Июльла 28-личиб Санкт-Петербурглизиб Россияла Урхьула-дявила ЦIакьанала парад бетурхули бирар. Гьар дусван, ишдусра ил хасбируси саби ВМФ-ла БархIилис.
1980 ибил дусличибад бехIбихьили, гьар дусла июльла бегIла гIергъиси алхIят бархIи Россияла урхьула–дявила флотла БархIилизи халбируси саби. Ишдус нушала улкализиб ил байрам июльла 28-личиб бетурхар.
Нуни иш макьалализиб бурес дигулра цугли хIябал дус Советский Союзла гIярмиялизиб урхьула–дявила флотлизиб къуллукъбарибси дила шан ва вахъхIила юлдаш, дила зилан МяхIяммад МяхIяммадовичличила. Бурес чебиркур, июльла 28-личив ил акIубсира сай. Сунела гIямрулизир мягIничерти кIел байрам къаршидикили сари ишдуслизир илис.
Наб иличил къаршивикес кьадарбиуб, сунени гIярмиялизир деркIибти бурхIначила бурахъес тиладибарира.
Гьари, чумал баян илала биографиялизирадра гьандуршис. МяхIяммад МяхIяммадович ХIяжибяхIяммадов акIубси сай 1947 ибил дуслизив Дахадаевла районна Дибгашила шилизив. 1961-1965-ибти дусмазив ил Сергокъалала педучилищелизив учIули калун (Ца дус гьалав нура ила учIес керхурсири). Педучилищелизив учIуси МяхIяммад, урибси тренер Рашид Рашидовличи азадли мушулбашнила секциябачи вашусири. ИтхIели ил «Урожай» ДСО-ла чемпион ветаурсири. Педучилище таманаибхIели, ил камси замана нушала унра Кьялкнила шилизив учительли узули калун. Илавад гIярмиялизиб къуллукъбарахъес арукиб. Илаб 3 дус къуллукъбарибси МяхIяммад Дахадаевла районна комсомолла райкомлизивра узули калунсири. ИлхIелира ил азадли мушулбашутала секциябачи ваши ва, районна мушлукьябала командаличил нушала республикала абзаначир бутIакьяндеш дири.
МяхIяммад МяхIяммадович Дибгашила урга даражала школализив учительлира — военрукли узули калунси сай. Илини илкьяйдали Дахадаевла районна 17 шила хозяйство сунези цахIнадяхъили, акIахъубси «Заря» совхозлизив хIянчи барибси саби. Гьанбиркур ил «Заря» совхозла парторганизацияла секретарьли узулира.
2005-ибил дусличивад вехIихьили, ХIяжибяхIяммадла МяхIяммад (Дибгашанти илис илкьяйда бикIар) МяхIячкъалализив дахъал квартирабала дегIти ахъти юртани тIашдалтуси прораб сай. Илини, нуни далути 5 халати юрт тIашдатурли сай: кIел юрт — Ирчи Къазакъла уличилси кьакьалар, кIел — Редукторный посёлоклизир, ца — таксибала паркла мякьлаб. Нуни хIедалути чум юрт тIашдатура илини гIуррара!?
Дила юлдаш, сунечи се хIянчи хъарбаралра, чебетаахъили бируси адам сай. Илини, сай-алавти адамтани сунела хIурматбиресли, хIериэс бала. Или хIебиалри, секьяйда хасси белчIуди кахIесибси ил Дагъиста урибси юртани тIашдалтан ветаэс вирусири? Нуни иличила хьарбаибхIели, гIярмиялизиб къуллукъбирухIели, дебшладиубти сари сунела хIял-тIабигIят или бурибсири МяхIяммадли. ГIе, бархьсира саби, гIярмиялизи бикути 18 дусла гIулухъаби, гъубзни бетаурли, илабад чарбулхъули бирар. Урхьула-дявила ЦIакьаназибадтикIун – гIяхIгъубзни бетаурли. Ил багьандан бургар нушала республикализибадти жагьилти гIярмиялизи букьес къайгъилизибтира.
ХIера, МяхIяммадлара дилара ишгъуна ихтилатра бетаур.
— Секьяйда хIу урхьула–дявила флотлизи викибсири, МяхIяммад? – хьарикIулра ну илизи.
