Гьалабван Москвализиб «Цаси Россия» партияла ХХ-ибил Съезд бетерхур. Илала бузерилизир бутIакьяндеш дариб Россияла Президент В.Путинни, партияла Председатель Д.Медведевли, партияла Федерацияла органтала члентани, регионтала бургани, регионна отделениебала секретарьтани, делегатунани.
Дагъистанна регионна отделениелис вакилдеш дариб ДР-ла БекIла къуллукъуни заманалис дузахъуси, «Цаси Россияла» ДРО-ла политсоветла секретарь С.Меликовла бекIдешлиуб 20 делегатли.
Пачалихъла БекIли буриливан, 20 дусла бухIнаб «Цаси Россия» партияли даим гьалабяхI башес ва сагабирес хIядурли биъни чебаахъиб. Ишдуслизиб иларти сагадешуни дебали дахъал сари, гьаларти дусмазирван ахIи. Буралли, партиялизиб бахъал леб кумекчибала, жамигIятла хIяракатчибала, социальный бяхIчибизла вакилтала лугIилизибадти жагьилти, чулира гьалар выбортазир бутIакьяндеш хIедирути. В.Путинни гьанбикахъиб, «Цаси Россия», бегI гьалабси яргализиб, социальный бяхIчибизла партия саби, илис бикьридеш дирули сари депутатунани Федерацияла ва регионтала даражлумачир политикала цалабяхъла шайзирад хIердарахъес гьаладирхьути законопроектунани.
РФ-ла Президентли, гъамти дусмазир регионтазир дурабуркIуси «Цаси Россия» партияла хIянчила бекIлидиубти бяхIчибизуни сарливан, гьандушиб бахъал дурхIначилти хъалибаргуни ва жагьилти гIеббуцнила, экономика гьалабяхI башахънила, арадеш бихIнила, багьудила ва гIядатуни мяхIкамдирнила масъулти. Илкьяйдали Россияла Правительстволичи ва «Цаси Россия» партияличи гъамти шел дусла духIнар школаби лутIи-хьулчилизирадал къулайдирнила программа хIядурбарахъес хъарбариб, гьундури сагадирнилис регионтас чеимцIали 30 миллиард къуруш декIардарес, нясти шин умудирути гIягIниахълуми лушнилис 150 миллиард къуруш дяхIчиаахъес ибти пикрумира гьаладихьиб.
Съездличиб, тIамри дедили, РФ-ла Пачалихъла Думализи выбортачи «Цаси Россия»-ла шайзибадти кандидатунала сияхI тасдикьбариб. С.Меликовли Дагъистан хIясибли «Цаси Россия»-ла шайзибадти кандидатунала регионна кьукьялис бекIдешдариб. СияхIлизи илкьяйдали каберхурли саби: НурбяхIянд НурбяхIяндов, Сайгидпаша Умаханов, Хизри Абакаров, Артем Бичаев, БийсултIан ХIямзаев, Мамед Абасов, Кубатай Масуев, Елена Павлюченко.
Съезда баянтала черкад сунела пикруми дурули, ДР-ла БекIла къуллукъуни заманалис дузахъусини, партияла хIяракатла дазурбазир, республикала адамтачил бархбасуни кадилзахънила мягIничебдешличила аргъахъиб.
Юсуп Умавов, ДГУ-ла управлениела факультетла кафедрала заведующий, Съездла делегат: «Дебали дигеси саби, гьалар-гьалар тIамри дедлугнила хIяракатлизир 12 миллионничибра имцIали адамли бутIакьяндеш дарни. 2021 ибил дуслизиб праймериз бегIлара бястлизи каберхурсили бетаур – ца мерличи 13 адам бястбикIулри».
Аминат ГIябдулманапова, Дагъистанна халкьла поэт:
«Хаслира уркIи разибирули саби регионтачи къячдилкути масъулти хIердарибхIели. Бахъал дурхIначилти хъалибаргуни ва жагьилти гIеббуцни биалли, пикри дайлаб сабхIели, гьатIиралра дигесили бетаур. Илкьяйдали Президентли гьандушиб экономикала, арадеш бихIнила масъултира. Гьайгьайрагу, социальный бяхIчибизла бекIлидиубти хьулчначилара хъумхIертур».
Насибат ХIяжиева, Краснопартизанскла урга даражала школала нешла мезла ва литературала мугIяллим: «Улкала Президент Владимир Путинни Правительстволичи школаби къулайдирнила программа хIядурбарахъес хъарбариб, сабира 5 дуслис хасбарибси. Буралли, нушала республикализир дахъал сари эскидиубти школаби. ДурхIнас багьудлуми дедлугути гIевдухьуни сарливан, гьайгьайрагу, илди бегI гьалабси яргализир сагадарили ва къулайдарили диэс гIягIнити сари. СенахIенну дурхIни саби нушала челябкьлара, ил шаласили биахъес лерил секIал дарес чебиркур».
Муслимат Абакарова, ДГУ-ла экологияла факультетла преподаватель, мирхъичи:
«Регионтас гьундури къулайдарахъес ва нясти шин умудирути гIягIниахълуми сагадарахъес арц декIардирни, дебали гIяхIси саби. Дагъистаннисра илди масъулти мурталра аргъбаибтили кавлути сари.
Ил багьандан челукьути масъулти гъамси заманализир арзили дирниличира халаси бирхауди леб. СенахIенну экология нушала гIямрула мягIничерти шалубазибад ца саби».
