Хайдакьла районнизибадти бузерила ветерантас ва тылла зяхIматчибас Россияла Президент Владимир Путинна шайзирад мубаракла открыткаби ва муниципалитетла бекI ГIялим Темирбулатовла шайзирад Баркаллала кагъурти дедиб.

Балбуц дураберкIиб: районна администрацияла, бекIахъудилашал адамти гIеббурцуси управлениела ва муниципалитетла цархIилти хIянчизартани.
Илди районнизибти лебилра ветерантачи бякьун ва мубаракбариб.Илди саби: Кьярталай бикIуси шилизирадси Халум ГульмяхIяммадова, сарира 95 дус риубси. Тумерлен поселоклизирадси Каяханум Мамаева, Чумлила шилизирадси Аминат Мусаева, ГIяхIмадкентлизивадси ХанмяхIяммад МяхIяммадов, Шилагьила шилизибадти ПатIимат ХIусейханова ва Сакинат МяхIяммадова, Жавгъатла шилизибадти МяхIяммад МяхIяммадов ва Сугьат ХIяпизова, Мажалислизирадси Хатима Сахова, Зубарият ГIяхIмадова Маллакентла шилизирадси ва цархIилтира.
Пачалихъла БекIла ва районна руководствола шайзирад хасти мубаракла дугьби дакьиб ветерантани ва тылла зяхIматчибани, чулира гьамадли ахIенси гIямрула гьуни ахъибти. Дявила ва ил таманбиубси манзил илдани ВатIан багьандан, саби акIубти мер-муса сагадарес, лутIи-хьулчилизибад бехъубси шила хозяйство кьяшмачи тIашбатес, экономика гьалабяхI арбукес дахъал хIянчи дарибтири.
«Нушаб ишбархIи имканбакIили саби хIуша мубаракдарес ва барибси хIянчилис баркалла багьахъес. ХIушала кумекличирли сарра нуша ишбархIи ишцадра ункъли хIердирути. Гьанна нуша бузерилизир гьаладяхI дашес, жагIялла бархIиличи хIулдуркIес дирулра. ХIушала биалли, илгъуна имкан аги. Ил багьандан хIушаб халаси баркалла. ДурхIядеш ва жагьдеш чехIедаили, ВатIайс гIяхIдешлис дузули калунти хIуша нушабра, чеабиуси наслулисра гIибратли кавлутира. ДурхIнала дигили кIапIдуцили, чIумаси арадешличил, арали ва хIулкIули калабая!»,-бикIи илди.
Чула яргализиб ветерантани районна ва республикала руководстволис, чучи бакIибти гIяхIлас ва илдани бяхIчиаибси пикрилис баркалла багьахъур.