ВатIан балтахъанна БархIилис гьаларти бурхIназиб цагьатIи дагъистанлан Россияла Игитла чебяхIси уличи лайикьикнила хабар нушачи баиб. Россияла гIярмияли дявила хасси балбуц бехIбихьибхIейчирад 19 бургъан-дагъистанланнис ил у бедили саби. Бурес чебиркур, нушала республика ил уличи лайикьбикибти россиялантала лугIи хIясибли гьаркьяти регионтала цаибти къяяназиб саби илира. 2022 ибил дуслизиб, гIярмияла хасси балбуц бехIбихьибси цаибси бархIи, Россияла Игитла у касибси гIяхIгъабзара дагъистанлан урши сайри. Ил сайри старший лейтенант, ротала командир НурмяхIяммад ХIяжимяхIяммадов. Илис Россияла Игитла у вебкIили гIергъи бедибсири. Душмантани алавуцибси ва вяхъибси илини, някълаб граната баргаили, гIяхIцад душмантира сунечил барх итил дунъяличи арбукибтири.
19 ибил дагъистанлан Россияла Игит Дахадаевла районна Кьялкнила шилизивадси СягIид МяхIяммадович Ибрагьимов сай.
Дагъистан Республикала БекI Сергей Меликовли ил дебали дигеси анцIбукьличила СягIидла бегIтази багьахъур ва илди чула уршили сархибси нушала улкала бегIлара халаси шабагъатличил мубаракбариб.
«Дявила хасси балбуцлизиб Россияла офицер СягIидли гьачамцун ахIенри гъабзадеш чедаахъибти, — викIули сай Сергей Меликов. — Илини сунечил диубти бегIлара къиянти аги-кьяйдализиб сунечи къакъбяхъес вирниличила ва сай урехиагарси, марси, васвасхIейкIуси адам виъниличила багьахъур. СягIидгъунти офицертани саби бургъанти чедибдешличи бикутира. ВатIан балтахъанна БархIи нушани дагъистанлан подполковник СягIид Ибрагьимовлис гибси шабагъатличи пахрубирес дирехIе». УркIи-уркIилабад бурисра: нунира пахрубирулра дила унрашан дурхIя Россияла Игит ветаъниличи. Ил наб дила гъамси адамван вилзули сай.
Ну Кьялкнила школализив урус мезла учительли узули калунсира. Нуни учIахъули вирусири СягIидла дудеш МяхIяммад СалихIович.
Игитла хала дудеш (дудешла дудеш) СалихI Ибрагьимовла юрт школала мякьлаб бирусири. Ил дебали дагьричевси, динничи чекайзурси хIурматла адам сайри. ЖумягI бархIи сайгъунти цархIилти кьялклантачил ил районна центрлизибси мижитлизи дехIибала дирес вашусири. Чуйнара къаршибикиб дила шилизивад Кьялкни хIянчила аркьуси наб школала къараулли узуси Маннихъа ШяхIбанра СалихIра хьурали Уркарахъибси мижитлизи аркьули. СалихI вахъхIи калунси сай Кьялкнила мижитла имамла хIянчи дузахъули. ХIялалси хIянчи барибси СалихI кьялклантани гьеч хъумуртули ахIен.
СалихI Ибрагьимов ЧебяхIси ВатIа дергъла бутIакьянчира сайри. Лерилра сунела гIяхIтигъунти хасиятунала чеди СалихI масхара балуси, гьарилличил валиркес устадеш лерси адамра сайри. Дебали иштяхIдулхъи дила иличил лякьирикIес.
Нушала Игитла итил хала дудеш (нешла дудеш) ГIябдулла ГIяхIмадович ГIяхIмадов дила гъамси юлдашра сай. Ну Кьялкнив узухIели, ил школала завучли вирусири. Урус мезла учительли узуси жагьил учитель наб урус мезла мугIяллимла гIяхIцадла устадешла вегI ГIябдулла ГIяхIмадовичли халаси кумек бирусири. Илини ну гIяхIси учитель ветаахъес халаси къайгъи бариб. Ну дила шилизи учительла хIянчиличи чарухъунхIелира, ГIябдулла ГIяхIмадовичра нура унра шимазирти школабази методикала объединениебачи дарх дашутири. Школабала директортани дузути нуша илала машиналичир районнизи совещаниебачира дарх дашутири. Нуша имцIали къаршидиркули дирахIери жура-журала шадлихъуначирра. Илдигъунти анцIбукьуназивра ГIябдулла ГIяхIмадович дебали валкайкибси адам сай.
Ункъли ралас нуни нушала Игитла хала неш Дирванра. Кьялкнила школализир ил биологияла учительница рирусири. Жявли аррякьун нушачирад ил гIяпабаркь. Сецадла разирикишира ил сунела рурсила урши Россияла Игит ветаъниличи!
