Тарихла бяхIяназир Каспи урхьуличила баянти гIярабунала тарихчи Ибну Мискавейхла белкIаназир лер, жявхIейчирад 943 ибил дуслизирадал Персиялизи ва Ширваннизи иличирад гамурбачил вачарла архIяби дурадуркIниличилара дархли. Нушани биалли ХVIII ибил даршдусличибад бехIбихьили, Каспийскла флотилияличила тарихла бяхIяни гьаладирхьехIе.
ХVIII ибил даршдусла бехIбихьудличиб Петр I-ибилли Каспила урхьула дуб буцес кьасбарибсири, амма илала гьунчиб Персия лебри. Ил багьандан 1704-ибил дуслизиб Казаньнизиб адмиралтейство акIахъубли, 200 хIеркIличирад дашути ва 45 диштIати дявила портаназир дузахъести гамурби дирес бехIбихьибтири.
Петр I-ибилла хъарбаркь хIясибли, Преображенский полкла капитан Александр Бекович-Черкасскийли 1715-1716-ибти дусмазив востокла шайчибси Каспила урхьула дубла хIялумцIурсири.
1722 ибил дусла июльличив сай Петр I-ибилла бекIдешлиуб Астраханьнизибад десант Каспила урхьулизи дурабухъунсири. Персидский архIяла манзил урусла гIяскуртани Дербент буцибсири. Ноябрь базличиб биалли, Петр I-ибилла хъарбаркь хIясибли Астраханьнизиб дявила порт ва дявила флотилия акIахъубтири.
Пача Петр I-ибил вебкIили гIергъи, урусуналара туркуналара ургар ибкьти аги-кьяйда акIубтири. Персияличилти даршути бархбасуни калахъес хIяжатлири. 1732 ибил дусла Рештский вягIда хIясибли ва 1735 ибил дусла Гянджинский халкьани-ургабси вягIда хIясибли, лерил Каспи-алавти мерани Персиялис чардарибтири.
1781 ибил дуслизиб 2-ибил рангла капитан, граф Марко Войновичли Астраханьнизиб 20 пушкаличилти ва цархIилтира гамурбачил отряд акIахъубсири. Ил Каспила юго-востокла шайчибси Астрабадский заливлизи, Миян-Кала бикIуси байхъу островличи шурбатурсири. Илаб урусунала колония акIахъубли, иларад гамурбани духби дихутири, вачарла масаначилти гамурбас къараулбирусири.
1813 ибил дуслизиб Гюлистанничилси даршудешла вягIда бигьунхIейчибад Россияла Каспи урхьуличиб дявила флот бихIес ихтияр дакIубиубсири. 1812-1818-ибти дусмазиб Казаньнизир флотилиялис дявила къараулбирути гамурби тIашдатуртири. 1821 ибил дуслизив «Казань» бикIуси гамиличив Н.Муравьевли туркментала шайчибси урхьула дубла хIялумцIнила экспедиция дураберкIибсири.
1842 ибил дусличибад 1917 ибил дусличи бикайчи Каспийскла флотилияла гамурби мурталра Астрабадла станциялизир, Ашур-Ада островличир ва Энзели портлизир мерладирутири.
1860 ибти дусмачибад Каспи урхьула Атлас цалабирхъес бехIбихьиб ва цазаманализиб дявила ва вачарла гамурбас урехи хIебиахъес багьандан Апшеронна байхъу островличиб ва Бакула портличиб маякуни ункъдарибтири.
Астраханьна порт 1867 ибил дуслизиб агарбиубхIели, Каспийскла флотилияла бекIлидиубти цIакьани Бакулизибси базализи шурдухъи, Ашур-Адаличир Астрабадла станциялизи кадерхуртири.
Каспийскла флотилиялис дявила гамурби тIашдалтнила хIянчи даимдиуб. XIX – даршдуслизиб илис 4 – 16 пушкаличилти, 3 – тупани иртути, гьарилличир 16 туп мерладарибти, 22 — ярагъладарибти пароход, 18 — бриг журала гами ва 30–цад цархIил журала гами.
XIX даршдусла ахирличиб Каспи урхьуличир набт адилтIнила хIянчи дехIдихьиб. ХIера, илхIели сабри Каспи урхьуличи дунъяла улкнала пикри битIакIибси. Ит манзиллизиб Каспийскла флотилияла база Баку бетаур. 1880-1885-ибти дусмазир цаибти танкерти дакIубиубтири. ГIергъити дусмазир 133 парличил ва 212 ялканначил дашути шинкIати духби дихути гамурби лертири. Иличибли набт дунъяла улкначи биахъес имканти дакIудиубтири.
Дунъяла Цаибил дергъла манзил флотилиялизир Бакула дявила порт, урхьула станция, 2 пароход, 2 халати гами, 2 артиллерияла ярагъличилти гами, флотла рота, 30 офицер, 18 кондуктор, 500-цад унтер-офицер ва матрос лебтири. Флотилияла бекIлидиубти масъулти сарри Каспи урхьуличибси вачарла ва бялихъунала шайчибси бузерилис урехи хIебиахъни, Ираннизирти урусунала вачарла-промышленностьла хIяжатуни далтахъни.
Граждан дергъла манзил, Астраханьна крайла дявила Советла хIукму хIясибли, ХIунтIена ГIярмияла Астраханьна-Каспила дявила флотилия акIахъубсири. Ил цIакьбарибсири Балтила флотла ва Волгала дявила флотилияла гамурбани.
