцадра бахъал саби илди. Илдазирад гьачамалра баркаллала дугьбачи, яра цархIил гIяхIдешличи хIерси ахIенри Перзият Кьурбановна. Къияндешлизивси адам сунела хIерудила дурав ватес илала адаб-хIяяли кьабулбируси ахIен. ЧеряхIти адамдешла къиликъ ахIену гьатIи ил?
Перзиятлис риштIахIейчирад гIямрула анцIкьи-децI, гъамси адамла агри дяхIяэс чебуркъубсири. Шел дусла гIямрулизир ил ахIерси нешлизирад мяхIрумриуб. ЗягIипси неш чериуси риштIаси рурсилизир уркIецIи-руцIерила хIялани дургъутири. Илала назикти хъуцIрумачи лерилра хIянчи, узби ва рузи хIерудиличил гIеббурцни, ва цархIилти къайгъни хъардикибтири. РиштIаси Перзият сунела дудешли гIеррурцули риалра, цазаманализир илини хъали-цIала регIла ва халаси рузила къуллукъуни сунечи чекасилри, хъалибаргличила хIеруди ва гьар баркьудилизир чекаризурдеш дакIудирулри. ИтхIейчирад риэс Перзият Кьурбановна сари-алавтала децI буртIес, къияндешуни чекайсес бурсириубси ва гIямрула чIумаси дебш касибси.
ВерхIел дусла школа таманаили гIергъи, ил Буйнакъскла хьунул адамтала педучилищелизи карерхур. Багьудиличи иштяхIси, алавтачи уркIецIичерси Перзият БяхIяндова цаибти бурхIначирад преподавательтани хIясибрариб. БелчIудилизир бегIлара гьаларси жагьил рурсили педучилищела жамигIятла гIямрулизир кадиркути лерилра далдуцуназирра жигарла бутIакьяндеш дирутири.
Гьала-гьала студенткас ца дуслис белчIуди батес чебуркъуб, кьяш бячни багьандан. Челукьутачила цархIилтази бурес кьалли чина, гьатIира илдас сари кумекрикIес бурсириубси Перзиятли сунечил бархтасра жавабкардеш дихусири. Илгъунали ряркъурсири рурси неш-дудешли, сари акIубси ВатIай…
Педучилищелизиб касибси белчIуди лерилра гIямрулизиб багалабиуб. Училище таманаили гIергъи Перзият Кьурбановнас школализир урус мезла дурсри кадирхьахъес ихтияр бедибсири. Илгъуна ихтияр итхIели гьариллис бедлугуси хIебири. Бузерила гьуни Перзиятли школализиб бехIбихьиб. Шилизир бегI гьалаб белчIуди касибси хьунул адамтазирад цаибил сарри Перзият БяхIяндова. Учительницали рахъхIи рузес кьадархIебиуб илис, илала гьар секIайс сиптакардеш, гьаркьянала хIял-тIабигIят хIясибдарили, райкомла комсомоллизи рузахъес жирарибсири. ИлхIели гъал дусцун сарри Перзият риубси.
22 дусла гIямруличир Перзият дудешлизирадра мяхIрумриуб. Шилизиб хIурмат сархибси, адабчевси мурул адам вири илала дудеш Кьурбан ХIясайниевра, Жангамахьила сельсоветла председатель. ИтхIейс сарира хъалибаргла регI ретаурси Перзият Кьурбановнани калунти узбира рузира кьяшмачи тIашбатур, илдази багьуди касахъиб ва гIямрула бягIуси дякьличи дураиб.
Сунела гIямрула лерилра шалубазир Перзият БяхIяндова нушани гьаркья сарливан чериулра, гьар секIайзир низам-кьяйдаличи чекаризурси, бархьдешличи, адамтас пайдаласили риэс гьуцIси. Илдигъунтала мякьлав шаласи ва талихIчебси челябкьлаличи вирхулри. Комсомоллизир рузуси замана илини жагьилтира хIянчилизи битIикIутири, сунела жигарчебдешличил, гIяхIси ибсиличи хьул бетхIейхъахъниличил илдира уркIичеббирули.
