Дарганти, губдалан бегIтала урши, Нур­мя­хIям­мад МяхIям­мад­ся­гIи­до­­вич Шагьнавазов 1965 ибил дус­­­лизив МяхIячкъалализив ­акIуб­си­ ва халаваибси сай. Боксла спорт­ли­зи ил 11 дус виубхIели вакIиб. ­Ил­да­ла хъалибаргличил ца юртлизив хIе­ри­руси, дурхIни боксличи бурсибируси ­тре­нер Юрий Мирзабекянни, ­сер­хур­­­си уршиличи пикри бяхIчиаиб ва су­нела хIеридилиув боксли вир­кьа­хъес бур­сивариб.  Бара 13 дус виуб­хIе­ли, боксла тренер АрслангIяли Мур­та­­за­гIя­лиевли пагьмучевси гIулухъа су­нела хIе­рудилиу уциб. Н.Шагьнавазов гьа­ла­на­чи дурхIнала, гIур гIулухъабала аб­за­­назив чедибдешуни сархули бокс­лизи ахъиб.

Европала чемпионатличи аркьути СССР-ла спортсменти чеббиркIути (отборочные матчи) абзаназив Нур­мя­хIяммад Шагьнавазов гьачамалра, чисалра удихIейкили цаибил мерличи дуравхъун, Европала боксла чемпионатлизир бутIакьяндеш дарес, сунес гьуни гьаргбариб.

1985 ибил дусла Европала боксла чемпионат Будапештлизиб, Венгриялизиб бетерхур. НурмяхIяммад Шагьнавазов 81 килограммла битIакIла спортсменти-ургар детерхурти абзаназив чедиикили, финаллизи дуравхъун. Иличил, чемпион чеввиркIуси абзла рингличи, ФРГ-лизивадси Маркус Ботт дуравхъун.

«БегI гьалав дуравхъунси (дебютант), сунечи сай вирхуси, цIакьси», — илди дугьби тикрардирулри Н.Шагьнавазовличила чула пикруми дурули гъайбикIути коментатортани.

Гьанна ютублизирти абзанала видеобачи хIербикIутани, «илгъунари СССР-ла спорт, ил саби жагадеш, ил саби чебяхIдеш», — илдигъунти цархIилтира дугьбачил кьиматлабирули саби, Германиялизивадси Маркус Боттличилси НурмяхIяммад Шагьнавазовла абз.

НурмяхIяммад Шагьнавазовли Маркус Ботт чедиикахъес сегъунтилра имканти хIедатур. Бирхаудичебси чедибдешличил, 20 дус виубси НурмяхIяммад Шагьнавазов Европала чемпион ветаур. Бахъал спорт дигути адамтала ургав машгьуриуб ил. Илала халахIерхудеш, адабчевдеш, цархIилтала уркIи иргъни, бахълис гIяхIбилзулри. Дагъиста дурхIни Н.Шагьнавазовличи мешути бетаэс пикрибикIулри.

Илала гIергъи дехIдихьиб вокзалти, аэропортуни, кахIедурхути абзани, дунъяличиб машгьурти адамтачил гьунибаъниби.

1988 ибил дуслизир югла шайчибси Кореяла тах шагьар Сеуллизир дунъяла 24 ибти Олимпиадала хIязани детурхулри. Илар бутIакьяндеш дирулри НурмяхIяммад Шагьнавазовлира. Дагъиста халкьли иличила балулри, адамти телевизорлизир чедиахъути абзаначи, лерилра чула дирути дархьдатурли, хIербикIулри. ХIянчурбачиб, кьакьализиб, халкь къаршибиркути мераначиб, чинабалра нушала спортсменна гьунартачила гъайбикIулри. Сунела битIакIлизибти лебилра спортсменти-ургаб НурмяхIяммадли чедибдеш сархиб ва хIязанала финаллизи дуравхъун.

БегIла гIергъиси абзлизив финаллизивра, лебилра дунъяла халкь хIербикIахъули, сунела къаршикарличивад НурмяхIяммад Шагьнавазов чедиикиб. Амма илабти судьяби бархьдешличи кабизес хIебиуб. Балу-балули удиикибсила някъ ахъбуциб. НурмяхIяммадлис цIуба арцла медаль бедиб, амма илала гъабзадешла, адамдешла, яхI-ламусла хабар лебилра дунъяличи тIинтIбиуб. Дунъяла лебилра бокс дигахъутас ил гьарли-марси Олимпиадала чемпион ветаур. НурмяхIяммад Шагьнавазов даргала миллатла халкьли пахрубируси игит ветаур.

ГIур кьанниван ил абзличила гъай­и­кIу­ли, НурмяхIяммад Шанавазов сегъуналра халаверхурдеш агарли, «абзлизир кIилалра цIакьани цагъунти сарри», — ви­кIули сай. Ил чичилра гIяйибта виркьули ахIен.

24 ибти Олимпиадала хIязани, СССР-ла командали бутIакьяндеш да­риб­ти бегIлара гIергъити хIязани детаур. 25 ибти хIязани дакIибхIели, СССР бехъубли Россия калири.

