Милицияла майор ГIяллаев Арслан ГIябдулкьадирович акIубсири 1973 ибил дусла июльла 29-личив Дахадаевла районна УргIерила шилизив.

Илини 1994 ибил дуслизиб духIнарти къуллукъунала органтазиб сунела бузери бехIбихьибсири.

Къуллукъбируси манзиллизир илини чуйнара дявила къалабати, хасти далдуцуназир бутIакьяндеш дарибтири.

Вайнукьабала ярагъладарибти кьукьни республикализи духIнадерхурхIейчирад ва илди тIутIукьякьядарибхIейчирад ишдус 25 дус дикили сари.

Арслан ГIябдулкьадировичлира бутIакьяндеш дарибтири итхIели кадикибти дявила анцIбукьуназир.

А.ГI.ГIяллаев, сунечи хъардарибти хъарбаркьуни ламусличил тамандирни багьандан, ил чуйнара шабагъатлаварибсири.

2010-ибил дусла сентябрьла 10-личир майор А.ГI.ГIяллаевли ДР-лизибси МВД-ла милицияла спецназла отрядличил варх республикала ца шилизибси юртлизиб дигIянбикибти къачагъунала кьукьялизибадти вайнукьаби белгибирнила ахтардлуми дурадуркIнилизир бутIакьяндеш дарибтири.

ИлхIели, сунела санигIят хIясибли хъарбаркь таманбирухIели, вайнукьабала ламартла хIярхIяли гIяхIгъабзала гIямру дайдяхъибтири. Вяхъибси майор, хъарбаркь таманбарайчи мукIурхIекIили, ВатIайс ламусличил къуллукъбирули бедибси хъялис марли калунсири…

Сунела къуллукъ мардешличил бузахъни ва хъарбаркь таманбирухIели игитдеш дакIударни багьандан Россияла Федерацияла Президентла ХIукмуличил Арслан ГIябдулкьадирович ГIяллаев Гъабзадешла орденничил шабагъатлаварибсири (вебкIили гIергъи).

Ишди бурхIназиб Каспийск шагьарлизиб ил багьадурла хIурматлис хъумхIертнила уркьули абхьиб.

Дахадаевла районна администрацияла пресс-служба