РухIлашал гъамти ва тамашалати адамтачил ихтилат дурабуркIни халаси талихI саби. Гьанна чумал дус Даргала театрлизиб «Аксиоль» ибси уличил вегIла пикруми-хIерани хIясибли ихтилатуни дурадуркIуси клуб бузули саби. Жяв заманала грекуначибад нушачи баибси «аксио» девли «дурхъадеш» ибси мягIна бухIнабуцили саби. Иличиблира аргъеслигу баягъи ил клубли адамтачилси ихтилатла дурхъадешличила иргъахъули биъни. Францияла писатель ва дявила лётчик Антуан де Сент-Экзюперинира сунела «Земля людей» бикIуси романнизиб белкIунсири: «Гьарли-марси дурхъадеш саби адамла ихтилат».
Гьалабван Избербаш шагьарла культурала КIялгIялизибси культурала-багьудила «Этнодвор» бикIуси центрлизиб РФ-ла ва ДР-ла искусствобала урибси хIяракатчи, Даргала театрла художестволашалси руководитель ва пагьмучевси режиссёр Мустапа ГIябдиевич Ибрагьимовличил гьунибаъни бетерхур.
«Аксиоль» клублис бекIдеш дируси Издаг Ибрагьимовани шагьарла центральная библиотекала хIянчизартачил барх дураберкIибсири ил балбуц. Илар Даргала театрла гIяртистунанира театрла искусство ва творчество дигахъутанира бутIакьяндеш дариб.
Мустапа ГIябдиевичли сунела гIямрулизир кадикибти тамашала анцIбукьуначила буриб, даргала поэтунала, илдала лугIилизив – ДР-ла халкьла поэт Сулайбан Рабадановлара назмурти делчIун. Театрлис сунела лерилра гIямру харждарибси режиссёрли илкьяйдали санигIятлизир касибти устадешличилара буриб.
Ленинградла театрла, музыкала ва киноби дурайутала институт хъараахъурси Мустапа ГIябдиевич бамсриагарси бузериличил ва миллатла искусство гьалабяхI башахънилизи белгиси пай кабирхьниличил нушала республикализивцунра ахIи, илала дуравра машгьуриубли сай. Илала гIямрула бягIуси гьуни бехIбихьибсири Сергокъалала районна ГIяймаумахьила школализибси белчIудиличибад. ИтхIели виштIаси Мустапа Ибрагьимов шила школализиб урусла ва даргала мезанала давла халаси иштяхIличил руркъес вехIихьибсири. Ил давла илини бекIлибиубси макьамли бетаахъурли, лерилра гIямрулизиб барх бихули сай.
1961 ибил дусличивад вехIихьили (Даргала театр акIахъубси дус) Мустапа ГIябдиевич гьаланачи гIяртистли, кIинайс – театрла литературала бутIала заведующийли, гIур режиссёрли узусири. БусягIятла замана илини Даргала театрла художестволашалси руководительла къуллукъуни дузахъули сай. Дахъал дусмазиб театрла пагьмучебси коллектив устадешличил сценаличиб бузни илала сархибдеш саби.
Балбуцла бутIакьянчибачилси культурала хIяракатчила ихтилат сягIятличибра имцIали бухъянбитIун ва лебтасалра гIяхIбизур.
Мустапа ГIябдиевичли «Аксиоль» клубла вакилтас Даргала театр 60 дус биънила хIурматлис сунени дураибти жузи пешкешдариб.
Маргарита Арсланбекова, ГI.Батирайла уличилси Даргала театрла жамигIятличилти бархбасунала шайчирси специалист