Валас нуни ГIябдуллала дудеш гIяпабаркь Ибила ГIяхIмадра. Пергер адам вирусири илра. Бахъал гIяхIли чучи башуси хъалибарг сабри илдала. БебкIала бурушличи кайхьунси Ибила ГIяхIмадли хъарбарибси саби сунела урши ГIябдуллачи ца ишгъуна секIалра: шилизив вебкIибсила гIелабти ил хIяриихьили гIергъиси бархIи савли кьацIли букахъес сунечи бикахъес. ГIябдуллани дудеш мицIирхIелира или бирусири, гьаннара или бирули сай, бикIар.
СягIидла неш ГIябдуллала рурси Зубайдатра нуни ралас: ну ГIябдуллахъалачи имцIали вашусири ва Дирваннара ГIябдуллалара лебилра дурхIни балутири. Игитла дудеш МяхIяммад СалихIович полицияла майор виънира неш учительница риънира нуни балуси саби. СягIидла узи, хала дудешла у бихуси СалихIра СВО-лизив виъниличила аргъира. Къялкнила шилизибад СВО-лизиб къуллукъбирули 65 бургъан леб или буриб.
Нушала Игитла гIямрулизирадти баянти нуни, илала гъамти тухумтази хьардаили, хIушаб гьаладирхьулра, ахIерти нушала газета бучIанти.
Россияла гIярмияла подполковник СягIид МяхIяммадович Ибрагьимов акIубси сай 1996 ибил дуслизив Дахадаевла районна Кьялкнила шилизив. Сунела бегIтачил варх ил посёлок Сулахълизив хIерирули калунси сай. Илабси школализир гехIел класс таманаибси СягIидли Владикавказлизибси Суворовское училищелизиб белчIуди даимбариб. ВиштIали левалли Россияла Ярагъладарибти ЦIакьаназиб къуллукъбарес кьасбарибси ил Дальний Востокла лебил гIярмияла чебяхIси даражала дявила училищелизи учIес керхур. Ил таманаили гIергъи Свердловскла областьлизи гIярмиялизиб къуллукъбарахъес вархьиб.
2022 ибил дусла февральла 24-личибад Россияла гIярмияла майор СягIид Ибрагьимовли дявила хасси балбуцлизиб къуллукъбирули сай. Камси замана дикибхIели, илала устадеш ва бургъантала ургабси хIурмат пикрилизи касили, гьала хили бедили илис подполковнила у, ил батальонна командирла къуллукъличи катур. СягIид Гъабзадешла орденничил, Жуковла медальличил ва «Дявила хасси балбуцла бутIакьянчи» бикIуси медальличил шабагъатлаварибси сай.
2026 ибил дуслизиб Россияла Федерацияла Президентла ХIукму хIясибли, сунечи хъарси дявила чебла ихъухIели дакIударибти гъабзадеш ва игитдеш багьандан, подполковник СягIид МяхIяммадович Ибрагьимовлис Россияла Игитла у бедиб. Февральла 20-личиб Игитла михъирличи «Мургьила Зубари» медаль РФ-ла оборонала министр А.Р.Белоусовли баршиб.
Бурни хIясибли, СягIид МяхIяммадович виштIахIелира рухIлашал дебаси виъниличил цархIилтазивад декIарулхъуси урши уили сай. «Илини дураберкIес пикрибарибси хIянчи гьар мурталра ахирличи биахъусири, — викIар илала дудеш МяхIяммад СалихIович. — Школализивра гIяхIли учIуси, неш мугIяллим риъни багьандан ахIенрину, цархIилтазивад гьар секIайзив сай гьалав виэс къайгъибирни багьанданри. Спортра дигахъи: азадли мушулбашнила секцияличи ваши».
«Дявила хасси балбуц бехIбихьибси заманаличивад бусягIятла манзилличи бикайчи дила урши гьачамцун сай хъули вакIибси, илхIелира хIябал бархIилис», — гьанбуршули саби илала нешли.
ХIера, илдигъунти гIядатла адамтала хъалибарглизив хIеркайубси сай дила макьалала игит СягIид МяхIяммадович Ибрагьимов — Россияла гIярмияла подполковник, Россияла Игит. Ил, кьялкланталацун ахIи, лебилра Дахадаевла районна халкьла, лебил даргантала ва дагъистанлантала пахру сай.
Нушала газетала яргаличилси номер дурабулхъуси бархIи, февральла 26-личив, нушала Игит 30 дус вируси сай. АкIубси бархIиличил ва сунес бедибси нушала улкала бегIлара ахъси шабагъатличил газетала агьлули ил мубараквирулра.
Дулгулра илис гIуррара талихIчерти гIямру, чIумаси арадеш ва гIярмиялизиб къуллукъбирнилизир сархибдешуни.
ХIяжимурад Ражабов
