Ахъушала районна кIел шилизирти бахъал дурхIнала дегIти хъалибаргунас пачалихъла шайзирад «Газель» машинаби дедиб.

Илди сабри ЧебяхI МулебкIила шилизибси ГIисаев Ражаб Жамалутдиновичла ва Урхьучимахьила шилизибси ГIябдусамадов ГIябдусамад  ГIябдулмаликовичла хъалибаргуни.

ЧебяхI МулебкIила шилизиб хIербирути Ражаб ГIисаевла ва Урзият ИмангIялиевала хъалибарглизиб урчIемал урши-рурси леб.  Илди дурхIни жагали абикьес багьандан,  даим бузерилизи ахъибтири. Ражаб ГIисаевли гьар журала хIянчи дирути сари: някъла устадешла, шоферла ва цархIилтира.

Урзият ИмангIялиева дурхIнас гIяхIси бяркъ бедес, хъа духIнарти хIянчи бекIдарес, хъалибарг уржибсили бетаахъес чекаризурли рирар. Илдала хъалибарг шила шантала хIурматличи лайикьбикибси саби.

Урхьучимахьилизиб хIербирути ГIябдусамад  ГIябдусамадовла  ва Марьям Юсуповала хъалибарглизибра урчIемал дурхIя халабиули саби.

ГIябдусамад ГIябдусамадов предпринимательли узули сай, хъалибарг абикьес багьандан, илдас кьулайси яшав кабихьес халаси къайгъи дакIубирули сай. Ил сунела дурхIнас гIяхIси бяркъ бедес, багьуди касахъес, гьар шайчибад илди гIеббуцес бажардилизив вирар.

Марьям Юсуповара  хъулирти хIянчи дирули, дурхIначи хIеруди бузахъули, хIеркарирули сари. Илди шила халкьла хIурматличил пайдалабикIули саби.

Илди хъалибаргунас гIяхIси кумек саби пачалихъла шайзибад машина.

Чула гIямрулизир сархибдешуни имцIадикIули, дурхIни талихIчебти бетаурли, хIербиэс кьадарбиахъаб Аллагьли чус!

Сабият ГIябдуллаева