Дила чумал суаллис НурмяхIяммад Шагьнавазовли гIергъити жавабти гиб.

«Арцличила, яшавличила пикриикIули спортлизиб чедибдеш сархес вируси ахIен, абзлизи дуравхъунхIели селрайчибра гьалаб чедибдеш чебиэс гIягIниси саби. ГIур кьанниван, арцличила, гIямрула даражаличила пикриухъес асубирар.Спортла журала палтарли бегIбиубти, хъуцIарличи биштIаси тавра гIелахъибти, гьалакли ганзбикIути гIулухъаби чебаасли, уркIи разибирар. Илди спортлизи ахъили биалли, дурхIнани бархьси гьуни чеббикIили саби. Сунела гьунар сегъуна сабил багьес дигусилис вакIили спортла заллизи, сунес дигиаурси жура чеббикIалли, илини спорт се сабил иргъу. Арадешлис гIяхIла шайчиб асар бетарар, чедиикес хьуликIусилис биалли, тренировкаби дархьдалтес асухIебирар. Ил цархIилтиванра ахIи, 15 минут имцIали спортла заллизив калес чебиркур. Чархла гьунар имцIабирахъули спортли виркьес гIягIниси саби. Чемпион ветаэс багьандан, спортлис лерилра цIакьани харждарес хIяжатсигу».

НурмяхIяммадли бахъал сунечил абзлизи дурабухъунтала, илдала тренертала уми, илдани диахъубти сархибде­шуни далулри. Уми, фамилияби, дусми, абзани гьандуршули гъайикIулри. Илини сунела къаршикартала хIурмат­би­рули виъни чебаэслири.

«Спортлизиб, кIелра спортсмен цаван хIядурбиубли биалли, имцIаливан гьарбизурси чедииркур. Ил багьандан сархибдешуначила илцадра гапикIес асухIебирар», — илгъуна пикрира буриб НурмяхIяммадли.

НурмяхIяммад Шагьнавазов СССР-ла урибси спортла мастер, машгьурси хабарла СССР-ла боксер сайри.

Ил 1990 ибил дуслизив санигIят хIясибли боксер ветаур. Чумал абзлизи дуравхъун, кIина чедиикиб, кIел абз цалра чедихIебикили тамандиуб. Нур­мяхIяммад Шагьнавазовли, бегIтала тилади чекасили, боксла санигIят бархь­батур. Ил Бузай Ибрагьимовла уличилси, олимпиадаличи спортсменти хIядурбируси школализив тренерли узес вехIихьиб.

Илини МяхIячкъалализиб политехнический институт таманбарили инженер-строительла санигIят касибсири, амма СССР бехъубли гIергъи, Дагъистайзир хъулри лушули ахIенри. СанигIят хIясибли узес бетхIеур.

ЖамигIятла политикализив узес вехIихьиб, «Россияла патриотуни» партияла Дагъистайзибси отделениела гьавкьяна сай. 2011 ибил дуслизив Дагъиста Халкьла Собраниела депутат ветаур.

Дагъиста ЖамигIятла палатализивра социальный бяхIчизла къуллукъуни дузахъули калун.

НурмяхIяммад Шагьнавазов гьанна бусягIят ХIяйдарбек ХIяйдарбековла спортла школализив боксла тренерли узули сай. Илини спортличил барх дурхIни гIяхIти адамтира бетарахъули сай. Илди держлизи, папрус битIикнилизи, гьавла хIязанази хIейхъахъули, халатала, бегIтала хIурматбирутили, бяркъчебтили бетарахъули сай. ДурхIнас илгъуна бяркъ бедни биалли, спортла чедибдешуначибра мягIничебси саби.

Гьанна дунъя барсбиубли саби, дурхIни улкала чемпионти бетаэс хьулбикIули ахIен, бахъалгъунти дахъал арц дарес пикрибикIули саби, ил­хIелира, цацабехIтас арц секьяйда дараллира декIардеш агара.

Илдигъунти пикруми нушачи западла улнани дихули сари, гьайгьайрагу, арцличил дахъал секIал сархес вирули сай, амма арцли гIяхIгъабза ветхIерахъу, адам гIяхIгъабза хIейалли, илала арцлира чисалра гIяхIдеш хIеху.

НурмяхIяммад Шагьнавазов уршила ва кIел рурсила дудеш сай. Илала уршира спортсмен сай. Ил валути, лебилра адамти, иличила гIяхIси, малхIямси, халахIерхуси, вархьси бикIули саби. Адамлис халкьли кабатурси илгъуна кьимат, чемпионна уличибра дурхъаси саби. НурмяхIяммад Шагьнавазовлис чIумаси арадеш, хъалибарглизиб талихI, дунъяличиб даршудеш ва бархьдеш дулгехIе. Бархьдеш бузуси мерличив ил чеввикIибси гъабза сай.

«БегI гьалабси яргализив дурхIя спортлизи ахъахъес чебиркур, кьакьаларти вайти асуртазивад ил декIарли виахъес багьандан. Илизир пергер хIял-тIабигIятра, гъабзадешла ва низам-кьяйда дузахъниличи чекайзнила къиликъунира адикьес гIягIнили сари».

Муъминат Хаттаева