Сергокъалала районна бекI Арсен МяхIям­ма­дов­ли Вана­ши­ма­хьи­ли­­­зивадси машгьурси педагог ва тыл­ла ветеран Мустапа Мус­та­паев 95 дус виъниличил муба­рак­вариб.
Ветеран мубаракварес, илис сав­гъат пешкешбарес, дахъал дус­мазиб дураберкIибси хIян­чи­лис ва район гьалабяхI арбукьни­лизи хайласи пай кабихьнилис бар­калла багьахъес Арсен Мя­хIям­мадов М.Мустапаевличи гIяхI­­ладли вякьун.
Мустапа Мустапаевла гIям­ру­ла гьуни — вегIла биштIаси Ва­тIайс ва халкьлис къуллукъбирнила хIяракатлис гIибратли бетарули саби. ЧебяхIси Чедибдеш гъамбикIахъули, виштIаси урши Мустапа Мустапаевли ЧебяхIси ВатIа дергъла манзиллизив тыллизиб мекелли халаси хIянчи барибсири. Дергъ таманбиубли гIергъи, халаваибхIели, чеалкIуси наслулис бяркъ бедлугули илини сунела бузери даимбарибсири. 57 дус Мустапа ил хIянчиличив узули калун.
Мустапа Разиевич жура-журала медальтачил шабагъат­лаварибси сай. «ДАССР-ла халкьла багьудила Отличник», «ДАССР-ла хIурматла мугIяллим» бикIути умачира ил лайикьикиб. Гьанна пенсияличивхIелира, Ванашимахьила шила халатала ва ветерантала Советла председатель сайливан, М.Мустапаевли жамигIятла гIямрулизир жигарла бутIакьяндеш дирули сай. Илала гIякьлучерти дугьбачи адамти лехIирхъули ва насихIятуни гIердурахъес дугьабилзули саби.
Арсен МяхIяммадовли илис чIумаси арадеш тухумтала диги ва лерилра гIяхIтигъунти далгун. Мустапа Разиевичгъунти адамти районна мицIирси тарихли ва мургьила фондли бетарули саби.

Сергокъалала районна багьахънибала центр