ИшхIелла манзиллизиб чула лерилра гIямру халкьлис багъишладарибти адамти камли къаршибиркур. Перзият Кьурбановнани биалли, сунела гIямру халкьлис гIяхIдешлис пайдаладариб, вайра гIяхIра илдачил барх буртIули, кумекрикIули ва гьаларяхIцун рашули.
Райкомлизир сунела хIянчилизир диахъубти сархибдешуни ВЛКСМ-ла Дагъиста обкомли хIясибдариб, ва ВЛКСМ-ла XIV съездла делегатли рикIиб. Лавашала райкомла цаибил секретарь сарливан, Перзият БяхIяндова Дагъиста Правительствола партияла вакилтала кьукьялизи карерхахъурсири ва илала цалабяхълизир декIар-декIарти улкназир, шагьуртазир детурхути съездуначир бутIакьяндеш дирусири. Перзият БяхIяндова гьала-гьала Лавашала районна райсоветла депутатли гIур — МяхIячкъала шагьарла советла депутатли чуйнара рикIибсири. ИлхIели илала халкьличилси бархбас гьатIира имцIабиуб. ГIямрулизиб иличил къаршибикибтани гьаннара илала у баркаллаличил ва хIурматличил гьанбуршули лебал. Хъалибаргличира хIеруди бузахъули, сунечи хъарти гъамти адамтачила (шелра узира, ца рузира) хъумхIертули, къуллукъла хIянчира чебяхIси даражаличир детурхахъес гьамадси ахIен. Амма Перзият Кьурбановна гIядатла хьунул адам ахIен, бикIуливан, илини гIягIнибикалли, бурям булан тIашиуси рири. ГIяхIси хьунул, уркIи изуси рузи, лерилра дигIяндешуни далуси неш, жигарчерси гьаркья, духуси, гьала хили секIал пикрибируси политик сари ил.
Перзият БяхIяндовани бузерилизир чедиахъути сархибдешуни хIисаблизи кайсули, илини дузахъути къуллукъунала ганзухъ гьатIира ахъбикIулри. ХIера, ил МяхIячкъалала Ленинский райкомла партияла кIиибил секретарьли рикIиб. Илис гIергъи иткъира бамсри хIебалуси, жигарчерси Перзият Кьурбановнала гIямру садемцIурли дузути мирхъилайчи мешудикиб. Мирхъиван сарерхурли, лерилра сунечи хъарти хIянчи чебяхIси даражаличир детурхахъулри. Чус кумек хIяжатбикибти бахъал адамти дугьабилзутири иличи, цалра адам, илала мурад хIебарили, жаваб агарли хIетур…
1990 ибил дуслизир П.Кь.БяхIяндова ДР-ла социальный бяхIчибизлизиб халкь гIеббурцнила шайчирси министр рарибсири. СССР бехъубхIели, халкьла гIямрулис дебали къиянти дусми сарри. Къияндешуни сунечи чекайсес бурсириубси Перзият Кьурбановнани илхIелира мискинтала, гIямрулизиб къардбухъунтала масъулти ирзнилизир жигарла бутIакьяндеш дирулри. Улка къиянти аги-кьяйдализи бикибхIели, Россиялизиб бегI гьалаб илини сабри сунени бекIдеш дируси Министерстволизиб хъалибарглис ва биштIатас кумек гIеббиахъуси, илдала ихтиюрти далтахъуси отдел акIахъубси. Илала гъай хIясибли, сунечи кумекбарахъес дугьаизурси цалра адам, гIелавяхI чарварес риубси ахIен. Перзият БяхIяндовала гIяхIти баркьудлумачила сецад-дигара мисалти гьандушес вирар. Сепайда, биштIаси макьалализиб илини дарибти гIяхIти баркьудлумачила бурес гьамадли ахIен, сенахIенну илди бабза жузлизира кадарцахъес имканхIебикIур.
