Гьалабра буриливан, республикала клиникала больницала рентгенэндоваскулярный хирургияла отделениелизиб санигIятлашал черяхIти устадешла бегIти тухтурти, хирургуни бузули саби.
Илдала гьар бархIиласи хIянчи – адамтас багалабирни, арадешлис кункдеш алкIахъни саби. Иличибра гIяхIси ва чебяхIси санигIят биэс бирару, гьатIи, иш дунъяличиб? Адамла гIямрула бекIлибиубси мурадра цархIилтас багалавирнилизиб биалли? Нушала гIямрулис урехи ахIелкIахъудеш, пайдалачебдеш ва чараагардеш хIясибли халбарибхIели, медицинала гIилму, гъай агарли, цаибил мерличи кабатес вирар.
Гьар бархIи нуни гьанбушибси отделениелизиб бузути хирургунани зягIиптас къиянти операцияби дирули, илди сагъбирниличил игитдешла баркьудлуми чедиахъули сари. ЦархIилван биэсра хIебири, сенахIенну илди чули барибси Гиппократла хъялис марли кавлути тутхтуртазибад саби. Хирургунани дурадуркIути операцияби рентгенничил дархдасунти диъни багьандан, чула арадешлисра урехи алкIули саби. Рентгенна хасти гIягIниахъулумачил баршибси хъулир операцияби дирухIели, тухтуртани рентгенна нурани кахIедалтуси хасти палтар челгьули сари. Иличибли радиацияла нуранала асар камбирули саби, амма ил асар тамай агарбаресра хIейрар. Биалра, адамла гIямру дерцахъес багьандан, баягъи отделениелизиб бузути хирургуни чула арадешлис алкIуси урехиличила пикрилра булхъули ахIен. Хирургунала гьарли-марти игитдешра ил анцIбукьлизир сари гьаргдирути.
Селичибад бехIбирхьуси хирургла бузерила бархIи? 7:45 сягIятличиб лебилра гьар бархIиласи пятиминуткаличи цалабиркур. Илис гIергъи отделениелизи кабихьунти зягIиптала аги-хIял сегъуна даражаличир сарил багьес къайгъибиру, сагали бакIибти зягIиптала анализуни ахтардидиру, ва ил бархIи дарес гIягIнити операциябачила ихтилатбиру. Гьайгьайрагу, лебтанилра балуси саби, тухтур зягIипсила гIямрулис урехи акIубси сегъуна-дигара замана хIянчилав вирниличилара. ХIянчи арадешлис заралласи биънила сабабли, баягъи отделениелизиб бузерила бархIи къантIбарибси биалра, тухтурти хъули арбукьес къалабахIебикIар. ГIядатлибиубливан, зягIиптачи хIеруди бирули, илди кьанси заманара хIянчилаб чебаэс вирар.
Отделениелизиб бузути тухтуртазивад гьарил жавабкардеш дихуси, сунела хIянчиличи чекайзурси, бамсри хIебалули узуси сай. Илис саби цаличил ца цабалги бузути тухтуртала коллектив цархIилти отделениебала гьалабра гIибратлис гьанбуршуси.
РКБ-ла рентгенэндорваскулярный хирургияла отделениелизиб 7 специалист бузули саби: авал рентгенэндохирург, кIел кардиолог (уркIила излумала специалист), реаниматологра. Дусла духIнар отделениелизир 1300-личибра имцIали зягIиптас хирургиялашалси кумек гIеббиахъули саби, илдала лугIилизир — хIила тумачир дирути къиянти операциябира.
Буралли, РКБ-лизиб рентгенэндоваскулярный хирургияла отделение абхьибхIейчирад илцад-декIар халаси замана дикили ахIен. ЗягIиптас бегI гьалар илала унза гьаргдиубтири 2016 ибил дуслизир. Отделениелизир зягIипти кабилхьути 10 мер лер. ЗягIиптачи чебетаибси хIерудира бирули, аравирнилашалти далдуцунира дурадуркIули сари илар. Операция барибси зягIипси кIиэсил, хIябэсил бархIи хъули вархьес асубирар.
Отделениелизиб бузути хирургуназивад Дагъистайзив, дарганти-ургав цаибси рентгенэндоваскулярный хирург сайливан, декIарварес вирар Арсен ГIяли-АсхIябович МяхIяммадов. Рентгенэндоваскулярный хирургия Дагъистайзиб сагаси бяхIчибиз саби, Арсен ГIяли-АсхIябовичра гьанналичи бикайчи дарганти-ургав ил шайчивси цаибси специалист сайри.
