ХIеблизир дубурла хIуркIбала, булбул чатIнала тIамрачи гIяшикьхIейэс хIейрар. Илдани адамла уркIи паргъатбирахъу, гьав ахъбирахъу ва хумардеш чебарбику. Жагати макьамтанира, далуйтанира ва делхъананира адамличи тяп илгъуна асар бирули саби. Культурала хIянчизарти булбул чатIнаниван адамтас разидеш бихули бузули саби.
Магьдиева Зайнаб ГIябидовна 2001-ибил дусличирад рехIрихьили, нушала культура ва гIядатуни мяхIкамдирули рузули сари. 2001-ибил дусличирад 2011 ибил дусличи бикайчи ил дурхIнала пагьмуртала Юртла директорли рузули калун. Зайнаб Магьдиева пагьмучерси, сунела хIянчиличи дигичерси, культурализир сархибдешуни дирахъес бажардириркуси, барх бузутачил ралгунси руководитель сари.
2011 ибил дусличирад Зайнаб Магьдиева СМКДЦ–ла (Сергокъалала районна культурала ва бамсриихънила Центрла) директорли рузули сари.
Зайнаб ГIябидовнала пасихIкардешличила, илини бекIдеш дируси СМКДЦ-ла сархибдешуначила районнизибцун ахIенну, республикализибра ункъли балуси саби. Сунечи хъарси хIянчи илини чебетаахъили бирули рирар. Директорли халатала пагьмурти белгидирес, илди гIеббурцес, биштIатази нушала гIядатуни гIерисахъути тяхIурти пикридирес ункъли балули сари.
Районна бамсриихънила Центрлизи кадурхули сари Сергокъалала культурала Юрт ва районна шимазирти 16 филиал. Культурала хIянчизартани шими-ургабси бархбас уржахъули дахъал далдуцуни дурадуркIули дирар. Нушала район илдани, республикализир гьаларти мерани сархули, машгьурбиубси саби.
З.Магьдиевала бузериличила багьес вирар илис дедибти дипломти–шабагъатуначиблира. Илди сари: ДР-ла культурала Министерствола ва республикала халкьла пагьмуртала Юртла шайзирадти дипломти, ДР-ла Правительствола ХIурматла Грамота ва цархIилтира.
Даргала мез, культура, гIядатуни мяхIкамдирес, чеалкIутас рухIла давла калахъес дурхIнала пагьмуртала Юртли ва МКДЦ-ли халаси пай кабирхьули саби. Зайнаб ГIябидовнара гьанна 25 дус илди хIянчилис бекIдеш дирули рузули сари.
Дубурлан хьунул адам чинар рузули риалра, ил хъали-цIала хIянчилизирадра акьурулхъуси ахIен. Нушала Зайнаблира, сунела гIямрула вархкья МяхIяммадлира духути, бяркъчебти 2 урши ва 2 рурси абикьур, гIямрула бархьси гьунчи дураиб. БегIтала уркIбас дигуливан талихIчебли калаб саби.
Гьалабван МяхIячкъалализиб ДР-ла культурала Министерствола заседание бетерхурсири. Арбякьунси дуслизир дарибти хIянчи кьиматладирули, сабухъчерли рузуси Зайнаб Магьдиевас ДР-ла культурала министр Зарема Бутаевани Баркаллала кагъар бедиб.
ХIурматла Зайнаб ГIябидовна, хIянчилизир гьарбизуни, уркIилизиб разидеш, чархлизиб арадеш, хъалибарглизиб диги, юртлизиб баракат мурталра хIечил дарх дираб!
Басират ХIяжимурадова
