Чакарла изала – ил бахъхIи биубси, багьла-багьлали тIинтIбируси изала саби. Ванзаличив гьарил вецIъибил адам чакарла изайзи виркули сай.
Илини хIилизибси глюкозала кьадар ахъбирахъуси саби. Глюкоза биалли – нушала кьаркьайс хIяжатти секIултазибад ца саби. Ил нушаб лугули саби хурегли. Илкьяйдали бетаэс бирули саби дулекIлизир лерти гликогенна сурсатуназибадра. Хурег кьикIа канилизи ва дарг-махлизи биркуси саби, илаб ил глюкоза акIубли, ашалгьуси саби. КIинайс глюкоза хIилизи биркур ва лебилра чархлизи тIинтIбирар. Ил пайдалабируси саби цIакьани лугуси хьулчи кьяйдали.
Чакарла изала леб биалли, хуреглизибад цIакь кайснила тяхIяр зараллизи биркур. Глюкоза клеткабази бикес хIебирар ва халаси кьадарлизиб хIилизиб кавлан.
ХIилизиб халаси кьадарлизиб глюкоза лебнили ишдигъунти лишанти алкIахъа: кьакла берубдеш, милиги, зумали жихIличи вашни, цIакьагардеш, хъярхъли чархла битIакI гIяшбирни, усес дигни, чархла кам букни, хIулбала шала вайтIабикни, биркIанти зимдикIни, кьяшми изни.
Илдигъунти лишанти дагьардухъунхIели, чараагарли тухтурличи дугьаизес чебиркур, бацI уркIиличиб хIилизибси чакарла кьадар белгибарес, ва чакарла изала лебал-агарал багьес багьандан.
Чакарла изала алкIахъес асубирути тяхIяр-кьяйдара лерти сари: чархла битIакI имцIали биъни, камли вяшикIни, имцIали калорияби лебси хурег букни, бегIтала ва гъамтала чакарла изала лебни, дурхIялис раибси замана хIилизиб глюкозала кьадар имцIали биъни, гьести гIямру. Илдигъунти аги-кьяйда алкIули диалли, чакарла изала лебал белгибарес, тухтурличи дугьадилзеная.
Заманаличиб ил белгибарнили ва арадеш къулайбирнила тяхIурти далдуцнили, изайчи хIеруди барахъес ва декIти асурти хIедиахъес имканбикIахъу.
Илдигъунти лишанти хIушала яра хIушала хъалибарглизивад чила-биалра якьиндиубли диалли, хIердируси мер хIясибли тухтурличи, ва республикала диагностический центрлизи эндокринологличи насихIятуни дурахъес дугьадизес дирудая. Иш гIергъиси телефонна номер хIясиблира зянкъдяхъес дирудая: 8 (8722) 51-46-10.
Нушала адрес: МяхIячкъала шагьар, МяхIяммадтIагьировла уличилси кьакьа, 172 Б, ДР-ла «Республикала диагностический центр» ГБУ.
Нушала Центрлизиб халати устадеш лерти, улкала медицинала гьаркьяти Центртазир багьудлуми касибти, хIушаб кумекбарес хIядурти специалистуни бузули саби.