Адамти иличи бирхутири, чула гIямрулизиб бегIлара дурхъати, ахIерти секIал аманатдирутири. Перзият Кьурбановна сунела гъайлис марси, чесибси таманбируси адам риъниличила балули. Гьачамра МяхIячкъалала больницализи карихьунси, бебкIала бурушларси ца хьунул адамли иличи кагъар белкIунсири, суненира хъулиб калунти хIябал дурхIяличи хIеруди барахъес аманатбируси. Перзият Кьурбановна зягIипси хьунул адамла кагъар белчIицун хIеруибну, иличи больницализира гьарракIиб. Мажалислизирадси хьунул адамли сари гъамли рубкIниличила балулри, илала сегъунтилра тухумти аги, дурхIнала дудешра чумал дус гьалав бехIемцIлизи викили, алхири. Хьунул адамла дурхIначи хIеруди бареси адам аги, Перзият Кьурбановна халкьлис кумекрикIниличила, илала уркIецIичердешличила гIяхIцад хабурти дакьибси хьунул адамлира илис сабри кагъар бархьибси. Перзият БяхIяндова гIядатла, цархIилтачи мешуси хIяким хIериъниличила иргъулри халкьлира, цархIилван халкьла шайзирад илдицад дугьабизуни, масъулти ирзни секьяйдали баянбарес вирара…
ХIера, Перзият Кьурбановначи кагъар белкIи цугли жумягI дикибхIели, хьунул адам ахиратла хъули аррякьун. Горкомла партияла хIянчизартани хьунул адам бебкIала гIядатуни детерхахъурли, ил хIяририхьиб. Илала хIябалра цIуръабиубти дурхIя гIелаб калири, я илдачи хIеруди бареси тухумтира аги. Перзият Кьурбановнани илди сунела хIерудилиу касиб. Гьар жумягI илини кIел рузира илдала узира берк-бержла продуктуначил, палтар-кьяшличил гIеббурцутири. Илдала унраличирси хьунул адамли дурхIнас се камлил, се гIягIнилил бурулри. Илгъуна агилизиб Перзият БяхIяндовани гьар шайчибадси хIерудиличил гIеббуцили, дурхIни халабаахъиб, кьяшмачи тIашбатур, илдази чебяхIси даражала багьуди касахъиб. Рурсбазирад цали мединститут (ДГМА) белчIун, цархIилли — ДГПУ-ла бехIбихьудла классунала факультет, илдала узира МяхIячкъалала портлизив узулри. ЦIуръати дурхIнала гIямрулизир Перзият Кьурбановна илди мяхIкамбируси, бихIуси малаикгъуна сарри, гьар къияндикибхIели, хIяжатбикибхIели, илини гIямрула масъулти ирзутири. ДурхIнас ил цIябси дугилизиб гьуни чебиахъуси, шаласи зубари сарри, суненира илдала гIямру къелгIердикуси.
Хъулри шинни дицIили, кьакьалаб калунси хъалибарглисра илини камси заманала бухIнаб сагаси юрт тIашбатахъур. Перзият Кьурбановнани се барес алаврухъалра, хIянчи бетурхуси, гъай бузуси, бикIуливан, някъ кункси адам сари. Дахъал гъай агарси, баркьудила адамличи хасти къиликъуначилси илини халкьлис кумекбарес багьандан, сунезибад лябкьусигъуна бирусири, сунела имкантала дурабси биалли, лайикьти хIякимтачи хъарбирусири. Лебтачилра Перзият Кьурбановна ралрикибси ва гьарилличил гIягIниси тяхIярли гъайрикIес балуси сари.
