Шин агарли адамлис гIямрулизиб дебали къиянни бирар, сенахIенну хъулир дирути лерилра бекIахъудила къуллукъуни илдачил сари дархдасунти. ЦацахIели биалли, шин агархIели, гIямру тIашдилзутиван кабилзан. Илцадра хIяжатти ва илди агарли нушала гIямал бетхIеруси, дурхъаси лигIмат сари шин.
Амма шинничил дархдасунти масъулти гьаман гьаладилзули дирар нушала гIямрулизир. Дигалли шагьарлизир диаб, дигалли шилизир диаб, шин камдиънила, замана-замана илди тIашиънила, умути шинничил адамти гIеббурцнила масъулти алкIули сари. ГIе, шагьуртазиб хIербирути адамтала лугIира бархIиличи-бархIи имцIабикIули саби. Иличибли гьалар лерти шинна кабизуни, турбаби бажардидиркули ахIен бахъал адамти шинничил гIеббуцес. Гьайгьайрагу, иличирли адамтала яшавла бекIахъудилизир масъулти алкIули сари, сарира дарсдешуначил ахIи арзес хIейрути. Амма ил кабизлизир дарсдешуни диахъес багьандан гIяхIцад харжанира бухъянси заманара хIяжатдиркути сари.
Дубуртала лутIилизирад хьулчи кайсути, итцадра эркинни ва гьарзали парчдикIути, шимазирти урунжуни камдиубли сари. Дила пикрили, илди гIергъити дусмазир тIабигIятла шуртIразир дарсдешуни кадиркниличил дархдаси сари. ЦацадехIти шагьуртазир кьяйдали, гьанна шимазирра шин сягIятуни хIясибли шантала хъулрази дашахъули сари, хаслира – дуцIрумла замана. Буралли, шантас шин хIедиънила шайчиб цагьатIи сабабра леб – хъуми дузахъантани, унхъри удалтутани шин овощуни-цIедеш дашахъес, галгуби ва духълуми шинни иркес пайдаладирули сари. Гьайгьайрагу, галгубасра шин хIяжатти сари. ГIягIниси кьадарлизиб хIябцдеш агарли, илдани севан цIедеш лугути? Амма вегIла шантас зарал хIебиахъубли, илдас къуллукъ гIеббурцес чебиркур. Эгер имкан лебли биалли, хIеркIлизирад шин кадухили, галгуби-духълуми далхес. ЧеимцIали ванзалиубад урунж абитIес виалли, гьатIира къулайли бири: умути шинничил адамтира пайдалабикIес бири, хъуми дузахъутасра илди багалатили урдулхъи.
Дусличи-дус гьавала температура имцIабиъниличибли, дуцIрумла замана дегъдеш зумабиънили, шимазирти урунжунира багьла-багьлали деткайхъули сари. ХIуркIбазирти шинна кьадарра гIергъити дусмазиб гIяхIцадла камбиубли хIисаббиру. ГIямрула хьулчили детаурти илди агарли хIериэсра къиянни бирар. Ил багьандан вируцад шин мяхIкамдарес чебиркур, илди дугIли ва имцIали харжхIедирули. ТIабигIятла гьарил лигIматли, адамли сунес сегъуна къуллукъ гIеббуцилил хIеръили, саби илисра жавабли биахъубли «баркалла» балахъуси.
Салимат ГIялиева
