Гьалавван Лавашала районна администрацияли ва социальный бяхIчибизлизиб адамти гIеббурцнила шайчибси управлениели УллугIяялизив хIерируси ГIямар БяхIяндгIялиев 100 дус виънила юбилейличил мубараквариб. Районна бекI Ш.Дабишевла шайзирад илис мубаракла дугьби дуриб ва арцла шабагъат бедиб.
ГIямар мубаракварес бакIилри районна администрацияла бекIла заместитель ГIяйшат МяхIяммадова, УСЗН-лис бекIдеш дируси ГIябидат МяхIяммадова, илкьяйдали УллугIяяла шила бекI Х.АлхIясанов.
УллугIяялан 100 дус виъниличил мубаракла кагъурти дакIиб Россияла Президент В.Путинна Администрацияла шайзирадра.
Сунела юбилейла бархIи ГIямар БяхIяндгIялиевли дурхIнала, илдала баркьибтала ва илдала биштIатала авидлизиб, разиси къушумлизиб беркIиб. Илкьяйдали иличи гIяхIладли бакIилри Хайдакьла районнизибадти юлдашуни (къунакъуни). ГI.БяхIяндгIялиевли гIяхIлази сунела гIямрула декIар-декIарти манзилтазирадти тамашала гьанбикуначила буриб.