Перзият Кьурбановнани сунени бируси бузерилизи лайикьти хIянчизарти, хIяжатти кабизуни дитIикIусири, гьачамалра илала гъайличи лехIхIейзурси, бедибси хъарбаркь таманхIебарибти биубти ахIен. Гьачамра иличи хьунул адамтала кьукья дугьабизур, чулара биштIати ДЦП-ла изайчил зягIипти. Илдала гъай хIясибли, республикализиб чула дурхIни сагъбируси цалра медицинала учреждение аги, дура арбашесра ахъри аги. Перзият Кьурбановнани ил масъала арзес чесиб. Итмадан илини итхIели дузути предприятиебала директорти бучили, лайикьти хъарбаркьуни дедиб. Илдани гIягIнити мер-муса даргиб ва илар хIянчи дехIдихьиб. Илкьяйдали Дагъистайзир социальный бяхIчибизла 5 учреждение дакIудухъун: балугълахIебиубти дурхIнала приют, хъалибарглис ва биштIатас социальный бяхIчибизла кумек гIеббиахъуси центр, биштIати сагъбирахъуси медико-социальный реабилитацияла центр, церебральный параличличил зягIипти арабируси центр, балугълахIебиубтас хасбарибси центр, илкьяйдали саби хIербиэс белгиси мер агартас социальный приют. Илди гьаннара дузули сари. Перзият БяхIяндовала бекIдешлиур республикала шагьуртазир ва районтазир чулахъунас, гьести гIямрула адамтас хасдарибти, илди хъули кабатурли, социальный бяхIчибизла къуллукъуначил гIеббурцути центрти акIахъубтири.
Сунени Министерстволис бекIдеш дирути дусмала духIнар П.К.БяхIяндовачи азирти баркаллала кагъурти дашутири. Соцзащитала шайчибси Федеральный Министерстволизибра илала бузери ахъли кьиматлабарибсири.
2002-ибил дусличирад 2013 ибил дусличи бикайчи Перзият БяхIяндова исполкомла руководительри, «Цаси Россия» партияла МяхIячкъалала мерличибси отделениела Политсоветла секретарьла заместительра сарри. Ил манзилличила гьанбиркахъули, Перзият Кьурбановнани бурули сари:
— «Цаси Россия»-ла МяхIячкъалала мерличибси отделениела «Махачкала – город нашей общей заботы» бикIуси бекIлибиубси проект бетурхахъули, нушани шагьарлизи ухIнаулхъути авалра шайчирадти мер-муса жагадарес ва ункъдарес ибти тяхIяр-кьяйда далдуцира. Ил шайчир юртанала гьаларти мер-муса, азбурти, гьундурачир черяхIкахъибти рекламала уркьли далдарес, лайикьти куц-кабизличи дикахъес хIяжатлири. Цаибси бутIализир нушани Петр I-ибилла ва Р.ХIямзатовла уличилти кьакьурби жагадирес дехIдихьибтири.
Баягъи проектла чумал мурад лертири. Нушани бегI гьалаб, нуша дахъал миллатунар республикализир хIердирули диъниличила хъумартес асухIебирар. Нушала мурадра гьарил шагьарланнис, илала миллатличи хIерхIеили, МяхIячкъала ахIерси мерли бетаахънилизиб саби.
Шагьар жагаси куцличи бикахъес багьандан П.К.БяхIяндовани иличи уркIи изути шагьарланти битIакIес, илди цалабяхъес, шагьарла бамсриихъути мер-муса жагадирнила шайчибси бузерилизир гьарилличи хъарти хIянчи белгидарес къайгъибарибсири. Шагьарла кабиз удатурти вавначил, урхIмешуахIенти къугъати вавнала клумбабачил жагабарибсири, чулира шагьарланти гIебшнила кьанси манзилличи бикайчи разибирути.
Перзият Кьурбановна Халкьла Собраниела депутатла къуллукъличирра калунси сари (2003-2011-ибти дусмазир). Бузерилизир диахъубти сархибдешуни багьандан ил ордентачил шабагъатларарибси сари: Гьалмагъдешла, «ХIурматла Лишан», «Дагъистан Республикала гьаларти сархибдешуни багьандан», илкьяйдали авал медальличилра, ДР-ла соцзащитала хIурматла хIянчизар сари.