— Нуша призывникунази хьарбаибсири, сегъунти гIяскуртазиб къуллукъбарес дигулрая хIушаб или. Нуни урхьула-дявила гIяскуртазиб или саркъахъили бурира. Ну вархьли ЦIудара урхьуличи арукибсири. Илав, Севастопольлизив, 3 баз учебкализив учIахъули ватурра ва гIур 3 баз — спортротализив мушулвашахъули. Россияла Югла Ярагъладарибти ЦIакьанала ургабси азадли мушулбашнила чемпионатличиб нуни хIябэсил мер буцибсири. ИлхIели наб СССР-ла спортла мастерличи кандидатла у гибсири.
1967 ибил дуслизив нуни Каспийская флотилиялизиб, Бакулизиб торпедабани иртути катертала дивизионнизиб къуллукъбирули вираси. ТК-1001-личив электрик-рулевойли 1969 ибил дусличи бикайчи калунра.
— ГIяхIцад дусми ардякьи сари итхIейчирад. Или биалра, хIейишира, МяхIяммад, гIярмиялизиб биубси сегъуна-биалра тамашаласи анцIбукьличила гьанбушес?
— ХIуни бакьибсив Дербентла итил шайчиб, урхьула дублаб гъумлизиб, тIашси самолётличила. Ил «чудо-юдолис» Лунь бикIули саби. Ил самолётра саби, пароходра. Ил шинничибадра башес бируси саби, гьаваличибадра. 1967 ибил дуслизиб Каспи урхьуличиб цаибил илгъуна самолётла хIялумцIни дураберкIибсири, бирарал ил урцес яра хIебирарал. Иличила дурала улкнази хIебагьахъес, илис ва ил барес бузутас зарал хIебарахъес нушала катер къарауйчиб бирусири. Гьалаб нуни иличила чизилра бурибси ахIенри, гьанна буралра асубирар.
— ГIяжабли балас нуни ил хIу викIуси секIал. Илис «Каспийский монстр» бикIулира бирар. Нуша, редакцияла хIянчизарти, ил чебаэс дякьунтири. Бархьли бурасли, ну иличи гъамхIейубра. Нуни иличила кино бархли чебаира. «ДягIличив гьалаулхъули» («Обгоняя ветер») бикIар ил кинолис. Селис гIягIнисири, дахъал харжанира дарили, ил урхьуличиб башуси аждагьа дакIубарес?
— ИтхIели иличи халаси пахру бирусири нушани. Урхьуличибра закличибра башуси. Илцадра хъярхъси (илини сягIятли 500 км. ахъес бирусири) ва чилалра агарси. Иличилти лерилра хIянчи дигIянали дирутири.
— Гьари, дила юлдаш, балтехIе ил аждагьа сунела мерличиб ва хIечила гъайдикIехIе. ГIур се бурес вируда гIярмиялизирти хIела гIямруличила?
— Бакулизиб, Каспийская флотилияла политотделлизиб, нуни Комсомолла чебяхIси даражала школа таманбарира. ГIярмиялизивад чарухъунси ну сагати багьудлумачи вегIварес урегна гIурра гIярмиялизи укибсири. МяхIячкъалализи, Бакулизи ва Кронштадтлизи. ГIярмиялизив ну цаибил статьяла старшинали вирусири. Кронштадтлизиб наб запасла лейтенантла у гибсири.
— Нуни гьанна саби багьурси хIу урхьула-дявила ЦIакьанала офицер виъни, юлдаш МяхIяммад. Нуни балуливан, хIела узи ГIябдуллара ВМС-лизив къуллукъбирули калунси сай. Се бурес вируда иличила?
— Дила виштIасигъуна узи ГIябдулла хIябалра дус шинна удибад башуси (подводная лодка) гамиличиб къуллукъбирули калунси сай. Илра цаибил статьяла старшина вирусири.
— Баркалла хIед набчил ихтилатбарес разивикнилис. ХIу нуни мубараквирулри бегI гьалав хIу акIубси бархIиличил, кIинайс, Россияла урхьула-дявила флотла БархIиличил ва хIяйнайсра, челябкьуси хъулри лушутала БархIиличил. Арадеш хIед ва хIела хъалибарглис!
ХIяжимурад Ражабов
