Даршал дус – ил лугIицун ахIен. Ил къиянси ва багьаагарси жуз саби, сунезибра гьарил бяхI бузериличил, дигиличил, детахълумачил ва бирхаудиличил белкIунси.
Лавашалала районна бекIла хъарбаркь хIясибли, администрацияла баркьудлуми къелгIер­дикуси ГIяйшат МяхIям­мадова ва УСЗН-лис бекI­деш дируси ГIябидат МяхIям­мадова Лавашала шилизирадси ГIябид ГIи­сакьадиевна 100 дус риъ­ниличил мубаракрарес бя­кьун.
ГIябидат ГIисакьадиевна акIубси сари 1926 ибил дуслизир Лавашала шилизир, ГIисакьадила ва ПатIиматла хъалибарглизир. Ил бузерила зяхIматчи сари, суненира дергъла дусмала лерилра къияндешуни чекасибси. Хала неш ГIябидатла дурхIядеш дебали къиянтири, амма илди дусми илини уркIила дигиличил гьандиркахъу. ДурхIни жявли бурсибиубтири бегIтас хозяйстволизиб кумекбирес, кьацIла гьарил къидикъла хIурматбирес ва цали ца гIеббурцес. Хала неш ГIябидатли 4 класс тамандарибтири, амма белчIуди даимбарес имканхIебакIиб, рузес гIягIнилири. Сен-биалра багьудлумала цIакьличи бирхауди илини лерилра сунела гIямрулизиб бихули калунсири.
ЧебяхIси ВатIа дергъ бехIбихьибхIели, ил 15 дус риублири. Мурул адамти фронтлизи арбякьун, ва лерилра къияндешуни хьунул адамтала, бухънабала ва дурхIнала хъуцIрумачи хъардикиб. Илала гIулухъадешра авлахъуначир ва фермализир шалгIердухъун. Сунела зиланти кьяйдали, илра дуги-хIерила рухIнар рузусири «Лерилра фронтлис, лерилра Чедибдешлис!» бикIуси жила удир. Дугели илди бамсурли геркабулхъутири, амма балусири: чула бузерилизибад солдатла гIямру дигахъути диъни. Илгъуна асилси бузери багьандан илис «Дергъла ветеран ва тылла зяхIматчи» ибси у бедибсири. Амма итхIели илис бегIлара халаси шабагъат саби – Чедибдеш.
Дергълис гIергъи, 1948 ибил дуслизир хала неш ГIябидат Гаматов МяхIяммад СалихIовичлис шери рякьунсири. Илала мурул ЧебяхIси ВатIа дергъла ветеран сайри. Илини дергъла лерилра декIдешуни чекасиб, Берлинничи бикайчи ваиб, авна декIли вяхъили калунсири, гIяхIцад медальтачил шабагъатлаварибсири. Чедибдешлис халаси багьа бедили – чулахъ ветаурли чарухъунсири.
Илдала хъалибаргла тарих – мардешла ва дигайла тамашала мисал саби: талихIчебси хъалибарглизиб барх илди 60 дус хIербиуб.
ГIяхIлас уркIи гьаргли гьунибаиб юбилярла дурхIни ва илдала баркьибти. Хала неш ГIябидатла хIурматбирули, гIяхIлани илис савгъатунира дедиб.
Лавашала районна администрацияла пресс-служба