СанигIятуначила ва хIянчурбачила гъай детарухIели, бегIла гьалаб гьанбушес вирар хIурматла, дебали хIяжатси санигIят – мугIяллимла. Бархьаначи буралли, ил ца ити бурибси, дугIла пикрира ахIен. Ил санигIят нушани бархбалсахъулра чеалкIуси наслу руркъниличилцун ахIенну, жагьилти гIямрула гъярцIти дукьбачибад бягIуси халаси гьуйчи гьуниббалтнира, илдази жагIялла бархIи санигIят чеббиркIахъес кумекбирнира саби. Илди дугьбалара хIячми мурхьли даршдусмази ардякьи сари.
Машгьурси урусла поэт Николай Некрасовли белкIунсири: «МугIяллим! ХIела гьалав кьукьмуциркулра ну!» Дирхаирая, илди гъайла мягIна ва кьадричебдеш гьаннара бетихъули ахIен. Сецад замана ва аги-кьяйда дарсдиралра, илала мягIничебдеш сеналра камхIебирар.
Гьанна дебали хIейгесили бетаурли саби, лебилра улка кахIесахIеллира, нушала Дагъистан халбарахIелли, ил санигIятли бегIбирути жагьти дебали камли биъни. ИшхIели ил челукьуси суалли бетаурли саби.
Мартла шуличиб, хамис бархIи, Гергала школализиб «Къаякентла районнизир Дагъиста педагогический университетла бурхIни» ибси жила удиб халаси балбуц бетерхур. Ил дураберкIибсири чебяхIси даражала багьудила учреждениела руководительтала ва нушала районна администрацияла сипта хIясибли. Дагъиста бухIнаб илгъуна, педагогикала санигIят машгьурбирнилис багъишлабарибси, бегI гьалаб сабри дураберкIибси.
Ил балбуцла башриличила буралли, илини саби-алав бахъал халкь цалабяхъиб. Жибарибти хIурматла гIяхIлала ургаб лебри ДГПУ-ла ректор Нариман Асваровличил, проректорти Алексей ХIясановличил ва Мурад Рашидовличил барх МяхIячкъалализибадти жавабла хIянчизарти, руководительтала кьукья ва ДГПУ-ла студентунала кьукья. Илкьяйдали илала бузерилизир бутIакьяндеш дариб нушала районна администрацияла бекI МяхIяммад Эльдерхановли ва илала бекIдешлиуб бузути хIянчизартани, лерилрара-сера школабала директортани ва илдала заместительтани, чедирти классунала бучIантани ва илдала руководительтани. Илала дурабадра Дагъис­тан Рес­публикала БекI Сергей Меликовла хъарбаркь хIясибли дурабуркIуси балбуцличиб лебри Дагъистан Республикала гIилмула ва багьудила министр ЯхIъя Бучаев, Дагъистан Республикала Халкьла Собраниела депутатуни Елена Павлюченко, Камил Давдиев, Руслан Ибрагьимов.
Гьала-гьала РФ-ла, кIинайс — Дагъистан Республикала гимнаби зайдухъи гIергъи, Къаякентла районна бекI МяхIяммад Эльдерханов гъайухъун. Илини гьала-гьала бакIибти гIяхIлас салам бедиб ва илди мубаракбирули, гьар секIайзир гIяхIдешуни далгун. ГIур илини гьанбушиб ДГПУ-ла бяхIличи баршибси мармарла къаркъаличивси дунъяличирра хабардерхурси ректор Шейх ИсмягIиловла акIубси бархIилис багъишлабарибси балбуц бусягIятла замана дебали аргъбаибси масъала арзнилис хасбарибси биъниличила. Ахирличиб илини буриб ункъли бучIанти шабагъатлабарес багьандан, районни акIа­хъубси ва кьабулбарибси хасси (нор­мативно-правовой) акт хIя­сибли, «шула» кьиматуначил уни­­верситет белчIунсилис 500 азир къурушра дедес ва хIян­чи­ли­чира кабатес пикрибарниличила. Илгъуна багьахъни балбуцла бу­тIа­кьян­чибани вяхли дяхъибти хъутрачил кьабулбариб.
КIинайс гъайухъун ДГПУ-ла ректор Нариман Асваров. Сунела гъайлизиб илини гьан­бу­шиб абзур Дагъистайзиб 1500 спе­циалист-педагог хIебиъ­ни­ли­чила. Ил масъала алкIули саби Къаякентла районнизибра. Гьайгьайрагу, илди масъулти ирзниличи бяргIибси хIерли хIерикIес асухIебирниличила буриб илини.
ГIур гъай бедиб Башлыкентла школала директор, ДГПУ-ла выпускница Мадина Кьадиевази, хIябъибил курсла студентка Диана Муртуковази ва нушала районна багьудила Управлениела начальникла къуллукъуни заманалис дузахъуси Ольга Гороновскаязи.
Балбуцла программа хIясибли, кIиибил бутIализир факультативла хIянчурби, устадешла дурсри, темаби хIясибти майдунти гьаладихьиб.
Илаб дурхIни тянишбиуб санигIятла дигIяндешуначил, иштяхIдухъести шалубачил ва санигIят чеббиркIнилизир чус багаладирути хIянчурбачил. Пикриагарли кахIелун студентунала ва школала бучIантала командабала спортла гьунибаънибира: футболла, волейболла ва спортла цархIилти журабала.
Балбуцла ахирласи бутIализир студентунани ва районна культурала Юртла хIянчизартани жигарла бутIакьяндеш дариб. Концертла дазурбазир, номерти-ургар шабагъатуни дедлугулри. Асилси бузери багьандан шабагъатлабариб ДГПУ-ла преподавательти ва районна школабала учительти.
Балбуц хъараурхIели, журналистунас балбуцличи цалабикибти хIурматла гIяхIлази суалти хьардаэсра имканбакIиб.
ХIера, илкьяйдали таманбиуб ил ванаси, амма дебали пайдаласи гьунибаъни. Бурес чебиркур, илдигъунти гьунибаънибани ва далдуцунани жамигIятлизир хъумхIертести къел далтули дирар.

ПатIимат ГIяхIмадова