Флотилияла цIакьани хIябал бутIаличи дутIибтири: Северла хIуркIбала (Царицынола удир), Югла хIуркIбала (Удибси Волгаличир) ва Урхьула (Каспи урхьуличир).
1920-ибил дуслизиб Волжско-Каспийскла флотилияла цIакьаначил Каспийскла ЦIуба флотилия буцибсири, англичанти-интервентуни ва цIубабала кьукьни Ираннизи бебшибтири. Флотилияла гамурби Бакулизи чардухъунтири. Илкьяйдали цIубабази дедили калунти англичантала торпедаличилти катерти ва гидроплантира керасибтири.
1931 ибил дуслизиб СССР–ла Каспийскла дявила флотилия акIубсири, илизи кадерхуртири союзла республикабала гамурби, илди-ургар Азербайжанна флотилиялизир калунти «Карс», «Ардаган».
ЧебяхIси ВатIа дергъ бехIбихьибхIели, каспийлантани урхьначир ахтардила къуллукъуни дузахъутири. 1941 ибил дуслизиб Закавказьела дявила округличил цалабикибтири ва Ираннизиб дявила балбуц дураберкIили, горно-стрелковый полкла десант кабатурли Ленкоранила шайчибси урхьула дуб цIакьбарибсири. Каспийскла флотилияли дявтала манзил Пехлеви, Ноушехр, Бендер-шах Иранна портуназиб къуллукъбирусири. 1942 ибил дуслизиб Каспийскла флотилияли Бакулизирад Астраханьнизи ва Красноводсклизи дихути бегI гьалабси яргализир набт ва Ираннизирад северлизи духби дихнилис урехи хIебиахъес къуллукъбирусири. Граждан ва ЧебяхIси ВатIа дургъбазир чедаахъибти дявила сархибдешуни багьандан ХIунтIена Байрахъла орденничил шабагъатлабарибсири.
Дявила гIергъити дусмазир флотилия регионнизир къуллукъуни дузахъес даимбиуб. Флотилияла полигонничир мурталра сагати ярагъла хIялумцIлаби дурадуркIутири, илди-ургаб лебри дунъяличиб цайли цаси экраноплан «Лунь».
СССР тIутIубиубли гIергъи, флотилия СНГ-ла пачалихъуни-ургаб бутIибсири. Каспийскла флотилия Бакулизибад МяхIячкъалализи ва Астраханьнизи чарбарибсири.
Чумал даршдус Россияла югла шайчирти дазурби мяхIкамдируси флотилияличи хъарти бекIлидиубти масъулти сари улкала пачалихъла-миллатла хIяжатуни дихIни. Гьанна 15 дусра-сера Каспи урхьула сурсатуни ва набтла мягIдунти дуртIниличила масъулти ирзули сари. Илди шуртIразиб флотилия бекIлибиубси цIакьли бетарули саби.
БусягIятла замана флотилиялизи кадурхули сари ракетабачилти къараулбирути гамурби, диштIати ва халати артиллерияла катерти, десантла, ахтарди дурабуркIути, минаби дурцути дявила гамурби, урхьула пехота, урхьула дублар артиллерияла гIяскурти.
2010-ибил дуслизиб Каспийскла флотилия югла дявила округлизи каберхур, ва «Град Свияжск», «Углич» ракетабала гамурби тIашдатур. 2011 ибил дуслизир «Великий Устюг», «Волгодонск» бикIути ракетабала гамурбани, ва 2012 ибил дусличибад «Дагъистан» бикIуси къараулбируси гамилира къуллукъбирули саби. Илдала дурарад хIялумцIнила, бехIемцIуназибад уцахънила, ахтарди дурабуркIнила, гьар журала ярагъладарибти ва ракетабачилти дявила гамурбира дархли флотилиялизир лер.
2015 ибил дуслизиб Каспийскла флотилияли Сириялизибси дявила балбуцлизир бутIакьяндеш дирули, гамурбачирад ракетаби дархьили, чучи хъарси дявила хъарбаркь таманбарибсири. 2016 ибил дуслизиб флотилия 85 процентла кьадар сагати гамурбани гIеббуцибсири. Илкьяйдали 2017-2018-ибти дусмазибра флотилиялизирти шуртIри ункъдарили, ахъси даражаличи дикахъибтири. 2018 ибил дуслизиб Россияла оборонала министр Сергей Шойгуни бурибсири бекIлибиубси база Астраханьнизибад Каспийсклизи гечбирниличила. ИтхIейчибад илаб къуллукъбирутас хъулри тIашдалтнила ва бузерилис шуртIри алкIахънила хIянчи детерхур. Илкьяйдали гамурбачиб ва урхьула дублаб къуллукъбирутала лугIи чуйнара-сера имцIабариб.
Гьарли-марси Каспийскла флотилияла цIакьра кьуватра чебаэс имканбакIиб гьалабван бетерхурси гамурбала парадличиб. Илар бутIакьяндеш дариб 40–йчир имцIали гамили ва 500–цад военныйтани. Цалабикибтани ахъли кьиматладариб ракетабачилти гамурби «Дагъистан», «Татарстан», «Астрахань», «МяхIячкъала», «МяхIяммад ХIяжиев» умцIерила-уцахънила катерти, къараулбирнила гамурби, БТР-ти, МИ-8 вертолетуни ва цархIилти техника. Илдачил дарх байрамличир бутIакьяндеш дарибтири Азербайжанна ва Иранна гамурбани ва 100 адамли.
Илдигъунти далдуцунани Россияла Ярагъладарибти ЦIакьанала кьуват чебиахъули ва Каспийла дазурбачирти регионтачил бархбасуни уржахъули сари.