Ахъушала школализив учIухIейчивад илизир биологияличи, химияличи диги акIубтири. ХIера, илди дигили белгибариб Арсе челябкьла ва санигIятлашалси гьуни. Сунела хIял-тIабигIятлашалти паргъатдеш, гьар секIал чедетаахъили хIясибдирес ва заманаличиб хIяжатси хIукму дураисес бални хIясибли, ил тухтур ветаэс акIубсигъунари. Илкьяйдали бетра бетаур. Школа гIяхIти кьиматуначил таманаибхIели, Арсен ДГМА-лизи керхур. 1996 ибил дуслизиб Дагъиста мединститутлизиб белчIуди хъараахъурхIели, Арсен ГIяли-АсхIябовичли сунела багьудлуми Москвализибси А.Н.Бакулевла уличилси уркIила-хIила тумала хирургияла гIилмула центрлизибси (НЦССХ им.А.Н.Бакулева) ординатурализир чедицIахъиб. Илав ил уркIила-хIила тумала хирургияла шайчив нушала улкализив бекIливиубси академик Баграт Алекянничил тянишвиубсири. Россиялизив бекIливиубси машгьурси рентгенэндоваскулярный хирург Б.Алекян Арсен ГIяли-АсхIябовичла учитель сайри. Машгьурси хирургла хIерудилиув учIуси замана Арсен ГIяли-АсхIябовичли сунела бузерилизир чараагарли дагьес гIягIнити уркIила-хIила тумала хирургияла шайчирти лерилра дигIяндешуни гIяхIил дяркъуртири.
2000 ибил дуслизиб ординатурализибси белчIуди таманаибхIели, Арсен ГIяли-АсхIябович Дагъистайзи чарухъун ва «Республикала клиникала больница» ДР-ла ГБУ-лизиб бузерила гьуни бехIбихьиб. ИтхIели рентгенэндоваскулярная хирургияла шайчиб бузути кIел специалистцун сабри лебти. Илдазивад ца – Арсен ГIяли-АсхIябович сайри. Гьайгьайрагу, хирургла гьамадли ахIенси бузерила гьунчир азирти операцияби, зягIипти адамтала гIямрула декIар-декIарти кьисматуни, гьарбизуни, сархибдешуни къаршидикиб. ГьархIебизунира диуб дургар. Амма Арсен ГIяли-АсхIябовичли гьачамалра тухтурла уличи, адаб-хIяяличи балхIебикибси, Гиппократла хъя булъуси цалра баркьуди хIебариб. Сунела бузерила гьунчирти сархибдешуни Арсен-ГIяли-АсхIябовичли чIянкIли сунела сунечицун хъарихъули, бамсри агарли узули, сунени бируси хIянчиличи диги дакIудирули сархибти сари. Ил гьаман сунела санигIятлашалти багьудлуми чедирцIахъули, гьалавяхIцун сайри вашуси. 2009-ибил дуслизив ил Дагъиста кардиологияла ва уркIила-хIила тумала хирургияла центрла инвазивная рентгенокардиоангиологияла отделениела заведующийли катурсири. Сунела къуллукъличив узуси дусмазив Арсен ГIяли-АсхIябович гIяхIил секIал балуси, пагьмучевси, санигIятлашалти черяхIти устадеш лерси хирург ва заведующий сайливан лебтанилра вагьур.
Баягъи центрлизиб Арсен ГIяли-АсхIябовичла сипта хIясибли, Дагъистайзиб бегI гьалаб рентгенохирургияла отделение абхьибсири. Илини баягъи отделениелизиб план хIясибли, уркIила ва уркIила хIила тумала (коронарографияла) шайчир рентгенохирургияла (ангиографияла) хIялумцIлаби дурадуркIнила шайчибси бузери гьунчибушибсири.
Бурес чебиркур, 2010-ибил дуслизиб Арсен ГIяли-АсхIябовичли Дагъистайзиб бегI гьалаб уркIила хIила тумла (коронарная артерия) мерличи мегьла турба кабатурли (стентирование), къиянси операция дураберкIибсири. Илис гьалар нушала республикализир илдигъунти операцияби дарибти ахIенри. ЗягIипси Губданила шилизивадсири. Ил гьаннара мицIирли левал. Амма хIейгеси биалра, ишхIелла гьаркьяти гIягIниахълуми диули ахIен, хIяжатдиркутигъунти ахтардлуми, хIялумцIлаби дурадуркIес. Илкьяйдали Арсен ГIяли-АсхIябовичла бузерила устадешлизи бегI гьалар илини бекIла мехIела аневризмала операция дураберкIни, хIила тумазиб эмболизацияла тяхIяр пайдалабарни ва дахъал цархIилти хирургияла далдуцуни кадурхули сари.
Се барили хьалли, гIяхIси, гьарли-марси тухтурла хIянчилис багьа, кьимат абаахъес хIейрар или гьанбиркули саби, сенахIенну гьар бархIи илдани зягIиптала гIямру уцахъниличил чедиахъути черяхIти игитдеш селичилра цугдуцес хIейрар. Арсен ГIяли-АсхIябович 2013 ибил дуслизиб дураберкIибси «Рентгенэндоваскулярный тяхIярличил изала белгибирнила ва арабирнила шайчивси бегIлара гIяхIси тухтур» («Лучший врач лучевой диагностики – врач по рентгенэндоваскулярной диагностике и лечению») бикIуси конкурсла лауреат сай. Ил чебяхIси категорияла тухтур сай.
