ГIяхIбаркьла бар­кьуд­луми дура­дур­кIули гIям­ру гьам­мад­дирахъути адамти камли ахIен нуша-ургаб.

Илдигъунтала лугIили­зивадси сай Ла­ва­­шала районна Хъар Лябхъула шилизи­вадси Шамил ГIямаровра. ХIера, иш­­ди бурхI­назиб ДР-ла Халкьла Собраниела депутат Ш.ГIя­ма­ров сунела кумекчи, ДР-ла Халкьла Собраниела Жагьилтала парла­ментла депутат ГI.ХIу­сей­новличил варх рес­публикала Р.ХIям­за­товла уличилси Мил­латла библиотекализи вякьун. Илдани край руркънила ва миллатла литературала отделла бекIлириубсигъуна специалист Са­лимат ХIяжиевас культурала ва рухIла давла мяхIкамдирнилизи белгиси пай кабихьни багьандан, Баркалла кагъар бедиб, илкьяйдали компьютерра пешкешбариб.
С.ХIяжиева культурала давла мяхIкам­бирули ва чебирцIахъули 20 дусличирра имцIали библиотекализир рузули сари. Буралли, илала бузери жамигIятла культура гьалабяхI башнилис гьаликIли бетарули саби. Рахли культурала даража гIяшбиалли, жамигIят рухIлашал мискинбирар, наслубала ургабси бархбас къябудар. Салимат илгъуна бетхIеахъес къайгъилизир сари.
Салимат МяхIяммадся­гIидовнала бузери тухтурлаван яра мугIяллимлаван чебиули хIебиалра, рухIла давла мяхIкамбарес багьандан, илини гьарли-марли халаси хIянчи дурабуркIули сари. Илала баркьуди жузи дедлугнилизиб, литература балнилизибцун таманбирули ахIен. Ил гIяхIси психолог ва педагог сари, илини гьарилличил жагали ихтилатрикIесра бала. Салиматли жамигIятла гIямрулизир, библиотекализир дурадуркIути декIар-декIарти далдуцуначир жигарла бутIакьяндеш диру, илкьяйдали жузала выставкабира гьаладирхьу. Илини нушаб хIяжатти баянтира къалабали дурхьути сари.
Адамла гIямрулизи цIацIали атIунти лугIурбала технологиябани библиотекарьла хIянчилизибра барсдеш акIахъуб ва арагIебли библиотекабала кабиз цархIил жураличи шурбухъахъун. ИшбархIи библиотекала специалистла компьютерличи хIяжатдеш алкIули саби. ХIера, Ш.ГIямаровли, гьаннала заманала аги-кьяйда пикридарили, С.ХIяжиевала хIянчи циила кункдиахъес багьандан, савгъатлис компьютер бедиб.
Нешла мезла хIурматбируси дубурлан сайливан, Ш.ГIямаровли нушала газета къулбасбирнила хIяракатра гIеббуцибсири.
Салимат ХIяжиевас, Шамил ГIямаровлис ва ГIялигъалбицI ХIусейновлис сархибдешуни дулгулра!