2013 ибил дуслизиб Перзият БяхIяндовани «Тарихла-культурала букьур» бикIуси Дагъиста регионна жамигIятла организация акIахъуб ва гьаннара илини илар бекIдеш дирули сари. Пенсияличи дурарухъи хьалли, мурталра халкьлис манпагIятдирути баркьудлумала ахъанайтачи гьуцIси Перзият Кьурбановна хIянчи агарли риаркариэс хIерирар. Дагъиста халкьла кьисматличила мурталра пикририкIуси, илдачи уркIи изуси илини ишбархIира гIяхIцад проектуни гIямрулизир детурхахъули сари, сарира халкьла культуралашалти гIямру, миллатлашалси давла мяхIкамдирниличи дяхIчиаибти.
ХIера, илала бекIдешлиур ва сипталичил гIяхIцад жузи дурадулхъули сари, чулира даргала литературала, миллатлашалси культурала хазна давлачеббарибти. 2009-ибил дуслизиб Дагъиста халкьла поэт МяхIяммад ХIямидовличил барх Перзият БяхIяндовани сунела харжаначибли «Ахъли зайбикIен далай» бикIуси жуз дуракаиб. Перзият Кьурбановнани жявхIейчибад хIясиббарибсири далайбикIути гIяртистунани чузиб мягIна агарти, дацIти гъайла назмурти дучIни. Илис сабри чебяхIси поэзия бухIнабуцибти, устадешличил каргьурти, лайикьти назмуртала жуз балкьаахъес гIягIнидеш акIубсира.
Илис гIергъи, 2017 ибил дуслизиб, Перзият Кьурбановнани «Тарихла-культурала букьур» организацияла кумекличил, Хизри Юсуповла автордешличил «Даргала-урус мезла словарь» дураиб, сунезира 40000 дев, дугьбала цалабикуни ва терминти кадерхурси. Пикрибарая хIушани, лерилра миллатунала лерри саби-бегIти миллатла мезличил дураибти илдигъунти словарьти, дарганталацунри агарси. Мезлашалси гIилмулизибси ил масъалара Перзият Кьурбановнани арзиб. Лебтанилра балуливан, даргантала урусла-дарган мезла словарьцунри лебси. Халкьла культуралашалти гIямрулизиб биаб, жамигIятла, бекIахъудила гIямрулизиб биаб кайцIуси гьарил ганз Перзият Кьурбановнала бутIакьяндеш, кумек агарли бетурхуси ахIен. Халкьлис кумекрикIни ва илди гьар шайчибад гIеббурцни ил машгьурси хьунул адамла гIямрула бетуц-кабизли бетаурли саби. Илала сипталичил ва кумекличил дарганти литературала ва мезла хазна давлачеббарибти гIяхIцад жузачил бегIбиуб. Перзият Кьурбановнала кумекличил ва харжаначил гIурра гIяхIцад жузи дурадухъун. Илди-ургар декIардарес вирар Аминат ГIялихановани цалабяхъибси даргала поэзияла дудешли сайси ГIямарла Батирайличила жуз, Перзият БяхIяндовани цаладяхъибти «Дагъиста тарихлизиб машгьурбиубти дарганти» (Даргинцы знаменитые люди в истории Дагестана), «ГIяхIмадхан Абу-Бакар. Пергер адамла гIямру» (Ахмедан Абу-Бакар. Жизнь замечательного человека), «Лотос» издательстволизиб «ГIямарла Батирай» бикIуси назмуртала жуз, сунезира Эфенди Къапиевли ва МяхIяммад-Загьид Аминовли шурдатурти назмурти кадерхахъурси. Перзият БяхIяндовала бекIдешлиур дурадухъунти лерилра жузи районтала, шимала, шагьуртала библиотекабас пешкешдарибтири ва матъал бучIантас дутIибтири.