Сунечи хъарбикибти зягIиптани биаб, яра барх бузути хIянчизартани биаб, бурули саби Арсен ГIяли-АсхIябович сунечи дугьабизуртачил дебали малхIямли, хIурматличил гъайикIниличила, илдала шайчиб хIеруди дакIубирули узниличила. Иличил барх бузути хIянчизарти чус кумек хIяжатбикибси замана Арсен ГIялиасхIябовичличи хъарахъес бирниличи, къиянси агилизиб илини чузи насихIят гIеббурниличи бирхули саби. Илала черяхIти къиликъуни сунела баркьудлумазирра гьар бархIи чедиули сари барх бузутани. Сунечи хъарбарибси хIянчи, илини гIелайчи архIебухили, итмадан бекIбируси сай. Мурталра гьалавяхI вашуси, санигIятлашалти устадеш чедирцIахъуси, адамдеш дархси, кабизалачевси тухтур сай ил. ИмцIабикIаб нуша-ургаб илдигъунти уркIи гьаргти, чула черяхIти багьудлуми, устадеш лерли хьалли, халахIеберхурти, чула хIянчи чебетаахъили, ахъси даражаличиб бирути тухтурти.
Гьалабра гьанбушиливан, Дагъистайзиб гьанналичи бикайчи рентгенэндоваскулярный хирургияла шайчибти специалист кIел сабри лебти. Гьанна биалли илдала лугIи 11-личи абикили саби. Ил лугIилизи кархули сай баягъи отделениелис бекIдешдируси жагьил специалист, рентгенэндоваскулярный хирургияла шайчивси медицинала гIилмуртала кандидат МяхIяммадов Шамил ХIяжиевичра. Лебилра гIяхIти, адамдешла черяхIти къиликъуначил декIарбулхъути пергер дарганти баягъи отделениелизиб цалабикили саби или гьанбикеслири, илаб бузути тухтурти чебаибхIели.
Ш.ХI.МяхIяммадов Дахадаевла районна КьярбачIимахьилизив акIубси сай. Дагъиста мединиститутлизиб белчIуди хъараахъурли гIергъи, илини Москвализибси А.В.Вишневскийла уличилси хирургияла институтла хирургияла излумала шайчибси кафедрала ординатурализиб белчIуди даимбариб. Хирургияла санигIятлашалти мурхьти багьудлумачил вегIиуб. Ординатуралис гIергъи, Шамил ХIяжиевичли уркIила-хIила тумала шайчибси ва цахIнабси хирургияла санигIят хIясибли Н.И.Пироговла уличилси РГМУ-ла аспирантура чеббикIиб. Медицинала гIилмуртала кандидат ветаэс багьандан белкIунси гIилмула хIянчира рентгенэндоваскулярный хирургияла шайчибси сабри. Сунени касибси санигIятлашалти устадеш чедирцIахъули, Шамил ХIяжиевич декIар-декIарти мераначив узули калун: Москвала 57 ибил больницализивад вехIихьили, Дагъиста кардиологияла ва уркIила-хIила тумачил бархбасунси хирургияла центрлизив, Аскерхановла уличилси центрлизив ва цархIилти мераначив. 2015 ибил дусличивад ил республикала клиникала больницализив узес вехIихьибсири ва сай узуси отделение абхьибхIели, серхурси, санигIятлашалти черяхIти устадешличилси жагьил хирург виъни хIясибварили, заведующийла къуллукъличи катурсири.
Жагьилти гIямрула дусмачи хIерхIеили, дебали, кагибси, жавабкардеш дихуси, бирхауди бихьеси заведующий, хирург сай Шамил ХIяжиевич. Буралли, илини бекIдешдируси отделениелизиб бузути лебилра тухтурти Россияла медицинала белчIудила гьаркьяти заведениебазиб бяркъ, дебш касибти, багьудичебти, санигIятлашалти черяхIти устадешличилти, пагьмучебти, игьдибар бихьести специалистуни саби. Илдачи вегIла арадешла шайчиб ташмишдеш агарли хъарахъес вирар. Илдазивад гьарил тухтур чучила чебетаахъили бурес лайикьли сай. Ил барес пикрира леб.
Баркалла биаб чус, дуги-хIери хIеили, адамла арадешлис къарауйчи кабизурти илдигъунти тухтуртас. Илдала бузерила гьундурачир мурталра сархибдешуни ва гьарбизуни диаб. Чула хъалибаргличил илдас арати ва талихIчерти гIямру дулгулра. Дагъистайзиб илдигъунти тухтурти имцIабикIалли, гьарил зягIипси сагъвиэс вирнила шайчир, разили ва талихIчерли гIямру дуркIути адамти бахъбиънила шайчир ташмишдеш алкIули ахIен…