Перзият БяхIяндовани къелгIеббикуси баягъи организацияла бузери жузи, альбомти дурайъниличил таманбирули ахIен, илдани Р.ХIямзатовла уличилси Миллатла библиотекализир миллатла культура гьалабяхI арбикути ва гIеббурцути мажлисуни, жузала презентацияби, поэтуни-писательтала творчествола вечерти ва цархIилти далдуцуни дурадуркIули сари.
Челябкьлализиб се барес кьас леба или хьарбиулра илизи. Перзият БяхIяндовани даргала поэзиялис ва литературалис хьулчи кабихьибси ГIямарла Батирайлис ва Дагъиста кинематографиялис цаибси дякь кабердибси ГIяхIмадхан Абу-Бакарлис хасдарибти памятникуни тIашдатес пикри саби или буриб.
Гьарли-марли, Перзият Кьурбановнала бузерила, илини дурадуркIути хIянчурбала авид биштIаси макьалализи бухIнабуцес хIейрар, сенахIенну илини дирути хIянчи мекелли дахъал сари. Перзият Кьурбановнани сегъуна баркьуди, хIянчи бирули риалра, сунела замана, устадеш, цIакьани харждарили, уркIи кабихьили рузуси сари ил. Халкьла гIямрулизир бутIакьяндеш дирни сунела чеблализи халбируси, Перзият БяхIяндовагъуна гIур цархIил хьунул адам хIерургар.
Нушала миллатлашалси тарихлизир, культурализир къел гIелар датуртала уми чеалкIуси наслулизи дагьахъни, илдала уми даимдешлизир калахъни чараагарси чеблализи буйгIули сари Перзият Кьурбановнани. Иличибли сунела ура, тарихлизиб, халкьла уркIбазиб калахъес бажардирикиб ил ва халкьла гьарли-марси хъарихъли, чIумаси къакъбяхъли ретаурли сари. Дагъистанлантачи, даргантачи, арагIебли лебил халкьличи дигили вицIибси адамли ахIенси, сунела гIямру черяхIти баркьудлуми дирнилис багъишладарес хIейри. Сунела гIямрулизир Перзият БяхIяндова бахълис багалариуб, илизиб ахIену гьатIи, адам иш дунъяличи вакIнила мягIнара гьаргбируси? ЧевяхIсини адам алкIахъухIели кабихьибси дигIяндешра мягIнара илизиб саби — цархIилтас багалавиэс виубси адамличивра талихIчевси левси ахIен. Ил хIекьдешличила аргъили сари Перзият Кьурбановнанира.
Сунела гIямрулизиб бекIлибиубсиличила бурахъес тиладибарибхIелира, Перзият Кьурбановнани духуси хIерличил набчи хIерризурли, рикIар: «БегIлара гьалар ну адам сарра. Дила гIямрура халкьлис багъишладарира. Илизиб нуни селра тамашабизеси чебиули ахIенра…»
Лерилра сунела гIямрулизиб Перзият Кьурбановнани сунела адамдешла сипат чебяхIси даражаличиб, бекI къухIхIебуцесли, ахъли, ва чилалра гьалар урузхIериэсли бихIес риуб. Халкьлизибад баркаллаличи, яра цархIил шабагъатличи хIерли ахIенри ил, чIянкIли адамдешла чебла ахъес бажардирикиб…
Сари акIубси БархIиличил мубаракрирули, Перзият Кьурбановнас къаркъагъуна чIумаси арадеш, талихI ва эркинси баракат уркIи-уркIиларад дулгулра. Сари-алавтала дигили, ванадешли алавруцили, даршуси ва умуси заклиур духъянти гIямру деркIили дигулра.
ХIугъунти пергер адамти дунъяличиб гьатIиралра имцIабикIаб!
П.Сулайбанова
